“ოცნება” ახალი კანონით პარტიების აკრძალვას ამარტივებს

საკონსტიტუციოს სასამართლოს შეეძლება აკრძალოს პარტია, რომელსაც მის მიერ უკვე არაკონსტიტუციურად გამოცხადებული პარტიის იდენტურად მიიჩნევს.
ამას „ქართული ოცნების“ მიერ „ქართულ ოცნება“ „მოქალაქეთა პოლიტიკური გაერთიანებების შესახებ“ კანონში დაგეგმილი ცვლილება ითვალისწინებს.
კერძოდ, საკონსტიტუციო სასამართლოს შეეძლება „აკრძალოს პარტია, რომლის გაცხადებული მიზანი ან/და საქმიანობის არსი (მათ შორის, პერსონალური ან/და შესაბამის საარჩევნო კომისიაში წარდგენილი პარტიული სიის შემადგენლობა) არსებითად იმეორებს საქართველოს საკონსტიტუციო სასამართლოს მიერ აკრძალული პარტიის გაცხადებულ მიზანს ან/და საქმიანობის არსს (მათ შორის, პერსონალურ შემადგენლობას)“.
კანონპროექტის განმარტებით ბარათში აღნიშნულია, რომ პოლიტიკური პარტიის შექმნა და საქმიანობა აბსოლუტური უფლება არ არის და „სახელმწიფო უფლებამოსილია შეზღუდოს მოცემული ძირითადი უფლებები, თუ მათი გამოვლინება საფრთხეს უქმნის სახელმწიფოსა და დემოკრატიის ინტერესებს“.
აღნიშნულ ცვლილება „ოცნებას“ შემოაქვს იმ ფონზე, როცა ის აპირებს, რომ არაკონსტიტუციურად გამოაცხადოს „ნაციონალური მოძრაობა“ და ყველა ოპოზიციური პარტია, ვისაც ამ პარტიის მემკვიდრედ ჩათვლის. თუ „ოცნება“ აღნიშნულ განზრახვას სისრულეში მოიყვანს, დაგეგმილი საკანონმდებლო ცვლილებებით, არაკონსტიტუციურად გამოცხადებული პარტიების წარმომადგენლებს ახალი პარტიის შექმნასაც აუკრძალავს,
„საკონსტიტუციო სასამართლოს ექნება შესაძლებლობა განახორციელოს ეფექტიანი საკონსტიტუციო კონტროლი პოლიტიკური პარტიებზე, რომელთა მიზანია საქართველოს კონსტიტუციური წყობილების დამხობა ან ძალადობით შეცვლა, ქვეყნის დამოუკიდებლობის ხელყოფა, ტერიტორიული მთლიანობის დარღვევა ან რომელიც ეწევა ომის ან ძალადობის პროპაგანდას, აღვივებს ეროვნულ, ეთნიკურ, კუთხურ, რელიგიურ ან სოციალურ შუღლს. შესაბამისად, იმ პირებს, რომლებსაც აქვთ სურვილი კვლავ ზემოაღნიშნული პარტიების არსებითად მსგავსი ახალი პარტიები დააფუძნონ და კვლავ განაგრძონ არაკონსტიტუციური საქმიანობა, სასამართლო წესით აეკრძალებათ ასეთი ფიქციური პარტიების მეშვეობით მოქმედება“, – ნათქვამია განმარტებით ბარათში.