საიმიგრაციო სამსახურმა კოლუმბიის უნივერსიტეტში პალესტინელთა მხარდამჭერი აქციების სტუდენტი აქტივისტი დააკავა

ფედერალურმა საიმიგრაციო სამსახურმა ნიუ-იორკში დააკავა პალესტინელი სტუდენტი, რომელიც გასულ გაზაფხულზე მნიშვნელოვან როლს თამაშობდა კოლუმბიის უნივერსიტეტში მოწყობილ ისრაელის საწინააღმდეგო გამოსვლებში. ინფორმაციას სტუდენტის, მაჰმუდ ხალილის ადვოკატი, ემი გრირი ავრცელებს.
ადვოკატისვე ცნობით, ის 8 მარტს, მანჰეტენზე მდებარე უნივერსიტეტის კამპუსზე აიყვანეს. მის საცხოვრებელ სახლში მოწყობილ რეიდში საიმიგრაციო და საბაჟო სამსახურების აგენტები მონაწილეობდნენ, განაცხადა ადვოკატმა.
გრირის თქმით, სტუდენტის დაკავებისას ის ერთ-ერთ აგენტს ტელეფონით ესაუბრა. საიმიგრაციო სამსახურის თანამშრომელმა ადვოკატს აცნობა, რომ ისინი ამერიკის სახელმწიფო დეპარტამენტის განკარგულების საფუძველზე მოქმედებდნენ, რომელმაც მას სტუდენტური ვიზა გაუუქმა. პასუხად გრირმა მას უთხრა, რომ ხალილი ამერიკის რეზიდენტია და მწვანე ბარათი აქვს. აგენტმა კი ადვოკატისვე მონათხრობით, მას მიუგო, რომ სახელმწიფო დეპარტამენტი მას მწვანე ბარათსაც გაუუქმებს.
სავარაუდოდ, ხალილის დაკავება ერთ-ერთი პირველი გახმაურებული ქმედებაა მას შემდეგ, რაც პრეზიდენტი დონალდ ტრამპი ამერიკელებს დაჰპირდა, რომ დეპორტაციას დაექვემდებარებოდნენ ის საერთაშორისო სტუდენტები, ვინც ღაზაში ისრაელის ომის წინააღმდეგ მიმდინარე აქციებში მონაწილეობდნენ. გასულ გაზაფხულზე საპროტესტო აქციებმა ამერიკული კოლეჯების კამპუსები მოიცვა. თეთრი სახლი აცხადებს, რომ დემონსტრანტებმა ქვეყანაში დარჩენის უფლება ტერორისტული ორგანიზაცია “ჰამასის” მხარდაჭერის გამო დაკარგეს.