“აქ 100 ლარს რომ იღებ, 101 ლარად მე მოგ@@ნავ, ყველა “დირკაში” გიხმარო” – პოლიციის ძალადობა ქალ დემონსტრანტებზე

სექსუალური შევიწროების შემთხვევების შესახებ, რადიო თავისუფლება აქვეყნებს მასალას.

„მოვდივართ [გოგოები] მარშზე, რაღაცას ვჭამთ და ერთ-ერთი მათგანი გვეუბნება, რამდენის ჩადება შეგიძლიათ პირში ერთადო? ესეთი კომენტარებით გამოირჩევიან, რაღაცეებს ხუმრობენ [უხამსად], თან სახე აქვთ დაფარული”, – ამბობს რადიო თავისუფლების პირდაპირ ეთერში 2 თებერვლის მარშის მონაწილე სტუდენტი გოგო.

20 წლის ქეთა ქურასბედიანი: „“გადაეთრიეთ გზიდან” და ეგეთი მოწოდებები სხვა დროსაც მსმენია მათგან, მაგრამ 2 თებერვალს განსაკუთრებით გაუგონარი იყო, როგორც იქცეოდნენ. გარდა იმისა, რაც უშუალოდ მე მითხრეს, გავიგე, როგორ უთხრა იმავე პოლიციელმა სხვა გოგოს – “სასტვენს გაგტენი #რაკში!”.

ქეთი მედიასთან ამბობს, რომ პირები, რომლებიც ახალგაზრდა ქალებს ამცირებდნენ, უხამსად ელაპარაკებოდნენ და ძალადობით ემუქრებოდნენ იყვნენ სამხედროს მსგავს ფორმაში ჩაცმული ახალგაზრდა კაცები ნიღბებით, რომლებიც ავტობუსებიდან ჩამოვიდნენ და 3-4-კაციან ჯგუფებად გაიფანტნენ დემონსტრანტების გარშემო.

“იყო საფრთხე, რომ რამე პროვოკაციას მოაწყობდნენ და დაგვიჭერდნენ, მე ჯიბეებიც კი ჩავიკეტე, რომ რამე არ ჩაედოთ”, – ეუბნება ქეთა რადიო თავისუფლებას.

2 თებერვალს დღეს პოლიციამ 30-ზე მეტი ადამიანი დააკავა, მათგან ხუთს დაკავებისას ისე სცემეს ნიღბიანებმა ჯერ ქუჩაში, შემდეგ მანქანებში, რომ კლინიკაში მოხვდნენ;

“თბილისის მოლთან“ გამართული აქციიდან არაერთი ჟურნალისტი, მათ შორის რადიო თავისუფლების რეპორტიორებიც შეესწრნენ შემთხვევებს, როგორ ეძახდნენ ნიღბიანი პოლიციელები ქალებს „ასლარიან ბოზებს”.

38 წლის ანანო, ორი შვილის დედა:

“ასეთი ისტორიები მსმენია და წამიკითხავს, მაგრამ პირადად ჩემ თავზე პირველად გამოვცადე, მიუხედავად იმისა, რომ უამრავ აქციაზე ვარ ნამყოფი.

არანაირი ცუდი სიტყვა ან შეურაცხმყოფელი ფრაზა მე მათთვის არ მითქვამს – მონა რომ მონაა, ეგეც კი არ დამიძახებია.

მოლს რომ გასცდები, გზა რომ ვიწროვდება, იქ ვიდექით ტროტუარზე. ამ ტროტუართან სამ-ოთხ რიგად იყვნენ პოლიციელები, მაგათ შორისაც ხომ არის განსხვავება, ესენი იყვნენ სრულიად შავებში ჩაცმული ადამიანები ყველანაირი ნიშნის გარეშე და ეგენი გამოირჩეოდნენ განსაკუთრებით ცინიკური, აგდებული დამოკიდებულებით. წადით სახლში, ჯობია ჭურჭელი გარეცხოთ აქ დგომასო. ნიღბიანი სპეცრაზმელების მესამე ზოლიდან იძახდა ერთი – “შეხედე რამდენი ბოზია”, “ტინდერის ბოზები დგანან.

სხვა გამოჩნდა, რომელიც იძახდა, ლოთები და მთვრალები ხართ, რას გავხართ, რანაირად იქცევითო. ვუთხარი, მოიტანე ალკოტესტი და ორივემ გავაკეთოთ, ვნახოთ, ჩვენს შორის რომელია ფხიზელი-თქო”

ესეც 2 თებერვალს მომხდარი ამბავია, რომელსაც ფეისბუკზე მოჰყვა აქციის კიდევ ერთი მონაწილე, სალომე კამლაძე:

„*ლეს მოწოვ?

აქ 100 ლარს რომ იღებ, წამოდი და 101 ლარად მე მოგ**ნავ. ყველა დირკაში გიხმარ. ეს მხოლოდ მცირე ნაწილია იმ სიტყვებისა, რასაც გზადაგზა მეუბნებოდნენ ეს მანიაკები.

მერე მოგვცვივდნენ, ხელს გვკრავდნენ, გვაგინებდნენ.

ვერ მოვითმინე და მხოლოდ ორი სიტყვა – არ გრცხვენიათ-თქო? – მივაძახე და ერთმა არაკაცმა მუშტი დამარტყა სახეში, ტუჩიდან სისხლი წამომივიდა და ის არაადამიანი მეუბნება, რომ მოგტ**ავ, მუ***იდანაც მასე წამოგივა სისხლიო”, – .

ისტორიკოსი, ირაკლი ვეშაგურიძე:

„გოგოს აგინებენ და ბიჭს ეუბნებიან – შენ რა კაცი ხარ, გოგოს ვერ იცავ, იწვევენ. მერე ალბათ სადმე შეიკრიბებიან და ამბობენ, იმ მხარეს არიან ასეთი ლაჩრები, ვერ დაიცვა გოგო“.

2024 წლის გაზაფხულიდან საპროტესტო აქციებზე ქალებზე პოლიციელთა სექსუალური ძალადობის, ყველაზე ცოტა, 4 შემთხვევის შესახებ არის ცნობილი – არცერთ ამ შემთხვევაზე გამოძიებას არაფერი არ დაუდგენია და სისტემას დანაშაულის ჩადენის ფაქტი არ უღიარებია.

„რა გეგონა, აქ რომ მოდიოდი, გადარჩებოდი? პოლიციის მანქანაში წაგიყვანთ, მუხლებზე დაგაყენებთ და შენს პირში მოგცემთ, შე ბოზო, შეგვიძლია შენს პირში ჩაგა*ვათ”, – ასე ემუქრებოდნენ ნიღბიანი პოლიციელები 26 წლის ქალს. იგი რადიო თავისუფლებას ანონიმურობის დაცვის პირობით მოუყვა თავის ისტორიას, რომელიც 28 ნოემბრის ღამეს შეემთხვა რუსთაველის გამზირზე,

28 ნოემბრის ღამეს პოლიციამ მშვიდობიან აქციაზე 43 ადამიანი დააკავა, მათი ნაწილი ისე იყო ნაცემი, რომ კლინიკაში მოხვდა სახის ძვლების მოტეხილობებით, ტვინის შერყევითა და თვალების დაზიანებით. სახელმწიფომ დემონსტრანტების წინააღმდეგ გამოიყენა: წყლის ჭავლი, წიწაკის სპრეი, ხელკეტები, რეზინის ტყვიები და ცრემლსადენი გაზი.

ახალგაზრდა ქალი, რომელიც თავს სექსუალური ძალადობის მსხვერპლად მიიჩნევს, ნიღბიანმა პოლიციელებმა გამთენიისას დააკავეს, ამ დროს ის მეგობართან ერთად ქუჩაში დაგდებული კაცის შველას ცდილობდა – კაცს პოლიციელები სახეში ფეხებს ურტყამდნენ, აგინებდნენ.

ქალის მონაყოლის თანახმად, ნიღბიანმა პოლიციელებმა, რომლებმაც დააკავეს, ის რუსთაველიდან მოშორებით წაათრიეს, გზაში სცემდნენ, ლანძღავდნენ და ემუქრებოდნენ, რომ პოლიციის მანქანაში აუცილებლად გააუპატიურებდნენ. ეს მუქარა იმდენად აგრესიული, საშიში და რეალისტური მოეჩვენა, რომ ახალგაზრდა ქალმა ჯერ ჩაიფსა, შემდეგ კი გონება დაკარგა. პოლიციელებს შეეშინდათ და იქვე, ქუჩაში მიაგდეს.

„არავის სახეები არ მახსოვს, სამი უზარმაზარი კაცი იყო, მხოლოდ თვალები უჩანდათ. გონზე რომ მოვედი, ქუჩაში ვეგდე, სულ სველი ვიყავი და გაუჩერებლად ვტიროდი. ქვემოთა ქუჩაზე ისევ გრძელდებოდა ხალხის ცემა და დაკავება, ჯოჯოხეთის ხმები ისმოდა“, – ამბობს ახალგაზრდა ქალი, რომელიც ამ ამბიდან ერთი კვირა სახლიდან ვეღარ გამოდიოდა.

„ტ*აკში გაგიკეთებთ დუბინკას, თქვენ ევროპაში ხომ მოწონთ ტ*აკში სექსი“, – ამ ფრაზის სხვადასხვა ვარიაციას ახსენებენ დემონსტრანტები, რომლებმაც დაკავების, ცემისა და დამცირების გამოცდილება გამოიარეს.

„ჩემი მეგობარი დააკავეს რუსთაველზე, არაფერს აშავებდა. როცა დავინახე, როგორ გაათრიეს, დავდექი პოლიციის კორდონის წინ. შემათრიეს ჯერ კორდონში, შემდეგ რაღაც სამარშრუტო ტაქსიში, სადაც სიბნელე იყო, შემეშინდა და ვითხოვე, გამოვეყვანე იქიდან”, – ასე გაიხსენა დაკავების ღამე სასამართლო სხდომაზე კიდევ ერთმა ახალგაზრდა ქალმა, ბეატრის გაზდელიანმა.

„პოლიციის განყოფილებაში რომ გადამიყვანეს, ძალიან არასასიამოვნო რამ მოხდა. ვიდეოს მიღებდნენ პოლიციის თანამშრომლები, ნიღბები ეკეთათ, მაგრამ ტანსაცმელზე ეწერათ, რომ პოლიციელები იყვნენ. მეუბნებოდნენ, ვიცით შენზე, რომ სტრიპტიზს ცეკვავ გახდილიო, არ ვიცოდი, მაგას რატომ მეუბნებოდნენ ან რა უნდა მექნა, საშინელება იყო, სავარაუდოდ, ჩემი განერვიულება უნდოდათ, შანტაჟიც” – ასე იხსენებს ბეატრისი დაკავების შემდეგ მომხდარს. პოლიცია მას დაუმორჩილებლობას და წინააღმდეგობის გაწევას ედავებოდა, სასამართლომ კი სამართალდამრღვევად ცნო იმის მიუხედავად, რომ დაკავების კადრების მიხედვით, ის სრულიად მშვიდობიანად გამოხატავდა თავის პროტესტს.

პოლიცია ქალებს ამცირებდა და სექსუალურად ავიწროებდა უწყვეტი პროევროპული გამოსვლების დაწყებამდეც.

ნათია ძიძიგური პოლიციამ 19 ნოემბერს დააკავა, – ამ დღეს თბილისში რამდენიმე ასეული ადამიანი ღამისთევით აპროტესტებდა 26 ოქტომბერს ჩატარებული არჩევნების შედეგებს.

ნათია იხსენებს, რომ პოლიციელმა, რომელმაც ის დააკავა, ქუჩაში კორდონის წინ მდგომი ამოარჩია სხვა დემონსტრანტებს შორის და უთხრა, რომ ბევრს ლაპარაკობდა და გრძელი ენის ქონის გამო დაისჯებოდა. მოგვიანებით, როცა ის და სხვა რამდენიმე დაკავებული ავტომობილში შეყარეს, ნათია სხვა დაკავებული კაცების ფეხებში ჩააგდეს ისე, რომ სკამზე დაჯდომის საშუალება არ მისცეს.

როცა ქალმა ითხოვა, სკამზე დამჯდარი წაეყვანათ პოლიციის სამმართველოში, პოლიციელმა, რომელიც ავტომობილის უკანა სავარძელზე იჯდა, მას თავის პენისზე მიანიშნა. სამმართველომდე ნახევარსაათიან გზაზე მან ეს ჟესტი არაერთხელ გაიმეორა.

„ხელით მიმითითებდა ფეხებს შორის, მოდი, აქ დამიჯექი. თავიდან ძალიან შემეშინდა ამ ყველაფრის მოყოლის. მერე ამოვიცანი ეს კაცი, სახელი და გვარიც გავიგე და სპეციალურ სამსახურსაც მივაწოდე ინფორმაცია მის შესახებ. სანამ იმ ბიჭებს არ ვკითხე, რომლებიც მანქანაში ჩემთან ერთად იყვნენ, თვლიდნენ თუ არა, რომ ნამდვილად ძალადობას ქონდა ადგილი და შეეძლოთ თუ არა ჩემი მოწმეები ყოფილიყვნენ, ამ თემაზე ხმამაღლა არ მილაპარაკია”, – ამბობს ნათია.

ნათიას შემდეგ, მალევე მისი ძმა გახდა აქციაზე პოლიციელების ძალადობის სამიზნე – ის 1 დეკემბერს დააკავეს და სასტიკად სცემეს. ამ დრომდე გამოძიებას არცერთ საქმეზე არანაირი სიახლე არ აქვს.

მასალა სრულად – რადიო თავისუფლება