ზოგიერთი ყვავილის ფასი 15 მლნ დოლარსაც აჭარბებს – ძვირადღირებული ყვავილები მსოფლიოში

ყვავილები ყველაზე გავრცელებული საჩუქარია მათ შორის, რომელსაც ადამიანები დღესასწაულებზე იღებენ. სხვადასხვა კულტურაში ყვავილებს განსხვავებული მნიშვნელობა აქვს, მაგალითად, ვარდი სიყვარულს განასახიერებს, შროშანი – სიწმინდეს, ხოლო გვირილა უბრალოებას.
ყვავილებზე მოთხოვნა და ფასები განსაკუთრებით მზარდია სადღესასწაულო დღეებში. გარდა მოთხოვნისა, ზოგიერთი ყვავილის შემთხვევაში ფასს განაპირობებს სეზონურობა, ასევე ის თუ რამდენად იშვიათია ესა თუ ის ყვავილი, რამდენად სპეციფიკურ მოვლას საჭიროებს, იმპორტულია თუ ადგილობრივი წარმოების და ა.შ.
Financesonline-მა გამოაქვეყნა 2024 წლის ბოლოსთვის ყველაზე ძვირადღირებული ყვავილების რეიტინგი. აღნიშნულ მონაცემებზე დაყრდნობით გთავაზობთ, ხუთ ყველაზე ძვირადღირებულ ყვავილს მსოფლიოში:
კადუპულის ყვავილი მსოფლიოში ყველაზე ძვირადღირებულია. როგორც ცნობილია, კაქტუსის ეს სახეობა ამ სიაში არსებულ ყვავილებზე ძვირად არ გაყიდულა, მაგრამ იმდენად იშვიათი და სუსტია, რომ მხოლოდ რამდენიმე საათს ცოცხლობს. კადუპულის ყვავილი მხოლოდ ღამით, ისიც იშვიათად ყვავის და მზის ამოსვლისთანავე ჭკნება. ჯერ ვერავინ შეძლო ყვავილის ღეროდან ამოღება საჩუქრად. სწორედ ეს არის მიზეზი, რომ რამდენადაც გასაკვირი არ უნდა იყოს,ეს ყვავილი ფაქტობრივად ფასდაუდებელია.
რეიტინგში მეორე ადგილს იკავებს ვარდი ჯულიეტა. ეს არის კულტივირებული ვარდი, რომელიც მის შემქმნელ დევიდ ოსტინს 15 წლის განმავლობაში გამოჰყავდა. მისი ჩვენება 2006 წელს გაიმართა. ვარდის ღირებულება 15.8 მილიონ დოლარს შეადგენს.
მესამე ადგილი ერგო Shenzhen Nongke-ის ორქიდეას, რომელიც ჩინელმა მეცნიერებმა Shenzhen Nongke Group-ის კვლევითი პროექტის ფარგლებში შექმნეს. დაახლოებით 8 წელი დასჭირდა მცენარის გამოყვანას. ღირებულება 200 ათასს დოლარს შეადგენს. მისი ფასი გამოწვეულია იმით, რომ მცენარე მხოლოდ 5 წელში ერთხელ ყვავის.
მსოფლიოში ერთ-ერთი ყველაზე ძვირადღირებული ყვავილია „კინაბალუს ორქიდეის ოქრო“. ეს მცენარე იზრდება ძალიან ნელა და ხარობს მხოლოდ მალაიზიაში, კინაბალუს ეროვნულ პარკში. იშვიათი ყვავილის ღირებულება 6 ათას დოლარს აღწევს.
„ზაფრანის კროკუსი“ ერთ-ერთია მსოფლიოში ყველაზე ძვირადღირებულ ყვავილებს შორის. ყვავილის ფასი 1200-1500 დოლარის ფარგლებშია. ეს მცენარე გამოიყენება სანელებლების მოსამზადებლად. მაგალითად, 500 გრამის მოსამზადებლად 80 000 ყვავილი გამოიყენება, რაც ძალისხმევასთან არის დაკავშირებული და აისახება კიდეც ყვავილის ფასზე.
წყარო: bpn.ge