რძის იმპორტი 28%-ით გაიზარდა (bm.ge)

საქართველოში რძის იმპორტი დაახლოებით 28%-ით გაიზარდა. მიმდინარე წლის იანვარ-ივლისის პერიოდში ქვეყანაში 12,4 მლნ აშშ დოლარის 11 107 ტონა რძის და ნაღების იმპორტი განხორციელდა. გასული წლის ანალოგიურ პერიოდში კი ეს მაჩვენებელი 8,9 მლნ აშშ დოლარი და 7539 ტონა იყო.
მთავარი იმპორტიორი ქვეყანა აზერბაიჯანია, რომელსაც მოჰყვება პოლონეთი, რუსეთი და საფრანგეთი.
რძისა და ნაღების იმპორტიორი TOP-10 ქვეყანა 2025 წლის იანვარ-ივლისის მონაცემებით შემდეგია:
· აზერბაიჯანი – 3,4 მლნ აშშ დოლარი – 4005 ტონა
· პოლონეთი – 2,09 მლნ აშშ დოლარი – 1920 ტონა
· რუსეთი – 2 მლნ აშშ დოლარი – 1726 ტონა
· საფრანგეთი – 1,9 მლნ აშშ დოლარი – 474 ტონა
· ბელარუსი – 1 მლნ აშშ დოლარი – 1264 ტონა
· თურქეთი – 650 000 აშშ დოლარი – 707 ტონა
· გერმანია – 400 900 აშშ დოლარი – 323 ტონა
· იტალია – 315 400 აშშ დოლარი – 194 ტონა
· უკრაინა – 270 100 აშშ დოლარი – 269 ტონა
· ირანი – 203 500 აშშ დოლარი – 162 ტონა
რაც შეეხება ექსპორტს, წელს, ქვეყნიდან მცირე რაოდენობის ექსპორტიც დაფიქსირდა. კერძოდ, ივნისის თვეში საქართველოდან 6400 აშშ დოლარის ღირებულების 3 ტონა პროდუქტი სომხეთში გავიდა. ცნობისთვის, ეს პირველი შემთხვევა იყო, როცა ქვეყნიდან რძის ექსპორტი განხორციელდა, თუ არ ჩავთვლით 2015 წელს, როდესაც საქართველოდან 14 600 აშშ დოლარის ღირებულების რძის და ნაღების ექსპორტი დაფიქსირდა. მაშინ ერთადერთი საექსპორტო ქვეყანა აზერბაიჯანი იყო.
შეგახსენებთ, 2022 წელს ინფორმაცია ქართული პროდუქტების რუსულ ბაზარზე გატანის შესახებ რუსულმა მედიამ გაავრცელა სახელმწიფო სტრუქტურებზე დაყრდნობით. იმავე წლის 5 მარტს სააგენტო “ტასმა” დაწერა, რომ რუსეთი ქართული რძის საწარმოებს სთავაზობს პროდუქტის ექსპორტზე გატანას რუსულ ბაზარზე. “სურსათის ეროვნულ სააგენტოში” მაშინ დაადასტურეს მოლაპარაკებების არსებობა რუსულ მხარესთან ქართული პროდუქტის ექსპორტზე გატანის შესახებ, თუმცა აღნიშნეს, რომ საქართველო რუსეთთან 2020 წლიდან მუშაობს ამ საკითხზე. მიუხედავად ამისა, ექსპორტი რუსეთში არ განხორციელებულა, მიზეზი ქართველი ფერმერებისა და კომპანიების თქმით, ქვეყანაში არსებული ნედლი რძის დეფიციტია, რის გამოც ადგილობრივი ბაზრის მოთხოვნასაც კი ვერ აკმაყოფილებენ.
წარმოების ბოლო მაჩვენებლები კი შემდეგნაირია: საქართველოს სტატისტიკის ეროვნული სამსახურის წინასწარი მონაცემებით, 2025 წლის II კვარტალში რძის წარმოებამ 184 მლნ ლიტრი შეადგინა, რაც 2024 წლის ანალოგიურ მაჩვენებელზე 1.1%-ით ნაკლებია. გასული წლის იმავე პერიოდში ქვეყანაში 186.1 მლნ ლიტრი რძე იწარმოვა.