სასტუმრო “სვიანა რეზორტი” ინფრასტრუქტურას ავითარებს – რა გეგმები აქვს ტურისტულ ობიექტს?

თელავის მუნიციპალიტეტის სოფელ ლეჩურში მდებარე ტურისტული ობიექტი „სვიანა რეზორტი“ სასტუმროს ინფრასტრუქტურას ავითარებს. ამის შესახებ ობიექტის მენეჯერმა, სალომე ჭუმბაძემ BM.GE-სთან ისაუბრა.
იმისათვის, რომ ტურისტულ ობიექტზე მოთხოვნა გაიზარდოს და სასტუმროს მენეჯმენტმა არსებული სივრცე სრულად აითვისოს, ღია ჯაკუზის მოწყობა, ამასთან გასართობი სივრცეებისა და ფრენბურთის მოედნის გაკეთება იგეგმება, რაც ჭუმბაძის ვარაუდით ტურისტულ ობიექტზე მოთხოვნას მნიშვნელოვნად გაზრდის. თუმცა, რა ინვესტიციას საჭიროებს აღნიშნული ინფრასტუქტურა, ინფორმაცია არ სახელდება.
“წელს, ღია ჯაკუზების დამატებას, გასართობი სივრცეებისა და ფრენბურთის მოედნის გაკეთებას ვაპირებთ, რადგან სივრცე გვაქვს ასათვისებელი. აღნიშნული ინფრასტრუქტურა, მაისიდან იქნება ხელმისაწვდომი”, – ამბობს მენეჯერი.
აღსანიშნავია, რომ სასტუმრო ძირითადად მაისი-ოქტომბრის პერიოდში მუშაობს, მაშინ როდესაც კახეთი აქტიურ ფაზაში შედის, ხოლო სხვა პერიოდში ტურისტული ობიექტი დახურულია და მხოლოდ რამდენიმე თანამშრომელი მუშაობს, კორპორაციული ღონისძიებებისთვის.
“გასული წელი ძალიან კარგი იყო. გვქონდა დიდი წვეულებებიც, მათ შორის ნოემბერი-დეკემბერი-იანვარში და ახლა მაისს ველოდებით, როდესაც სეზონი გაიხსნება. სასტუმრო თუშეთის გზის დასაწყისში მდებარეობს, შესაბამისად ივნისი-აგვისტოს პერიოდში booking-დან ბევრი უცხოური ჯავშანი გვაქვს. მაისი სრულად შევსებულია.
ქვეყანაში ევროპული ნაკადები განვითარებული მოვლენების გათვალისწინებით მისუსტებულია, ამას ემატება უკრაინის ომიც. ზოგიერთს რუსეთი, უკრაინა და საქართველო ერთი და იგივე ჰგონია შესაბამისად, ადრე თუ ძირითადად გერმანიიდან და აშშ-დან ჩამოდიოდნენ, ახლა უფრო მეზობელი ქვეყნებიდან, კერძოდ ისრაელიდან, თურქეთიდან და ა.შ. გვსტუმრობენ. რაც შეეხება ქართულ ჯავშნებს, ძირითადად პარასკევი-შაბათი-კვირის პერიოდშია გააქტიურებული. ხოლო, შუა კვირას ძირითადად აუზი იტვირთება”, – ამბობს სალომე ჭუმბაძე.
მისივე განმარტებით, სასტუმროში ფასები არ დაუკორექტირებიათ და სტანდარტულად, საშუალოდ ერთი ღამით განთავსების ღირებულება საუზმით 210 ლარია.
ინფორმაციისთვის, კახეთში მაღალი კლასის სასტუმრო ბიზნესმენ ნუგზარ ყალანდარიშვილის კერძო ინვესტიციითა და სააგენტო „აწარმოე საქართველოში“ თანადაფინანსებით აშენდა. ინვესტიციის ჯამური მოცულობა 5 მლნ ლარია.