სენსაციურ ფინალში მოგებული მატჩი – შერმადინის ტენერიფემ მურსიაში ბოლო წამზე იმარჯვა

საოცარ ბრძოლაში ფანტასტიკურად მოგებული მატჩი. გიორგი შერმადინის ტენერიფემ სტუმრად, მურსიასთან 78:77 იმარჯვა ისე, რომ ძირითადი დროის დასრულებამდე 0.8 წამით ადრე 2 ქულით აგებდა. ასეთ სიტუაციაში მყოფი გუნდის მოგება დიდი ვერაფერი ამბავია, ასეთები ძალიან ხშირად ხდება, თუმცა ეს ის შემთხვევაა, როცა 2 ქულას აგებ, 0.8 წამი რჩება და მეტოქე საჯარიმოს ესვრის.

თუ როგორ მოხდა ყველაფერი, წარმოდგენილ ვიდეოში ნახავთ, აქ კი ვიტყვით, რომ მურსიელმა საჯარიმო სროლის შემდეგ ხაზი ნაადრევად გადაკვეთა და მოხდა შემდეგი რამ: დრო არ ჩაირთო, რადგან დარღვევა დაფიქსირდა და ბურთი დაცვაში მყოფ გუნდს, ამ შემთხვევაში ტენერიფეს გადაეცა. მერე უკვე ყველაფერი კლასიკურად მოხდა: წუთშესვენება, ბურთის გამოსატანად ცხადია მეტოქის ნახევრის არჩევა და … დევიდ კრამერმა შეასრულა. მიღებული ბურთი მყისიერად მურსიელთა ფარისკენ გაუშვა, რომელიც კალათში ჩაეშვა და ტენერიფლთა გამარჯვებაც დაფიქსირდა.

ამ ფანტასტიკური ფინალის მქონე მატჩში შერმადინმა არასრული 22 წუთი ითამაშა და 9 ქულა, 5 მოხსნა და 1 პასი დააგროვა. სტატისტიკა ერთი შეხედვით არ ბრწყინავს, თუმცა ქართველი ცენტრის მონაგარი ტენერიფელთაგან შედეგიანობით მეორე იყო. შერმადინმა თამაშიდან ბურთი არ ააცილა: 3-დან 3 ორიანი და 4-დან 3 საჯარიმო ჩააგდო, რამაც მისი სარგებლიანობის ინდექსი გვარიანად, 18-ამდე აქაჩა. ამ მაჩვენებლით კი საუკეთესო მარსელინიო ჰუერტასი იყო, რომელმაც 28 ქულა და 7 პასი მიითვალა.

15 მოგებითა და 5 მარცხით ტენერიფე მე-2 ადგილზე მყოფ უნიკახას გაუთანაბრდა. ესპანეთის ჩემპიონატში 1 მარტამდე შესვენება იქნება. მანამდე ესპანეთის სამეფო თასის თამაშები და სანაკრებო ფანჯარაა. შერმადინი თასის თამაშებს რომ დაასრულებს, საქართველოს ნაკრებში გამოემგზავრება.

GBF.GE