ადამიანები უამრავ არასაჭირო წამალს იღებენ, რასაც გამართლება არ აქვს, ეს დანაშაულია – ინფექციონისტი

„ჩვენთან ადამიანები უამრავ არასაჭირო წამალს იღებენ – ამას გამართლება არ აქვს, დანაშაულია,“ – ამის შესახებ ინფექციონისტი მაია ბუწაშვილი, სოციალურ ქსელში წერს.
მისი განმარტებით, ექიმების მიერ პაციენტისთვის საჭიროზე მეტი წამლის გამოწერის პრობლემაზე უკვე წლებია საუბრობენ საქართველოში.
„არაერთხელ დამიწერია იმაზე, რომ ჩვენთან ადამიანები უამრავ არასაჭირო წამალს იღებენ. ამის ბევრი მიზეზი არსებობს და ერთ-ერთი მათგანია ის, რომ აფთიაქში შესული ადამიანი, მაგალითად, ანტიბიოტიკს თუ ყიდულობს, ფარმაცევტი იქვე ურჩევს, რომ სჭირდება ასევე “კუჭის დამცავი” და იქვე პრობიოტიკსაც შესთავაზებს. თან რეკომენდაციას მიაყოლებს, რომ “ანტიბიოტიკთან ერთად საჭიროა”. ამას არავითარი გამართლება არ გააჩნია და ჩემი აზრით, დანაშაულია,“- წერს ბუწაშვილი.
შეგახსენებთ, პოლიპრაგმაზიაზე, ანუ, ექიმების მიერ პაციენტისთვის საჭიროზე მეტი წამლის გამოწერის პრობლემაზე უკვე წლებია საუბრობენ საქართველოში. შარშან ჯანდაცვის ყოფილი მინისტრი ზურაბ აზარაშვილი აცხადებდა, რომ მუშაობდნენ ე.წ. sunshine Act-ის დანერგვაზე, რაც ფარმაცევტულ კომპანიებს შეუზღუდავდათ კლინიკებში მარკეტინგულ აქტივობებს, ასევე, ფარმაცევტული კომპანიების მხრიდან ექიმისთვის გადახდილი ყოველი ლარი დადეკლარირდება შესაბამის საჯარო სისტემაში, თუმცა, ამ საკითხთან დაკავშირებით ჯერ რამე ხელშესახები წინსვლა არ გვაქვს.