რაგბი ევროპა | პირველი თბილისური ფინალისთვის მზადება დაიწყო

რუმინეთთან 43:5 გამარჯვების შემდეგ, ბორჯღალოსნებმა ერთი კვირა დაისვენეს და დღეიდან, 34-კაციანი გაფართოებული შემადგენლობით 2025 წლის რაგბი ევროპის ჩემპიონატისთვის მზადებას შეუდგნენ.

სატიტულო შეხვედრას 16 მარტს 16 საათზე, თბილისის, „მიხეილ მესხის“ სახელობის სტადიონი უმასპინძლებს და გამარჯვების შემთხვევაში საქართველო მიჯრით მერვე, ჯამში კი მე-17 ტიტულს შეუტევს.

რაგბი ევროპის ჩემპიონატი 2000 წლიდან იმართება და მას თავდაპირველად ერთა თასი ეწოდებოდა, ამჟამინდელი სახელწოდება კი 2015 წლიდან მიიღო. ტურნირის ფორმატი რამდენჯერმე შეიცვალა. 2003-2008 წლებში გამარჯვებული ორი წლის ჯამით ვლინდებოდა, რის გამოც განვლილ 25 წელიწადში თასი 22-ჯერ გათამაშდა. 2010 წლის ჩათვლით, საქართველომ ჩემპიონობა 3-ჯერ მოიპოვა, რუმინეთმა 4-ჯერ, ერთხელ კი ამ გუნდების დავაში პორტუგალია ჩაერია (2003-2004). 2011 წლიდან მოყოლებული, საქართველომ პირველი ადგილი ერთადერთხელ, 2017 წელს ვერ დაიკავა (გაიმარჯვა რუმინეთმა), მას შემდეგ კი ევროპულმა თასმა თბილისში დაიდო ბინა.

2023 წლიდან ჩემპიონატის მონაწილეთა რაოდენობა 6-იდან 8-მდე გაიზარდა, გუნდები ორ ჯგუფად გაიყო და დაინერგა ნახევარფინალისა და ფინალის სისტემა. წინა ორ ფინალში პორტუგალია დავამარცხეთ - ჯერ ესპანეთში, ბადახოსში, მერე კი საფრანგეთში, პარიზში. ამრიგად, თბილისი რაგბი ევროპის ჩემპიონატის ფინალს წელს პირველად მასპინძლობს და მეტოქეც განსხვავებული ეყოლება, რადგან ნახევარფინალში პორტუგალიას ესპანეთმა 42:31 მოუგო.

აქვე ისიც ვთქვათ, რომ ბორჯღალოსნები ესპანეთს წელს ერთხელ უკვე ეთამაშნენ და ჯგუფური ეტაპის დასკვნით შეხვედრაში მადრიდში, 62:32 დაამარცხეს.

ბორჯღალოსნების გაფართოებული შემადგენლობა 2025 წლის რაგბი ევროპის ჩემპიონატის ფინალისთვის:

პირველი ხაზი: ნიკა აბულაძე (მონპელიე), გიორგი ახალაძე (კლერმონი), გიორგი მამაიაშვილი (გრენობლი); ვანო კარკაძე (მონპელიე), ლუკა ნიორაძე (ორიაკი), ირაკლი ქვათაძე (შავი ლომი); ირაკლი აფციაური (ლიონი), ლუკა ჯაფარიძე (მონპელიე), ალექსანდრე ქუნთელია (ლა როშელი);

მეორე ხაზი: მიხეილ ბაბუნაშვილი (შავი ლომი), ლადო ჩაჩანიძე (შავი ლომი), გურამ ღანიაშვილი (შავი ლომი);

მესამე ხაზი: ლუკა ივანიშვილი (შავი ლომი), ბექა საღინაძე (ლიონი), ბექა გორგაძე (პო), გიორგი ცუცქირიძე (შავი ლომი), ილია სპანდერაშვილი (ვალანსი), ბექა შვანგირაძე (ლიონი), თორნიკე ჯალაღონია (პროვანსი);

ღერძი: ვასილ ლობჟანიძე (ოიონა), გელა აფრასიძე (პერპინიანი), მიხეილ ალანია (ორიაკი); ლუკა მატკავა (შავი ლომი), ლუკა ცირეკიძე (შავი ლომი);

ცენტრი: გიორგი კვესელაძე (გრენობლი), დემურ თაფლაძე (შავი ლომი), თორნიკე კახოიძე (შავი ლომი), გიორგი შველიძე (ბრივი);

ფრთა: სანდრო თოდუა (შავი ლომი), შალვა აფციაური (შავი ლომი), აკაკი ტაბუცაძე (შავი ლომი), ამირან შვანგირაძე (შავი ლომი);

ფულბეკი: დავით ნინიაშვილი (ლიონი), დაჩი პაპუნაშვილი (ორიაკი).

RUGBY.GE