“მიმართვა „ქართული ოცნების“ მომხრე თანამემამულეებს” – ზურაბ გურული

აშშ-ს მასაჩუსეტის უნივერსიტეტის პროფესორი, ზურაბ გურული:

მიმართვა „ქართული ოცნების“ მომხრე თანამემამულეებს:”
—————-
მართალია თქვენ ფიქრობთ, რომ „ქართული ოცნება“ სამუდამოდ უნდა დარჩეს საქართველოს მმართველ ძალად, მაგრამ ქვეყანა ისე არ არის მოწყობილი, რომ ყოველთვის ყველაფერი ისე მოხდეს, როგორც ჩვენ გვსურს.
„ოცნება“ სახელმწიფოს სათავეში მოვიდა იმ დაპირებებით, რომ მიხედავდა ქვეყანას, დააფუძნებდა თავისუფალ სასამართლოს, დაიცავდა ყოველი მოქალაქის უფლებებს, საგარეო ასპარეზზე გაჰყვებოდა ფრთხილ, ზომიერ პოლიტიკას და შეინარჩუნებდა ბალანსს რუსეთსა და დასავლეთს შორის.
გავიდა 12 წელი და უკვე ყველა ვხედავთ, რომ არც თავისუფალი სასამართლო გვაქვს, მოქალაქეთა უფლებებიც შერჩევითად არის დაცული, იმის მიხედვით, ვინ ვისი მომხრეა; საგარეო ასპარეზზე ბალანსის დაცვა მოხერხდა კი არა, მთელ ცივილიზებულ მსოფლიოს დავუპირისპირდით; აღარ გველაპარაკება არც ევროპა და არც ამერიკა. ეს ახლა გნებავთ „დიფ-სტეიტს“ დააბრალეთ, გნებავთ „გლობალური ომის პარტიას“, გნებავთ უიღბლობას და ჯადოს, მაგრამ ფაქტია, რომ „ოცნებამ“ დაგვტოვა მხოლოდ ირანის, ჩინეთის, რუსეთის და აზია-აფრიკის წყალწაღებული ქვეყნების ამარა. ბალანსი აღარ არსებობს.
ამ ბალანსის აღდგენის გარეშე საქართველო განწირულია. მეგობრები აღარ შეგვრჩა; გვყავს მხოლოდ მტრები, რომლებსაც კუდს ვუქიცინებთ და ველაქუცებით, რომ არ შეგვჭამონ; და რომ აუცილებლად შეგვჭამენ, როცა მოუნდებათ და მოუხერხდებათ, ეს თქვენც კარგად იცით; კუდის ქიცინი არ შველის მაგას. ხსნა მხოლოდ ბალანსის აღდგენაშია; ანუ, სასწრაფოდ უნდა აღდგეს ურთიერთობა დასავლეთთან.
როგორც ხედავთ, თქვენი პროპაგანდისტ-ფილოსოფოსები ვერ გამოდგნენ მთლად გონიერი ხალხი. ჯერ ამტკიცებდნენ რომ ტრამპი და „ოცნება“ ერთნაირად ფიქრობენ, ახლა, როცა ნათლად გამოჩნდა რომ ტრამპის ფილოსოფია „ოცნების“ პრინციპებისგან დიამეტრულად განსხვავდება, დაიწყეს მტკიცება, რომ ტრამპიც დაამარცხა იმ ოხერმა „დიფ-სტეიტმა“. ძალიან ღრმა ფილოსოფიაში რომ არ გადავეშვათ, თუ ეს ოხერი „დიფ-სტეიტი“ ასეთი მაგარია, იქნება გაანებოთ მაგის ჩხიკინს და გაბრაზებას თავი, თორემ თუ ტრამპი მოინელა, თქვენ ერთ ლუკმად არ ეყოფით და მისგან ვერც რუსეთი გიხსნით, ვერც ირანი და ვერც ჩინეთი. დროულად დაშოშმინდით და წესიერად დაელაპარაკეთ ევროპა-ამერიკას, ანუ თქვენებურად „დიფ-სტეიტს“.
ეგენი კი ისე არ დაგელაპარაკებიან, თუ ელემენტარულ წესიერებას მაინც არ გამოიჩენთ. ევროპის განაპირა ქვეყანა ვერ იარსებებს იზოლირებულად. დედას გიტირებენ და თქვენთან ერთად მთელ საქართველოსაც ეტირება დედა, ანუ ჩვენც.
ჰოდა, დაფიქრდით. დასაწყისისათვის გაათავისუფლეთ უსამართლოდ დაპატიმრებული ხალხი; მერე მოიწვიეთ ევროპელ-ამერიკელები მედიატორებად და დაიწყეთ ოპოზიციასთან საუბარი, რომ საერთო, კოალიციური, გარდამავალი მთავრობა შეიქმნას. ეგ მთავრობა რამდენიმე წელიწადში მოამზადებს ნიადაგს ახალი არჩევნებისათვის და იმ არჩევნებზე უკვე პატიოსნად აირჩევს ხალხი საკუთარ წარმომადგენლებს. ამ გზას ალტერნატივა არ გააჩნია. ერთადერთია, თუ გადარჩენა გვსურს. ერთი ოჯახის წევრებს არ უყვართ ერთმანეთი ხშირად და არაფერია იმაში გასაკვირი, რომ ერთი ქვეყნის მოქალაქეებს ერთმანეთი არ გვეხატებოდეს გულზე. ათასი მიზეზი გვაქვს და გვექნება ამისათვის, მაგრამ ოჯახის არ იყოს, ერთმანეთს ისე გადაგვაბა განგებამ, რომ ვერ ვიარსებებთ ურთიერგაგების და პატივისცემის გარეშე.
ცუდი დროა. დიდი რყევები ელის მსოფლიოს; ბევრი რამ დაინგრევა, ბევრიც თავიდან აშენდება; ნუ გავწირავთ ნურც ჩვენს თავს და სამშობლოს დასანგრევად და დასაღუპად.

The post “მიმართვა „ქართული ოცნების“ მომხრე თანამემამულეებს” – ზურაბ გურული appeared first on .