The Telegraph-მა გამოაქვეყნა პუტინის მოთხოვნების სია შეერთებულ შტატებთან მოლაპარაკებებში

როდესაც ამერიკელი და რუსი ოფიციალური პირები დაიწყებენ მოლაპარაკებებს უკრაინაში ომის დასასრულებლად, თითოეულ მათგანს ექნება მოთხოვნების სია. და, როგორც The Telegraph აღნიშნავს, მაშინ, როცა დონალდ ტრამპის უფროსი დიპლომატებისგან შემდგარი გუნდის მიზანია ომის დასრულება, ვლადიმერ პუტინისთვის მოლაპარაკებები საუდის არაბეთში წარმოადგენს უნიკალურ შესაძლებლობას გააფართოოს მისი მოთხოვნების სია.

როგორც მედია წერს, პუტინმა ადრე მოითხოვა, რომ უკრაინას უნდა გაეყვანა თავისი ჯარები რუსეთის მიერ ანექსირებული ოთხი რეგიონიდან და უარი ეთქვა ნატოში გაწევრიანების სურვილზე. ამავდროულად, პუტინი იურიდიულად მოითხოვს, რომ უკრაინას არასოდეს მიეცეს ალიანსში გაწევრიანების უფლება.

მან, ასევე, დაჟინებით მოითხოვა, რომ უკრაინამ უნდა შეამციროს თავისი სამხედრო პოტენციალი, რათა არ შეუქმნას საფრთხე რუსეთს, რამაც შეიძლება გამოიწვიოს შეზღუდვები შორი მოქმედების რაკეტებზე, მძიმე იარაღზე და დასავლეთის სამხედრო მხარდაჭერაზე.

გარდა ამისა, ნათქვამია რომ რუსეთმა, შესაძლოა, ასევე მოითხოვოს ნატოს ძალების შემცირება ან სრული გაყვანა პოლონეთიდან, ბალტიისპირეთის ქვეყნებიდან (ესტონეთი, ლატვია, ლიეტუვა) და რუმინეთიდან.

როგორც გამოცემა წერს, პუტინი სავარაუდოდ შეეცდება მკაცრი ეკონომიკური სანქციების მოხსნას, რამაც გამოიწვია რუბლის კურსის დაცემა და ინფლაციის ზრდა. ეს მოთხოვნები შეიძლება მოიცავდეს ენერგიის საექსპორტო შეთანხმებებს, მათ შორის Nord Stream 1 და 2 მილსადენების განახლებას, რათა განაახლონ გაზის მიყიდვა ევროპაში, რაც დაასტაბილურებს რუსეთის ეკონომიკას.