ტრამპმა სამხრეთ აფრიკას დაფინანსება შეუწყვიტა

აშშ-ს პრეზიდენტმა სამხრეთ აფრიკას ფინანსური დახმარება შეუწყვიტა. შესაბამის აღმოასრულებელ ბრძანებას დონალდ ტრამპმა ხელი უკვე მოაწერა, – იუწყება საინფორმაციო სააგენტო Reuters .
როგორც თეთრ სახლში განმარტეს, ვაშინგტონი შეიმუშავებს გეგმას თეთრკანიანი სამხრეთ აფრიკელი ფერმერებისა და მათი ოჯახების ლტოლვილებად გადასახლების შესახებ.
ცნობისთვის, რამდენიმე დღის წინ ტრამპი დაიმუქრა, რომ სამხრეთ აფრიკას ამერიკულ დაფინანსებას შეუწყვეტდა და ქვეყანა “მიწის კონფისკაციასა და ადამიანთა კონკრეტული კლასების მიმართ ძალიან ცუდ მოპყრობაში” დაადანაშაულა.
აშშ-ის მთავრობის მონაცემებით, შეერთებულმა შტატებმა 2023 წელს სამხრეთ აფრიკისთვის დაახლოებით 440 მილიონი დოლარის დახმარება გამოყო.
შეგახსენებთ, სამხრეთ აფრიკის ხელისუფლებას ხშირად ადანაშაულებენ თეთრკანიანებისგან მიწის უკანონოდ ექსპროპრეაციაში. მემარჯვენეები ასევე ამტკიცებენ, რომ დასავლური წამყვანი მედიასაშუალებები განზრახ უგულებელყოფს სამხრეთ აფრიკაში თეთრი ფერმერების მდგომარეობას, რომლებსაც რეგულარულად ესხმიან თავს და ძარცვავენ.
იმასაც შეგახსენებთ, რომ სამხრეთ აფრიკის პრეზიდენტმა სირილ რამაფოზამ გასულ თვეში, ქონებრივი უთანასწორობის აღმოფხვრის მიზნით, ხელი მოაწერა კონტროვერსიულ კანონს, რომელიც სახელმწიფოს უფლებას აძლევს, მოახდინოს მიწის ექსპროპრიაცია მესაკუთრის ანაზღაურების გარეშე. აპარტეიდის დროს რასობრივი ნიშნით ქონებრივი უთანასწორობა მკვეთრად გაიზარდა, რომლის შედეგებსაც სამხრეთ აფრიკა დღემდე ებრძვის.