ანჯეი დუდა კონსტიტუციაში ცვლილებების შეტანის ინიციატივით გამოვიდა, რომელიც თავდაცვისთვის მშპ-ის, სულ მცირე, 4%-ის გამოყოფას ითვალისწინებს

პოლონეთის პრეზიდენტი ანჯეი დუდა კონსტიტუციაში ცვლილებების შეტანის ინიციატივით გამოვიდა, რომელიც თავდაცვისთვის მშპ-ის, სულ მცირე, 4%-ის გამოყოფას ითვალისწინებს.
ანჯეი დუდამ სეიმის თავმჯდომარეს შესაბამისი პროექტი გადასცა.
„ყველაზე მნიშვნელოვანია, რომ ჩვენი უსაფრთხოება მუდმივად ძლიერდებოდეს. ამიტომ, მიუხედავად იმისა, რომ დღეს პოლიტიკურ არენაზე კონსენსუსი გვაქვს, მიმაჩნია, რომ იგი სამართლებრივი კუთხითაც უნდა გაძლიერდეს. ჩვენ ვსაუბრობთ, მუდმივ კონტაქტში ვართ და კონსულტაციებს გავდივართ მოკავშირეებთან. ჩვენ პოლონეთზე ვზრუნავთ“, – განაცხადა პოლონეთის პრეზიდენტმა სეიმის თავმჯდომარესთან, შიმონ გოლოვნიასთან შეხვედრის შემდეგ.
დუდას თქმით, ეს უკიდურესად მნიშვნელოვანი გზავნილია. როგორც პოლონეთის პრეზიდენტმა აღნიშნა, იმის მიუხედავად, რითი დასრულდება უკრაინის წინააღმდეგ რუსეთის აგრესია, „ყველაზე მნიშვნელოვანია, მშვიდობა იყოს მუდმივი და სტაბილური“.
„იმისათვის, რომ რუსეთმა აღარავის შეუტიოს და, უპირველეს ყოვლისა, ჩვენ არ შემოგვიტიოს, მნიშვნელოვანია ორი ფაქტორი: პირველ რიგში, ეს მშვიდობა სტაბილური უნდა იყოს, ანუ მას უნდა ჰქონდეს თავისი ძლიერი გარანტიები; მეორე, ჩვენ უნდა შევქმნათ ძლიერი გარანტიები საკუთარი თავისთვის; მესამე, ჩვენ გვჭირდება ყოვლისმომცველი მუდმივი გარანტიები მოკავშირეების მხრიდან“, – განაცხადა დუდამ.
წყარო: 1tv.ge