დეტალური განხილვა – ქართველი კალათბურთელების შეფასება

28 აგვისტო ქართული სპორტის ისტორიაში მორიგი ოქროს ასოებით შევიდა. ევრობასკეტ 2025-ის პირველ შეხვედრაში საქართველოს ნაკრებმა ესპანეთი 83:69 დაამარცხა. არ დაგავიწყდეთ, ეს ის ესპანეთია სანაკრებო შორის გასულ ევროპირველობაზე გამარჯვება რომ იზეიმა.
ბიჭებმა შესანიშნავი შეხვედრა ჩაატარეს, გაგვახარეს როგორც შეტევაში ისე დაცვაში (ამ უკანასკნელში განსაკუთრებით). გამოსარჩევია გოგა ბითაძისა და სანდრო მამუკელაშვილის ბრწყინვალე შეხვედრა, ახალგაზრდა სპორტსმენებმა შესაძლებლობის ზღვარზე ითამაშეს და ისტორიულ გამარჯვებაში ლომის წვლილიც შეიტანეს.
უმჯობესია მივყვეთ სათითაოდ:
სანდრო მამუკელაშვილი – 19 ქულა, 7 მოხსნა, 6 შედეგიანი გადაცემა, 1 ჩაჭრა დააგროვა და მატჩის საუკეთესო კალათბურთელის ჯილდოც დაიმსახურა. “ტორონტო რეპტორსის” კალათბურთელმა პარკეტზე 31 წუთი დაჰყო და მთელი ამ დროის განმავლობაში იშვიათი გამონაკლისის გარდა გუნდს უძღვებოდა. ტრადიციულად დაუცველი იყო ორი ნაბიჯი და რაც ყველაზე მეტად გვახარებს გადაცემების რაოდენობა (6! მატჩში ყველაზე მეტი). სანდრო მოედანზე უპირატესობას ქმნიდა, წარმატებით უტევდა პერიმეტრიდანაც, რის ხარჯზეც მეტოქეს პერიმეტრის რადიუსთან ხაზის ამოწევა უწევდა, ეს ყოველივე კი ჩვენს მაღლებს სივრცეს უხსნიდა. სოციალურ ქსელში ხშირად იწერებოდა, რომ სანდროზე არანაირი გათამაშება არ იხატებოდა, მსგავსი კალიბრის კალათბურთელს არ ვუქმნიდით კომფორტსა და არ ვაძლევდით თავის გამოჩენის საშუალებას, თუმცა ჯიკიჩმა ჯოკერი უშუალოდ მატჩის მსვლელობისასვე გამოაჩინა.
გოგა ბითაძე – 15 ქულა, 5 მოხსნა (4 მეტოქის ფარზე), 2 შედეგიანი გადაცემა და 1 ჩაჭრა. ქართველმა ცენტრმა შესანიშნავი შეხვედრა ჩაატარა, როგორც ყოველთვის ფარს კარგად იცავდა, რითაც გასული ევრობასკეტის საუკეთესო კალათბურთელს, ვილი ერნანგომესს სათამაშო არეალი შეუზღუდა – 8 ქულა, 5 მოხსნა და 2 ჩაჭრა დააგროვა, რეალურად ალდამასთან ერტად მთავარი საფრთხე სწორედ “ბარსელონას” ცენტრისგან მოდიოდა. გოგამ მოედანზე 23 წუთი დაჰყო, გარკვეულწილად ეს ყოველივე ზედმეტმა პერსონალურმა ჯარიმებმა გამოიწვია. უნდა ითქვას, რომ “ორლანდო მეჯიქის” ცენტრისთვის ეს კონკრეტული პუნქტი პრობლემა იყო და პრობლემადვე რჩება, თუმცა ქართველი მუშაობს ამ საკითხზე და ყველაფერი გამოსწორდება. მე-4 მეოთხედში, როდესაც ნაკრებს გაუჭირდა, ლიდერობა ბითაძემ ითავა, 2 სამქულიანი ჩააგდო, ულამაზესი ალეუპი დააგვირგვინა და დარბაზს ის მუხტი შესძინა, რომელმაც ბიჭები ერთიორად დამუხტა.
თორნიკე შენგელია – 13 ქულა, 2 მოხსნა, 2 შედეგიანი გადაცემა, 1 დაფარება. კაპიტანის ფაქტორი მოედანზე ბევრ რაიმეს ცვლის და როცა შენი ლიდერი შენგელიასნაირი თავგანწირული მოთამაშეა, შენ უკან დასახევი გზა მოჭრილი გაქვს. მოგეხსენებათ, თორნიკე ნაკრებს ყველაზე ბოლოს შეუერთდა, “ბარსელონაში” გადასვლის შემდეგ გულთან დაკავშირებით პრობლემები შეექმნა, ექიმებთან კონსულტაციები გაიარა და ესპანეთს 3 ვარჯიშ ჩატარებული შეხვდა. არვიცოდით შეძლებდა თუ არა თამაშს, გამოვიდა, 20 წუთი ითამაშა და მოედანზე როგორც ჩვევია ყველაფერი გაიღო, ქმნიდა სივრცეებს, იყო საიმედობის გარანტი, პარკეტის ორივე მხარეს თანაბრად იხარჯებოდა და მატჩის ბოლოს გულითაც იცინოდა. თვითონ ყველაზე ამაყი იყო, რადგან მისმა ბიჭებმა თითქოს და “რუბიკონი” გადალახეს. ზოგადად, ლიდერის ფაქტორი გუნდის წარმატების სიმბოლოა, თორნიკე კი ჩვენი ნაკრებისთვის საუკეთესო მეომარია.
კამარ ბოლდვინი – 12 ქულა, 4 მოხსნა, 3 შედეგიანი გადაცემა. ამხანაგური შეხვედრების შემდეგ როგორც ნაკრების ისე ლეგიონერის მიმართ დიდი კრიტიკა იყო, თითქოს და დონით ვერ შეესაბამებოდა ჩვენს ნაკრებს, თუმცა ერთი რამ ნათელია, კამარი მაღალი დონის კალათბურთელია, უბრალოდ გვერდით სჭირდება კალათბურთელები, რომლებიც სივრცეს შეუქმნიან, მისი ბურთის ტარება და ორი ნაბიჯი კი კარგი იარაღია. დღეს ბოლდვინი პარკეტის ორივე მხარეს კარგი იყო, მაინც ვთქვათ, განსაკუთრებით დაცვაში, რატი ანდრონიკაშვილთან ერთად ესპანელთა ერთ-ერთ ლიდერს, ბრიზუელას გატოკების საშუალება არ მისცა, აქტიურ დაცვას თამაშობდა და აზღვევდა თანაგუნდელებს. ულამაზესი იყო გოგა ბითაძესთან გათამაშებული ალეუპი და რა თქმა უნდა, მატჩის ბოლო წამზე ჩაგდებული სამქულიანი, პერიმეტრიდან შეტევა მთავარი იარაღი ნამდვილად არარის, მაგალითვისთვის, ტედ მაკფადენი გაცილებით კარგად ისროდა სამქულიანს, თუმცა ბოლდვინის დაცვითი უნარები, ბურთის გათამაშება და მოედნის ხედვა ჩვენი ნაკრების სქემაში კარგად ჯდება.
დუდა სანაძე – 11 ქულა, 4 მოხსნა, 2 შედეგიანი გადაცემა და 2 ჩაჭრა. როდესაც შენი სნაიპერი კარგად ისვრის, ყველაფერი შედარებით მარტივია. შეხვედრის პირველ ტაიმში ჩაგდებული 11 ქულით დუდა კომფორტულ ჰანდიკაპს გვიქმნიდა. რა თქმა უნდა, სრული მონდომებით ითამაშა დაცვაშიც და ამასთან ერთად მნიშვენლოვანი შედეგიანი გადაცემები და ჩაჭრები განახორციელა. არასტაბილური თამაშიდან გამომდინარე სანაძემ დღეს გაგვახარა და დიდი როლიც შეიტანა გამარჯვებაში.
ბექა ბურჯანაძე – 7 ქულა, 7 მოხსნა, 1 შედეგიანი გადაცემა. სათადარიგო სკამი დეს ქულებით ვერ დაიტვირთა, თუმცა ბრძოლისა და ჟინის ხარჯზე მაინც სოლიდური დრო ითამაშეს. მაგალითად, ბექამ პარკეტზე 21 წუთი დაჰყო და დაკისრებულ მოვალეობას თავი კარგადაც გაართვა. ზოგადად, “შვიდიანი” პარკეტზე ყოველთვის იბრძვის, თუმცა დღეს აშკარად მონდომება ეტყობოდა, 7 მოხსნიდან 3 მეტოქის ფარზე იყო, 3-დან 2-ში ჰაერშივე დაამატა და 2-2 ქულა მოუტანა ნაკრებს. რად ღირს პარკეტზე გასრიალება, როდესაც ბურთისთვის ბრძოლა მიდიოდა, ბურჯანაძის მონდომება და ფარზე ბრძოლა სათადარიგო სკამიდან ნაკრებს ძალიან დაეხმარა, რა თქმა უნდა, ნათამაშები დროის გარკვეული ნაწილი თოკოს გულის პრობლემებს ეკუთვნის, თუმცა შეგვიძლია ვთქვათ, რომ ბექამ დაკისრებულ მოვალეობებს თავი კარგად გაართვა.
გიორგი შერმადინი – 4 ქულა, 5 მოხსნა, 1 შედეგიანი გადაცემა, 1 დაფარება. სამწუხაროა, მაგრამ რეალობა ასეთია, გიორგი ნაკრებთან ერთად ბოლო ევრობასკეტს თამაშობს. მონდომება არასდროს აკლდა, თუმცა როდესაც უყურებ 36 წლის ცენტრი რა მონდომებით იბრძვის სიამაყის შეგრძნება ერთიორად გემატება. პარკეტზე 15 წუთი გაატარა, გოგას დასვენების შესაძლებობა მისცა, მნიშვნელოვანი მოხსნები დააგროვა და ნაკისრი ვალდებულებები პირნათლად შეასრულა.
რატი ანდრონიკაშვილი – 2 ქულა, 4 მოხსნა, 2 შედეგიანი გადაცემა, 1 ჩაჭრა. რატისთვის დაბალქულიანი მატჩი იყო, თუმცა ტრადიციულად დაცვაში გაისარჯა, პარკეტზე გატარებულ 20 წუთში, როგორც აღვნიშნე, ბრიზუელას არ მოშორდა და აქტიურად, ჯარიმის ზღვარზე აგრესიული დაცვა ითამაშა. ანდრონიკაშვილისნაირი დამცველის ყოლა გუნდში ფუფუნებაა, დაუღლელი, კარგი მოედნის ხედვით და თუ მოინდომებს და საჭიროება დადგება კარგი მექულეც.
გიორგი ოჩხიკიძემ და კახა ჯინჭარაძემ პარკეტზე 4 და 2 წუთი დაჰყვეს, ჯიკიჩს მათი გამოყენება არ დასჭირდათ.
რაც შეეხება ჩვენს მთავარ მწვრთნელს, ალექსანდრ ჯიკიჩს, დღეს გამოჩნდა თუ რატომაა უმაღლესი დონის მწვრთნელი. იდეალურად დაბალანსებული გუნდი, შესანისნავი პირველი ხუთეული, არათუ დაცვა, ჩაკეტილობა და ფარქვეშ “ძიძგილაობა”, არამედ ბიჭებს აგრესია, პერიმეტრიდან შეტევა და ჯარიმის ზღვარზე დაცვა დაავალა. იდეალურად გამოიყენა თითოეული კალათბურთელის შესაძლებლობები და ამასთან ერთად სწორად გადაანაწილა დრო.
ბოლოს კი მინდა გითხრათ, რომ ამხანაგურ შეხვედრებში მარცხი ბევრს არაფერს ცვლის. მარტივ შეკითხვას დავსვამ და შემდეგ მეთვითონვე ვუპასუხებ. რისთვის ინიშნება ამხანაგური მატჩები? იმისთვის, რომ რაღაც, რაც დასახვეწია გამოსცადო, ალბათ იმისთვის, რომ მისცე შანსი მათ, ვისაც ოფიციალურ შეხვედრაში ვერ მისცემ, რათა დაინახო რამდენად კვალიფიციურია ესა თუ ის სპორტსმენი უმაღლესი დონის გათამაშებებისთვის, ალბათ იმისთვის, რომ საკუთარი გამჭრიახი გონებით დააკვირდე და შეისწავლო შენი ნაკრების უპირატესობები, რასაც ოფიციალურ შეხვედრაში გადაიტან. ზოგადად, ცოტა რომ გადავუხვიოთ, ფორმულა 1-ში კვალიფიკაციასა და რბოლამდე პრაქტიკა იმართება ხოლმე, რატომ? ნახონ და გამოსცადონ ბოლიდი სავსე ავზით ან თუნდაც ნახევარით, საბურავი შეამოწმონ და ასე შემდეგ. ჯიკიჩმა სიურპირიზი დაახვედრა ესპანეთს, ჯოკერად მამუკელაშვილი მოავლინა და შესთავაზა თამაში ისეთი, როგორიც მათ ჩვენგან არასდროს უნახავთ. ზოგადად, გვიყვარს თითოეული გამარჯვების აღნიშვნა, ბიჭებმა მატჩის შემდეგ ისიც აღნიშნეს, რომ ზეიმის დრო არარის, მომავალი მატჩისთვის უნდა დაიწყონ მომზადება, მე კი ლეგენდარული კობი ბრაიანტის სიტყვებით დაგემშვიდობებით:
“საქმე არ დასრულებულა”, პროგრამა მინიმუმი ჯგუფიდან გასვლაა, იქ კი უკვე წნეხმოხსნილები სადამდე მივლენ ამას ერთად ვნახავთ. ჯგუფის მეორე შეხვედრა 30 აგვისტოს, 16:00 საათზე იტალიასთან გაიმართება.
იანისის ლიდერობით – საბერძნეთმა იტალია დაძაბულ ბრძოლაში დაამარცხა
იანისის ლიდერობით – საბერძნეთმა იტალია დაძაბულ ბრძოლაში დაამარცხა
ნაკრებმა კვიპროსში პირველი ვარჯიში სრული შემადგენლობით, თორნიკე შენგელიასთან ერთად ჩაატარა