“ბანკებმა პირობები გაამკაცრეს, თითქმის შეწყვიტეს სასტუმრო ბიზნესის დაფინანსება”- Chateau Mere-ს დამფუძნებელი

სასტუმრო Chateau Mere-ს დამფუძნებელი გია პირადაშვილი “საქმის კურსთან” ინტერვიუში აცხადებს, რომ ტურიზმის სექტორში არსებული კრიზისი ღრმავდება, ბიზნესი ვეღარ უმკლავდება ხარჯებს და ვერც საბანკო ვალდებულებებს ისტუმრებს. მისი თქმით, ბანკებისთვის აღნიშნული მდგომარეობა ცნობილია, რადგან მათთან ბიზნესს ვალდებულებების გადავადებაზე კომუნიკაცია დიდი ხანია დაწყებული აქვს. მისი შეფასებით, ბანკები ხედავენ რისკებს და ტურიზმის სექტორში ახალი პროექტების დაფინანსება გაართულეს.
“ბანკებმა ძალიან გაამკაცრეს პირობები, თითქმის შეწყვიტეს სასტუმრო ბიზნესის დაფინანსება, ახალი პროექტების დაფინანსებაზე მაქვს საუბარი. ცდილობენ, რომ უკვე არსებულ ბიზნესებს დაეხმარონ კრიზისიდან გამოსვლაში.
ბანკებთან კომუნიკაცია, რა თქმა უნდა, დაწყებულია, რადგან საბანკო სექტორი ძალიან კარგად არის ინფორმირებული დღევანდელი სიტუაციის სირთულის შესახებ. მათთან დიდი ხანია დაწყებულია მოლაპარაკებები. ბანკი არ არის საქველმოქმედო ორგანიზაცია, რომ სამუდამოდ გაგიყინოს და გაგიჩეროს გადახდები და საბოლოოდ სავალალო მდგომარეობისკენ მიდის ბიზნესი. ზიანდება ბანკიც, ბიზნესიც, ზიანებიან ბანკის უკან მდგომი ორგანიზაციები.
ეროვნული ბანკი კომერციულ ბანკს უკვე სთხოვს, სხვადასხვა ბიზნესის მხრიდან ხელშეკრულების დარღვევის გამო საგარანტიო თანხების გაყინვას. ეს დომინოს პრინციპია, რომელიც აზიანებს ყველას. ბანკებთან ყველას აქვს მოლაპარაკება, მაგრამ ეს არ ნიშნავს, რომ ეს თანხა ჩვენ გადასახდელი არ გვექნება. ეს არ არის ყოველთვიური გადახდების დროებით შეჩერება”, – ამბობს სასტუმრო Chateau Mere-ს დამფუძნებელი გია პირადაშვილი.
ბანკების მიერ სებ-ისთვის წარდგენილი ანგარიშის თანახმად, 2024 წელს ბანკების მიერ სასტუმროებისა და ტურიზმის სექტორის დაკრედიტების მოცულობამ 2,985 მლნ ლარი შეადგინა, რაც წინა წლის მაჩვენებელთან შედარებით 1%-ით მეტი იყო.