„რუსული საწვავი, ხე-ტყე თუ სხვა პროდუქტი რაც უფრო მალე დაუბრუნდება მსოფლიო ბაზარს, მსოფლიო ეკონომიკა უფრო სტაბილური იქნება“ – ვახტანგ იობაშვილი

კონკურენციის და მომხმარებლის დაცვის სააგენტოს საწვავის ბაზრის მონიტორინგის 2024 წლის შუალედური ანგარიშის მიხედვით, ამ ეტაპზე ბაზარი მეტწილად კონკურენტულია, თუმცა უწყების შეფასებით, გასულ წელს ფიქსირდებოდა შემთხვევები, როდესაც საწვავის თვითღირებულების შემცირება უშუალოდ ბენზინგასამართსადგურებზე დაგვიანებით აისახებოდა. ამასთან, ანგარიშის თანახმად, მართალია, საქართველოსთვის საწვავის იმპორტიორი მთავარი ქვეყანა კვლავ რუსეთია, თუმცა მისი წილი მცირდება.
„ნავთობპროდუქტების იმპორტიორთა კავშირის” თავმჯდომარის, ვახტანგ იობაშვილის განმარტებით, ევროპულ ბაზარზე დაწყებული ფასდაკლება ქართულ ბაზარზე მყისიერად ვერ აისახება, რადგან საქართველოში ნავთობპროდუქტების ექსპორტიორებს საწვავის მარაგები სხვა ფასად აქვთ შეძენილი.
რაც შეეხება ხარისხს, იობაშვილი „კომერსანტთან“ ამბობს, რომ ევროპული და რუსული საწვავი, ორივე „ევრო 5“-ის სტანდარტს აკმაყოფილებს. სხვაობა მხოლოდ ტრანსპორტირებაა.
„ევროპულ და რუსულ საწვავს შორის, ხარისხით დიდი სხვაობა არ არის, ორივე „ევრო 5“-ის სტანდარტს აკმაყოფილებს – შემადგენლობაც იდენტურია.
განსხვავება მხოლოდ ისაა, რომ რუსული საწვავი ვაგონებით შემოდის, ბულგარული და ევროპული კი ზღვით. ამ სახის იმპორტს თავისი სიძნელეები აქვს, საზღვაო ტრანსპორტირება უფრო ძვირი ჯდება, ამიტომაც საწვავის იმპორტიორები უპირატესობას რუსულს ანიჭებენ. მოწოდების სიმარტივის გარდა, სხვა განსხვავება ამ საწვავებს შორის არ არის.
მაგალითად, ვერავინ იტყვის, რომ „რომპეტროლის“ საწვავი რომელიმეზე ნაკლებია. ჩვენ საწვავი ასევე შემოგვაქვს საბერძნეთიდან და ბელორუსიიდან, ამიტომ დარწმუნებული ვარ, რომ საქართველოს საწვავის არც დეფიციტი ემუქრება და არც რამე მნიშვნელოვანი ფასნამატი.
აღსანიშნავია, რომ ბოლო პერიოდია, რუსული კომპანიები ჩვენ საწვავს არანაირი ფასდაკლებით არ გვაძლევენ, რომ რამე დიდი სხვაობა ყოფილიყო ფასის მხრივ, ევროპულ და რუსულ საწვავს შორის.
არითმიები ნავთობბაზარზე ყოველთვის არის, მაგრამ არც ისეთი, რომ დიდი მნიშვნელობა მიენიჭოს. ყველა ნავთობკომპანიას თავისი მარაგები აქვს, სადაც სხვადასხვა ფასად შეძენილ ნავთობს ინახავენ.
ქართული სანავთობო ბაზარი დიფერენცირებულია, ასე რომ გამოწვევებს არ ველოდებით.
არ მინდა ისე გამოვიდეს, თითქოს, რუსული საწვავი ან არ მოგვწონს, ან ვინმე გვიკრძალავს მის შემოტანას. ქართულ კომპანიებს რუსული პროდუქციის შემოტანას არავინ უკრძალავს, პირიქით, რუსეთს ძალიან კარგი საწვავი აქვს. საერთოდ, რუსული საწვავი, ხე-ტყე თუ სხვა პროდუქტი რაც უფრო მალე დაუბრუნდება მსოფლიო ბაზარს, მსოფლიო ეკონომიკა უფრო სტაბილური იქნება“,- აღნიშნა ვახტანგ იობაშვილმა „კომერსანტთან“ ინტერვიუში.