რა თანხას ხარჯავენ რაიონები დიდთოვლობით დაზარალებულთა საკვებით მომარაგებისთვის? (bm.ge)

21-26 თებერვალს მომხდარი დიდთოვლობის შედეგად დაზარალებული მოსახლეობისათვის დასავლეთ საქართველოს მუნიციპალიტეტების ნაწილი პირველადი მომსახურების პროდუქტებს ყიდულობს. ჯამური თანხა 293 990 ლარია.
ამ ეტაპზე საკვები პროდუქტების გამარტივებული შესყიდვა მხოლოდ სამ მუნიციპალიტეტს აქვს გამოცხადებული.
ოზურგეთის მუნიციპალიტეტი
ოზურგეთის მერია პირველადი დანიშნულების საკვების შესაძენად 261 034 ლარს იხდის. შესყიდვის საგანია შემდეგი პროდუქტები: შაქარი, ბურღულეული, ხორცის კონსერვები და პროდუქტები, ლობიო, ბარდა, წიწაკა, პომიდორი და სხვა ბოსტნეული, ძეხვი, მარცვლეული პროდუქტები, მცენარეული ზეთი,კულინარიული ზეთი, ფქვილი, პური, მარილი, შავი ჩაი, ბრინჯი და მაკარონი. თანხაში ასევე შედის, ტვირთის გადაზიდვის მომსახურება.
ტყიბულის მუნიციპალიტეტი
25 450 ლარად ტყიბულის მერია დიდთოვლობისგან დაზარალებულებისთვის სხვადასხვა საკვებ პროდუქტს შეიძენს. ჩამონათვალი ზუსტად გაწერილი არ არის. შესყიდვის დოკუმენტში წერია მხოლოდ ის, რომ მუნიციპალიტეტი იყიდის, პურს, ძეხვს და სხვა საკვებ პროდუქტებს.
“ტყიბულის მუნიციპალიტეტში 2025 წლის თებერვალში დაფიქსირდა ინტენსიური თოვა, რის შედეგადაც მუნიციპალიტეტის სოფლების მიმართულებით ჩაიკეტა საავტომობილო გზები. მცხოვრებლებს შეექმნათ პრობლემა პირველადი მოხმარების საგნებთან, კვების პროდუქტებთან და მედიკამენტებთან დაკავშირებით. შესაბამისად საჭირო გახდა დროული რეაგირება მოსახლეობის კვების პროდუქტებით უზრუნველყოფის მიზნით”.
სამტრედიის მუნიციპალიტეტი
საკვები პროდუქტების ჩამონათვალი, არც ამ შემთხვევაშია დაზუსტებული. შესყიდვის ობიექტია სხვადასხვა საკვები პროდუქტი და მშრალი პროდუქტები. გამოყოფილი თანხა კი, 7 506 ლარია.
შეგახსენებთ, ერთ კვირაზე მეტია აჭარაში, გურიასა და იმერეთში დიდთოვლობას ებრძვიან, დაზიანებულია საცხოვრებელი სახლები, საკომუნიკაციო ინფრასტრუქტურა, მოსახლეობის ნაწილი დახმარებას ითხოვს.
დასავლეთ საქართველოში სტიქიის სალიკვიდაციო სამუშაოებში ჩართული არიან მოხალისეები, მაშველები, თავდაცვის ძალები. ელექტროენერგიის შეფერხების აღმოფხვრისთვის “ენერგო პრო ჯორჯიას“ ჯგუფები საგანგებო რეჟიმში მუშაობენ.
სამთავრობო უწყებების ინფორმაციით, მოსახლეობას ჰუმანიტარულ დახმარებასთან ერთად, მედიკამენტები და პირველადი მოხმარების ნივთები მიეწოდება.
“გრძელდება გზის გაწმენდითი სამუშაოები. მუნიციპალიტეტის ყველა ადმინისტრაციულ ცენტრამდე გაწმენდილია გზები, მიმდინარეობს შიდა ცენტრალური გზების გაწმენდითი სამუშაოები. ამ ეტაპისთვის დარჩენილია 80 აბონენტი მუნიციპალიტეტის მასშტაბით, რომლებსაც არ მიეწოდება ელექტროენერგია და გაგრძელდება ხვალ სამუშაოები, რათა ეს გამოწვევაც აღმოიფხვრას. ასევე აქტიურად გრძელდება საკვები პროდუქტებისა და მედიკამენტები დარიგება, რომლის მარაგიც საკმაოდ დიდია ჩვენს მუნიციპალიტეტში. მოსახლეობის ყველა მოთხოვნა და გამოწვევა, როგორიც იქნება გზების მიმართულებით, ასევე საკვები პროდუქტებით თუ მედიკამენტების მიმართულებით, თავიდან ბოლომდე იქნება ჩვენი მხრიდან დაკმაყოფილებული“, – აცხადებს ლანჩხუთის მუნიციპალიტეტის მერი ალექსანდრე სარიშვილი.
ამის პარალელურად, ვანში და ქობულეთში მოქალაქეები აცხადებენ, რომ მათ პროდუქტების მომარაგების პრობლემა აქვთ, რადგან უბნებამდე მისასვლელი გზები კვლავ ჩაკეტილია. გამგეობაში კი ამბობენ, რომ შესაბამისი ტექნიკის არ ქონის გამო, გზების გაწმენდა ვერ მოხდება.
წყარო: bm.ge