ადვოკატი – გიორგი ჩიკვაიძისთვის აღკვეთის ღონისძიების – დაპატიმრების გამოყენება დაუსაბუთებელია, გირაოს დაპატიმრებით შეცვლის არავითარი საფუძველი არ ყოფილა – გადაწყვეტილებას გავასაჩივრებთ

დიდი ოდენობით თანხების მართლსაწინააღმდეგო მითვისების ფაქტზე ბრალდებული ბიზნესმენების გიორგი ჩიკვაიძისა და ირაკლი პაპიაშვილის ადვოკატის, გიორგი ყაველაშვილის განცხადებით, გირაოს დაპატიმრებით შეცვლის არავითარი საფუძველი არ ყოფილა და გიორგი ჩიკვაიძისთვის აღკვეთის ღონისძიების დაპატიმრების გამოყენება დაუსაბუთებელია.
ადვოკატის განმარტებით, ბრალდების მხარეს გიორგი ჩიკვაიძესთან და ირაკლი პაპიაშვილთან მიმართებაში ერთი და იგივე საფუძვლები და არგუმენტაცია ჰქონდა.
მისი თქმით, სასამართლოს იგივე გადაწყვეტილება უნდა მიეღოთ ჩიკვაიძეზეც, როგორიც პაპიაშვილზე მიიღეს.
„რა თქმა უნდა, პაპიაშვილის ნაწილში, როდესაც მის მიმართ პატიმრობა არ იქნა გამოყენებული, სასამართლოს გადაწყვეტილება სწორი იყო. თუმცა იგივე საფუძვლები და იგივე არგუმენტაცია ჰქონდა ბრალდების მხარეს ჩიკვაიძესთან მიმართებაში. ამიტომ, ჩვენთვის ამ ნაწილში – ჩიკვაიძისთვის აღკვეთის ღონისძიების დაპატიმრების გამოყენების თაობაზე და პაპიაშვილისთვის გამოყენებაზე უარის თქმის თაობაზე დაუსაბუთებელი გახლავთ. ვფიქრობთ, რომ იგივე გადაწყვეტილება უნდა მიეღოთ ჩიკვაიძეზეც, როგორიც პაპიაშვილზე მიიღეს. მითუმეტეს, რომ რეალურად, გირაოს დაპატიმრებით შეცვლის არავითარი საფუძველი არ ყოფილა.
რაც შეეხება სასამართლოზე არგამოცხადებას, ეს სასამართლოსაც განვუმარტეთ, რომ ყოველთვის სასამართლოს ნებართვით ხდებოდა და ბრალდების მხარეც ყოველთვის თანახმა იყო. სასამართლომ ეს თავის დასაბუთებაშიც აღნიშნა, რომ ეს არ იყო დაპატიმრების გამოყენების მიზეზი. ანუ ამ ნაწილში სასამართლომ ბრალდების მხარის პოზიცია უარყო და თქვა, რომ მათი გამოუცხადებლობა მიზეზი და გირაოს შეცვლის საფუძველი არ იყო“, – განაცხადა გიორგი ყაველაშვილმა.
ადვოკატის თქმით, გიორგი ჩიკვაიძის პატიმრობაში ყოფნა დაუსაბუთებელია და აპირებს, რომ აღნიშნული გადაწყვეტილება გაასაჩივროს.
ცნობისთვის, დიდი ოდენობით თანხების მართლსაწინააღმდეგო მითვისების ფაქტზე ბრალდებულ ბიზნესმენს, გიორგი ჩიკვაიძეს აღკვეთის ღონისძიების სახით შეფარდებული 50 000-ლარიანი გირაო პატიმრობით შეეცვალა. რაც შეეხება მეორე ბრალდებულ ირაკლი პაპიაშვილს, მისთვის შეფარდებული გირაო ძალაში დარჩა. მოსამართლის განმარტებით, პაპიაშვილის მიმართ სასამართლომ დასაბუთებული არგუმენტი ვერ მოისმინა, თუ რატომ უნდა შესცვლოდა მას გირაო პატიმრობით.