„დეკემბრის შემდეგ უნცია ოქროს ფასი 210$-ით გაიზარდა…სამომავლოდ, გაიაფების მოლოდინი არ გვაქვს“ – „ზარაფხანა“

ოქროს ფასმა კიდევ ერთი ისტორიული რეკორდი დაამყარა და ზრდას განაგრძობს.
1 უნცია მეტალის ღირებულებამ 2,900 დოლარს მიაღწია, რაც ერთწლიან პერიოდში 43%-ით გაზრდილი მაჩვენებელია.
გლობალურ ბაზარზე ფასის ზრდა ქართულ ბაზარზეც აისახა. მომხმარებლები ამბობენ, რომ მასშტაბურად გაზრდილი ფასის გამო, ოქროს შეძენას ვეღარ ახერხებენ.
საიუველირო სახლ “ზარაფხანას” აღმასრულებელი დირექტორი, თორნიკე სამხარაძე „კომერსანტთან“ ინტერვიუში ადასტურებს, რომ ფასები კრიტიკულად გაზრდილია. მისი თქმით, უნცია მეტალზე ფასნამატი ბოლო 1 თვეში 210$-ია, რაც კოვიდპანდემიურ ზრდასაც კი აჭარბებს.
რაც შეეხება საქართველოს, ლარის კურსის მერყეობა გლობალურ ფაქტორებთან ერთად, ადგილობრივ ბაზარზე ფასებს კიდევ უფრო ზრდის. მსოფლიოში მიმდინარე პოლიტიკური ფონის გათვალისწინებით, ინვესტორები ფასების შემცირებას არც სამომავლოდ ვარაუდობენ.
„ოქროს ფასი დეკემბრის შემდეგ დაახლოებით 210$-ით გაიზარდა. ერთი უნციის ფასი, ბოლო დღეებია, 2850-იდან 2910 დოლარის ფარგლებშია. ეს ფასები ძალიან ძვირია, ისტორიულად რეკორდული მაჩვენებელია.
რაც შეეხება „ზარაფხანას“ ეს ჩვენთვის დიდი გამოწვევაა, იქიდან გამომდინარე, რომ ოქრო ჩვენთვის ძირითადი ნედლეულია. ჩვენ, როგორც მწარმოებლები ოქროს ფასის ცვლილებაზე მეტად ვართ დამოკიდებული. ჩვენთვის სტაბილურობა უმნიშვნელოვანესია, ხოლო როცა ფასები მისაღებია, მომხმარებელს უკეთეს შეთავაზებას ვუკეთებთ, ასევე გვაქვს საშუალება მომხმარებელს დაბალი საფასო კატეგორიის პროდუქტი შევთავაზოთ.
ოქრო ფინანსების ინვესტირების ყველაზე საიმედო ადგილია, აქედან გამომდინარე, მსოფლიოში მიმდინარე პროცესები ფასს კიდევ უფრო ზრდის. სიღრმისეულად რომ გავაანალიზოთ, ოქროს ფასის ზრდა პირველად კოვიდპანდემიის დროს მოხდა, პირველი რეკორდული ფასი- 1900 დოლარი სწორედ მაშინ დაფიქსირდა. პანდემიის შემდეგ კი ოქროს ფასი საკმაოდ კარგად შემცირდა. საქართველოში ოქროს ფასზე ლარის კურსიც საკმაოდ მნიშვნელოვნად მოქმედებს.
ოქროს ფასის ზრდა ზოგადად, ეკონომიკურ პროცესებს უკავშირდება.
დღესაც კი, ინვესტორებს არ აქვთ მოლოდინი, რომ ფასების მხრივ რამე სასიკეთოდ შეიცვლება. ჩვენ ფასის ასეთ მასშტაბურ მატებას არ მოველოდით, ამიტომ ოქროს გაიაფების მოლოდინი სამომავლოდ არ გვაქვს“,- აღნიშნა თორნიკე სამხარაძემ.