თელავში ახალი სასტუმროს გახსნა იგეგმება – რას აერთიანებს კომპლექსი “აგარანის მამული”?

კახეთში, თელავის მუნიციპალიტეტის სოფელ რუისპირში გაზაფხულიდან 56-ნომრიანი სასტუმრო „აგარანის მამულის“ გახსნა იგეგმება.
სასტუმრო კომპლექსის დამფუძნებელი გიორგი ქოჩლაძე BM.GE-სთან აღნიშნავს, რომ თავდაპირველად სასტუმრო „ვილა გოდოლის“ სახელით უნდა გახსნილიყო, თუმცა პანდემიამ და შემდეგ გადაზიდვებში არსებულმა სირთულეებმა პროექტის განხორციელება გარკვეული დროით გადაადებინათ. ამ პერიოდში პროექტის ავტორმა და ინვესტორმა, მეგობარ მწერალ – დავით ტურაშვილთან ერთად პროექტს ახალი, უფრო ავთენტიკური სახელი მოუფიქრა და სასტუმრო პირველი სტუმრის მიღებას „აგარანის მამული“ სახელით აპრილიდან გეგმავს.
„აგარანი ძველქართულად რეზიდენციაა და ნიშნავს მეფის სადგომს. ჩვენ მიმდებარედ არის მაყაშვილების სასახლე და ერეკლე მეორეს აქ ვენახები და თავისი აგარანისთვის სხვა ინფრასტრუქტურა ჰქონია. ისტორიული ადგილია, საიდანაც კავკასიონზე არაჩვეულებრივი ხედები იშლება“, – აღნიშნავს გიორგი ქოჩლაძემ.
სასტუმროს გახსნის ვადისა და სახელწოდების კორექტირების პარალელურად არ შეცვლილა მისი კონცეფცია.
56-ოთახიანი, კახური ავთენტიკური სტილის სასტუმრო მოიცავს 2 საკონფერენციო სივრცეს, 2 ბუხრის ოთახს, ბიბლიოთეკას, ლაუნჯ სივრცეები, რესტორანს და აუზს. მის უკან ტყეა, სადაც რეკრეაციული სივრცე მოეწყობა. წინ კი 1 ჰა-ზე მეტ ფართობზე ვენახია, სადაც სამი ჯიშის ყურძენი – შარდონე, ქისი და საფერავია გაშენებული.
„აგარანის მამულის“ დამფუძნებელი და დირექტორი გიორგი ქოჩლაძე ამბობს, რომ სასტუმროს ასაშენებლად 16-17 მილიონი ლარის ინვესტიცია ჩადო, რაც ბანკის დახმარებით შეძლო. შედეგად კი, კახეთში დამატებით 85 სამუშაო ადგილი იქმნება.
სასტუმროს მფლობელი იმასაც აღნიშნავს, რომ მძიმე პოლიტიკური ვითარებიდან გამომდინარე, არ იცის, რამდენად ესტუმრებიან ახალ ობიექტს მისი სამიზნე ქვეყნებიდან ტურისტები.
„ეს კახეთში ერთ-ერთი ყველაზე ძვირად ღირებული და მაღალ სეგმენტზე გათვლილი სასტუმრო იქნება. ამ ბიზნესს რომ ვაკეთებდით, ორიენტაცია ევროპელ სტუმრებზე გვქონდა, თუმცა, ახლა საკითხავია, რამდენად ევროპელი და მაღალგადამხდელი სტუმრები ჩამოვლენ. გათვლა კი ასეთი გვაქვს“, – ამბობს „აგარანის მამულის“ ხელმძღვანელი.
პროექტი სასტუმროთი არ შემოიფარგლება. გიორგი ქოჩლაძეს ვენახის გასწვრივ 27 ექსკლუზიური ვილის აშენებაც აქვს გეგმაში.
„ეს ვენახი იქნება 27 ექსკლუზიურ ვილასთან, რომლის მფლობელებსაც სასტუმროს რუმსერვისისა და ინფრასტრუქტურის მომსახურების მიღება შეეძლებათ.
მსურველებს ჩვენ სამი ტიპის სახლს შევთავაზებთ. ყველა მათგანი კრამიტით გადაიხურება და კახური სტილის იქნება. სახლების მშენებლობა ჯერ არ დაგვიწყია. ახლა მძიმე პოლიტიკური ვითარებაა და შესაბამისად, განწყობები ნაკლებად არის, თუმცა ვილები მოთხოვნის მიხედვით აშენდება და ვეძებთ 27 მეზობელს, რომელიც აქ დაიდებს ბინას“, – ამბობს „აგარანის მამულის“ დირექტორი და იქვე აღნიშნავს, რომ ვილების გაყიდვები ჯერ არ დაწყებულა, – “მდგომარეობის დასტაბილურებას ველით“.