ეს იყო ბიძინა ივანიშვილის ინტერესი – “კაბელების საქმის“ მოსამართლე

“კაბელების საქმის“ მოსამართლე, დავით ჯუღელი ამბობს, საქმის მოგვარებაში უშუალოდ სასამართლოს მაღალჩინოსანი მონაწილეობდა, რომელიც მითითებებს შუშის სასახლიდან იღებდა.

ამას არავინ მალავდა , რომ ეს იყო ბიძინა ივანიშვილის ინტერესი, ერთ-ერთმა შუამავალმა, სასამართლოს მაღალჩინოსანმა პირდაპირ განაცხადა, რომ იმ წამს მოდიოდა შუშის სასახლიდან. აქ მუქარას ადგილი არ ჰქონია, აქ საუბარი იყო იმაზე, რომ დამესახელებინა ნებისმიერი თანხა და ეს თანხა იმ წამს გაჩნდებოდა იმ ანგარიშზე, სადაც ვიტყოდი.

მე მასთან უშუალო შეხება არ მქონია, პირიქით, ყველასთან მქონდა ერთიდაიგივე თხოვნა, თუ ეს ამ ადამიანიდან მოდის, გაქვთ ასეთი ურთიერთობა, შემიძლია მას პირადად შევხვდე, გავესაუბრო, რადგანაც პარალელურად მუშავდებოდა სამი სხვადასხვა ვერსია-“რატომ გაჯიუტდა დათო“, რატომ არ უნდა გამოიტანოს ის გადაწყვეტილება, რასაც პროკურატურა კანონიერად მიიჩნევდა. ერთი ეს იყო ჩემი “მეგობრობა“ ირაკლი ალასანიასთან, რაც საბოლოოდ არ დაადასტურდა. შუამავლები ასე ეუბნებოდნენ, ჯერ ვითომ “მეგობარი“ იყო, მეორე იყო თითქოს, ქრთამი ავიღე ალასანიასგან, რამდენიმე მილიონი, ან ველოდებოდი ამ თანხას და მესამე იყო, ჩემი პირადი წყენა ბიძინასთან. რაც ყველაზე სასაცილო იყო, რადგან მე მას არ ვიცნობ.

ყოფილი მოსამართლე სასამართლოში არსებულ მდგოამრეობაზეც საუბრობს და ამბობს, რომ ის, რაც იქ ხდება, შოკისმომგვრელია.

ის რაც დღეს სასამართლოში ხდება, არის წარმოუდგენელი. რამდენიმე პროცესს დავესწარი ბოლოს და შოკში მაგდებდა ის გარემოება, როდესაც პოლიციელი ადასტურებდა, რომ კანონდარღვევას ადგილი არ ჰქონია და მოსამართლე გააფთრებით ცდილობდა, სამართალდარღვევის დაფიქსირებას, – განაცხადა ჯუღელმა.

წყარო – ტვ პირველი