დონალდ ტრამპი: საღი აზრია, არა? თუ არ გადაიხდიან, მე მათ არ დავიცავ. არა, მე მათ არ დავიცავ

აშშ-ს პრეზიდენტის, დონალდ ტრამპის თქმით, აშშ არ დაიცავს NATO-ს წევრ ისეთ ქვეყნებს, რომლებიც თავდაცვაში საკმარისს არ ხარჯავენ. ამის შესახებ ტრამპმა 6 მარტს ოვალურ კაბინეტში გამართულ პრესკონფერენციაზე ისაუბრა.

“საღი აზრია, არა? თუ არ გადაიხდიან, მე მათ არ დავიცავ. არა, მე მათ არ დავიცავ.

კრიტიკის ქარცეცხლში გავეხვიე, როდესაც ეს ვთქვი. ამბობდნენ, NATO-ს [წესებს] არღვევსო. NATO-ში ჩემი მეგობრები არიან. […]

თუმცა, უდიდესი პრობლემა, რაც NATO-სთან მაქვს, არის ის, რომ აშშ განსაცდელში რომ ჩავარდეს და ჩვენ მათ დავურეკოთ და ვუთხრათ, “ჩვენ პრობლემა გვაქვს, საფრანგეთო, ჩვენ პრობლემა გვაქვს კიდევ რამდენიმევ”, რომელთა სახელსაც არ დავასახელებ, გგონიათ ისინი მოვლენ და დაგვიცავენ?

წესით, ასეც უნდა მოიქცნენ, მაგრამ დარწმუნებული არ ვარ”. – თქვა ტრამპმა.

ტრამპმა ასევე დაამატა, რომ მას ეს შეხედულება წლებია, აქვს და 2017-2021 წლებში, პირველი საპრეზიდენტო ვადის განმავლობაშიც გაუზიარებია NATO-ს ლიდერებთან და მიუხედავად იმისა, რომ ალიანსის წევრებმა ბოლო წლებში თავდაცვის ხარჯები გაზარდეს, ტრამპის თქმით, “ეს ახლაც არ არის საკმარისი, ისინი მეტს უნდა იხდიდნენ”.

ამასთან, აშშ-ს 47-ე პრეზიდენტმა აღნიშნა, რომ იგი NATO-ს უყურებს, როგორც “პოტენციურად კარგს”, თუ ხარჯების საკითხი გამოსწორდებოდა.

“ისინი ვაჭრობის საკითხში პრობლემებს გვიქმნიან”. – თქვა ტრამპმა ალიანსზე.

6 მარტს ევროპელმა ლიდერებმა მხარი დაუჭირეს გეგმას თავდაცვაზე მეტის დახარჯვის შესახებ და განაცხადეს, რომ უკრაინის დახმარებას გააგრძელებდნენ.

“ვიცი, რომ ზოგს შესაძლოა, NATO-ს მომავლის შესახებ ეჭვები ჰქონდეს. ამიტომ, მომეცით უფლება, ვთქვა ცხადად, რომ ტრანსატლანტიკური ურთიერთობა და ტრანსატლანტიკური პარტნიორობა ჩვენი ალიანსის ფუნდამენტად რჩება.

პრეზიდენტ ტრამპს ცხადად გამოუხატავს აშშ-სა და მისი ერთგულება NATO-სადმი, რამაც ასევე ცხადი გახადა ის მოლოდინი, რომ ჩვენ, ევროპამ თავდაცვის ხარჯების გაზრდის მხრივ მეტი უნდა გავაკეთოთ”. – თქვა NATO-ს გენერალურმა მდივანმა მარკ რუტემ.

წყარო