“ტარიფების შედეგად ბევრ ქვეყანას აშშ-ის ბაზარზე წვდომა ურთულდება” – TBC CAPITAL

შეერთებული შტატების პრეზიდენტმა დონალდ ტრამპმა 2 აპრილს წარადგინა თავისი ადმინისტრაციის ახალი სატარიფო პოლიტიკა – ის აწესებს აშშ-ში უცხო სახელმწიფოებიდან იმპორტზე, სულ მცირე, 10%-იან ტარიფებს, ხოლო ზოგიერთ შემთხვევაში სატარიფო განაკვეთი 50%-საც კი აღწევს. მინიმალური, 10% ტარიფი შეეხო საქართველოსაც.
საქართველოზე ტარიფების გავლენაზე TBC CAPITAL-ი კვლევას აქვეყნებს.
რას გულისხმობს ამერიკის საპასუხო სატარიფო პოლიტიკა?

აშშ-ის ახალი საპასუხო სატარიფო პოლიტიკა, აშშ-ის ადმინისტრაციის თანახმად, მნიშვნელოვნად გაზრდილმა სავაჭრო დეფიციტმა განაპირობა. გარდა ამისა, აშშ-ის ადმინისტრაცია აღნიშნავს, რომ მათ მიერ დაწესებული იმპორტის გადასახადები, მნიშვნელოვნად ჩამორჩება სავაჭრო პარტნიორების მიერ დაწესებულ ტარიფებს. ეს კი აშშ-ის ადგილობრივ წარმოებას ანელებს. ახალი საპასუხო სატარიფო პოლიტიკით კი ადმინისტრაცია ამ გამოწვევების გადაჭრას გეგმავს.

ახალი სატარიფო პოლიტიკის ფარგლებში, ყველა სავაჭრო პარტნიორი ქვეყნისთვის აქამდე დაწესებულ იმპორტის გადასახადს საბაზისოდ დაემატა საქონლის ღირებულების 10% (საბაზისო ტარიფი). თუმცა, დაახლოებით სამოცამდე ქვეყნისთვის იმპორტის გადასახადი აღემატება საბაზისო დანამატს.

პრეზიდენტის განკარგულება, მოიცავს გამონაკლისი პროდუქტების სიასაც, რომელსაც დამატებითი იმპორტის გადასახადი არ შეეხება. დამატებითი 10%-იანი საბაზისო იმპორტის გადასახადი ძალაში შედის 2025 წლის 5 აპრილიდან.