ქართული პრესის მიმოხილვა 20.03.2025

შეთანხმება შესაძლო შეთანხმებაზე – რა შედეგით დასრულდა ტრამპი-პუტინის საუბარი და რა ბედი ეწია 30-დღიან ცეცხლის შეწყვეტას
მიღწევადია თუ არა ახალი საპარლამენტო არჩევნები – რა რეალურ შედეგზეა ორიენტირებული პროტესტი
კურსკის შემდეგ უკრაინელთა მთავარი სამიზნე ბელგოროდია – “ცდილობენ ბელგოროდში შექმნან ისეთივე პლაცდარმი, როგორიც კურსკში ჰქონდათ”
* * *
შეთანხმება შესაძლო შეთანხმებაზე – რა შედეგით დასრულდა ტრამპი-პუტინის საუბარი და რა ბედი ეწია 30-დღიან ცეცხლის შეწყვეტას
“აშშ-სა და რუსეთის პრეზიდენტებს შორის სატელეფონო საუბრის მთავარი ხაზი უკრაინის ომში ცეცხლის შეწყვეტის აუცილებლობა იყო, თეთრი სახლის თანახმად, მხარეები შეთანხმდნენ, რომ სამშვიდობო ძალისხმევა დაიწყოს ენერგეტიკისა და ინფრასტრუქტრის ობიექტებზე ცეცხლის შეწყვეტით, თუმცაღა, დონალდ ტრამპისა და ვლადიმერ პუტინის საუბრიდან მალევე რუსეთმა ისევ დაარტყა უკრაინის ენერგოობიექტებს. 18 მარტს მსოფლიოს ყურადღება თეთრი სახლისკენ იყო მიპყრობილი, ორსაათნახევრიანი საუბრის შემდეგ, საუბრის დეტალებზე ოფიციალური განცხადება გაავრცელა ტრამპის ადმინისტრაციამ, რომლის მიხედვით, უკრაინის საკითხის გარდა, მხარეებმა ისაუბრეს თანამშრომლობის პერსპექტივებზე ახლო აღმოსავლეთში, მოლაპარაკებები შეეხო სტრატეგიული იარაღის გავრცელების აკრძალვას, შეთანხმდნენ, რომ ირანმა ვერასოდეს ვერ უნდა შეძლოს ისრაელის განადგურება”, – წერს გაზეთი “რეზონანსი” სტატიაში, სათაურით შეთანხმება შესაძლო შეთანხმებაზე – რა შედეგით დასრულდა ტრამპი-პუტინის საუბარი და რა ბედი ეწია 30-დღიან ცეცხლის შეწყვეტას.
“საუბრისას მხარეები შეეხნენ 30-დღიანი ცეცხლის შეწყვეტის საკითხს უკრაინაში. კრემლის განცხადების თანახმად, აშშ-ის 30-დღიანი ცეცხლის შეწყვეტის ინიციატივის ფარგლებში არსებობს “უკრაინაში იძულებითი მობილიზაციისა და უკრაინის შეიარაღებული ძალების შეიარაღების შეჩერების აუცილებლობა”… უნდა აღინიშნოს, რომ 23 მარტს საუდის არაბეთის ქალაქ ჯიდაში გაიმართება უკრაინაში ცეცხლის შეწყვეტის შესახებ მოლაპარაკებების მორიგი რაუნდი. ამის შესახებ აშშ-ის პრეზიდენტის სპეციალურმა წარმომადგენელმა სტივ უიტკოფმა განაცხადა. ევროპული კვლევების ცენტრის დირექტორი კახა გოგოლაშვილი “რეზონანსთან” აცხადებს, რომ ჯერჯერობით სატელეფონო საუბრიდან პრაქტიკაში არ ჩანს, რომ რაიმე შეთანხმება მიღწეულია, მისი თქმით, საუბარი იყო ინფრასტუქტურაზე დარტყმების შეჩერება ორივე მხრიდან, თუმცა, საკითხავია ეს ვის უფრო აწყობს. საქართველოს სტრატეგიული ანალიზის ცენტრის გეოპოლიტიკური კვლევების ხელმძღვანელი ვახტანგ მაისაია მიიჩნევს, რომ უკრაინის საკითხზე პუტინი და ტრამპი პრაქტიკულად ვერაფერზე შეთანხმდნენ”, – აღნიშნავს გამოცემა.
“სატელეფონო საუბრიდან პრაქტიკულად არაფერი შეთანხმება მიღწეული არაა, ერთადერთი თითქოს შეთანხმდნენ იმაზე, რომ ინფრასტრუქტურაზე მიმართულ საჰაერო დარტყმებს შეაჩერებდნენ, მაგრამ საკითხავია, ეს ვის უფრო აწყობს უკრაინას თუ რუსეთს. ამ შემთხვევაში უკრაინამაც უნდა შეაჩეროს დარტყმები რუსეთის ნავთობსაცავებზე და ნავთობგადამამუშავებელ ქარხნებზე, რომელსაც ძალიან დიდ ზიანს აყენებდა რუსეთის სამხედრო შესაძლებლობებს. სამხედრო შესაძლებლობების თვალსაზრისით, შესაძლოა პუტინისთვის უფრო მომგებიანი ყოფილიყო ამ დარტყმების შეჩერება ორმხრივად. შესაძლოა ეს შეთანხმება ძალაში შესული არაა და რუსეთმა იმიტომ დაარტყა. შეთანხმება ტრამპსა და რუსეთს შორის მოხდა, მაგრამ უკრაინელებსა და რუსეთს შორის უნდა მოხდეს ეს. ეს შეთანხმება იყო პრინციპული და არა პრაქტიკული, ეს ტრამპისა და მისი პიარისთვის კარგი მოვლენა არაა”, – აცხადებს გამოცემის კორესპონდენტთან საუბრისას კახა გოგოლაშვილი.
“დანარჩენი საუბრები, ჰოკეის თამაში და ა.შ. ეს რა თქმა უნდა გამაღიზიანებელია, ამერიკელებიც მაინცდამაინც კმაყოფილები არ უნდა იყვნენ იმ სახის განცხადებებით, რომელიც რუსეთმა გააკეთა. რუსეთი მოთხოვნები კვლავ რჩება უკრაინისთვის მიუღებელი, რომ ამ ხნის განმავლობაში უკრაინას არანაირი იარაღი არ უნდა მიაწოდონ, მაშინ რუსეთმა თავისი იარაღის წარმოება უნდა შეწყვიტოს. ტრამპი დიდი სახელმწიფოს მეთაურია და ომის დასრულება თავის პოზიციის გასაძლიერებლად და იმიჯისთვის სჭირდება, მაგრამ უკრაინამ იმისთვის არ იომა, რომ ყველაფერი რუსეთს ჩააბაროს. ტრამპის პოლიტიკა არ არის საერთაშორისო სამართლის პატივისცემის პოლიტიკა. ჯერჯერობით ევროპელები რჩებიან, რომლებსაც შეუძლიათ უფრო სამართლიანი მოთხოვნები წაუყენონ რუსეთს, ვიდრე აშშ-მა”, – დაასკვნის კახა გოგოლაშვილი.
“პუტინი და ტრამპი აღმოსავლეთის რეგიონზე შეთანხმდნენ, თეირანის ბირთვულ პროგრამასთან დაკავშირებით, ხოლო უკრაინის ომის გაჩერებაზე, ვერავითარ კომპრომისს ვერ მიაღწიეს. რამდენადაც ვიცი, ტრამპმა და პუტინმა ეს საკითხი კვლავ თავიანთ მომლაპარაკებელ ჯგუფებზე გადაამისამართეს, ჯგუფები შეეცდებიან გარკვეული ახალი ფორმულა ჩამოაყალიბონ. ტრამპს ძირითადად ახლო აღმოსავლეთის თემა აინტერესებდა, ამ საკითხში გარკვეულწილად კონსენსუსს მიაღწიეს, უკრაინის საკითხზე მათ პოზიციების შეჯერება გაუჭირდათ. პუტინი ტერიტორიებს და უსაფრთხოების ზონის შექმნას ითხოვს, რაც უკრაინისთვის კატეგორიულად მიუღებელია. ისედაც პუტინს არავითარ შემთხვევაში არ აწყობს შეთანხმება, რადგან რუსულ ძალებს ოპერატიული ინიციატივა აქვთ აღებული. ძირითად საკითხებზე არანაირი კომპრომისი არ ყოფილა. ომი გაგრძელდება, თუ მხარეებს შორის რამე სასწაული არ მოხდა, ჯერჯერობით ომის დასრულების კონტურები არ იკვეთება. ზელენსკი მოლაპარაკების მაგიდასთან ევროპის დაჯდომასაც ითხოვს, მას სურს თავი დაიზღვიოს ტრამპის მოულოდნელი გადაწყვეტილებებისგან”, – თვლის გამოცემის კორესპონდენტთან საუბრისას ვახტანგ მაისაია.
“შეიძლება ახლა ტრამპი მეტ-ნაკლებად პროუკრაინულ პოზიციას ავლენს, მაგრამ რა მოუვა თავში, კაცმა არ იცის, ამიტომ ზელენსკი თავს იზღვევს არ გამოვრიცხავ რაღაც მომენტში ტრამპმა უკრაინას სამხედრო დახმარება კვლავ შეუჩეროს და ევროპა ყველა სცენარისთვის ემზადება, მათ შორის რომ ჩაანაცვლოს ამერიკული დახმარება. ის, რომ ვერაფერზე ვერ შეთანხმდნენ, ტრამპის იმიჯს ურტყამს და მის საარჩევნო დაპირებას, მაგრამ სხვა გზა არაა, ეს ამერიკის პრეზიდენტებს სჩვევიათ ხოლმე. “ფაქტობრივად 30-დღიანი ცეცხლის შეწყვეტის გეგმა ჩაიშალა, ეს უფრო მკაფიო გახდა ტრამპი-პუტინის პირდაპირი საუბრის მერე”, – ამბობს ვახტანგ მაისაია.
“უკრაინის პრეზიდენტ ვოლოდიმირ ზელენსკის განცხადებით, უკრაინელებისთვის აშკარაა, რომ ტრამპისა და პუტინის შეთანხმებები ჯერ არ მუშაობს, ვინაიდან, მათი საუბრის დასრულების შემდეგ უკრაინაში საჰაერო განგაში ისმოდა. “ვფიქრობ, უკრაინელებისთვის გასაგებია რა ხდება. ახლა უკრაინაში განგაშია. ანუ ეს, პრინციპში, არის კიდევაც პასუხი იმაზე, თუ რა ხდება. ანუ, რუსებმა, როგორც ჩემთვის ცნობილია, თქვეს, რომ პრეზიდენტ ტრამპთან საუბარის დროს ისინი ბრძანებას გასცემენ ენერგეტიკაზე ან შორი მანძილის იარაღით დარტყმების შეწყვეტის თაობაზე, “შაჰედებით” მათ შორის, მაგრამ ახლა არის განგაში, ანუ ახლა ეს ყველაფერი არ მუშაობს”, – განაცხადა ზელენსკიმ. უკრაინის პრეზიდენტის თქმით, მან ამერიკელებს უთხრა, რომ მას არ სურს, რომ უკრაინა იყოს “პუტინისთვის მენიუს სიაში”. – “ჩვენ სალათები არ ვართ, კომპოტი არ ვართ ამ ადამიანისთვის, მისი მადის მიუხედავად. დამოუკიდებელი სახელმწიფო ვართ. ამიტომ ჩვენს გარეშე ჩვენს შესახებ – ვთვლი, რომ არასწორია შეთანხმება, ვინაიდან ყველასთვის სასურველი შედეგი არ იქნება”, – განაცხადა ზელენსკიმ”, – აღნიშნავს გამოცემა.
“თეთრმა სახლმა ტრამპი-პუტინის სატელეფონო საუბრის შესახებ განცხადება გაავრცელა, რომლის თანახმად, ტრამპი და პუტინი “შეთანხმდნენ, რომ მშვიდობისკენ მოძრაობა დაიწყება ენერგეტიკასა და ინფრასტრუქტურაზე ცეცხლის შეწყვეტით, ისევე როგორც, შავ ზღვაში საზღვაო ცეცხლის შეწყვეტის იმპლემენტაციაზე ტექნიკური მოლაპარაკებებით, სრული ცეცხლის შეწყვეტითა და მუდმივი მშვიდობით”. თეთრი სახლის თანახმად, ამ პუნქტებზე მოლაპარაკებები დაუყოვნებლივ დაიწყება ახლო აღმოსავლეთში. კრემლის განცხადების თანახმად კი, აშშ-ის 30-დღიანი ცეცხლის შეწყვეტის ინიციატივის ფარგლებში არსებობს “უკრაინაში იძულებითი მობილიზაციისა და უკრაინის შეიარაღებული ძალების შეიარაღების შეჩერების აუცილებლობა”. ასევე, განცხადებაში კრემლი მშვიდობიანად მოგვარებისთვის ითხოვს “კონფლიქტის ძირეული მიზეზების აღმოფხვრის უპირობო აუცილებლობას და უსაფრთხოების სფეროში რუსეთის კანონიერი ინტერესების გათვალისწინებას”. აშშ-ის პრეზიდენტის, დონალდ ტრამპის განცხადებით, რუსეთის პრეზიდენტ ვლადიმერ პუტინთან მოლაპარაკებებზე უკრაინის დახმარების საკითხი არ განუხილავთ. “ჩვენ არ გვისაუბრია დახმარებაზე, საერთოდ არ გვილაპარაკია დახმარებაზე. ბევრ რამეზე ვისაუბრეთ, მაგრამ დახმარებაზე საუბარი არასდროს ყოფილა”, – აღნიშნა ტრამპმა “ფოქს ნიუს”-თან საუბარში”, – დასძენს გამოცემა.
მიღწევადია თუ არა ახალი საპარლამენტო არჩევნები – რა რეალურ შედეგზეა ორიენტირებული პროტესტი
“ოპოზიცია აცხადებს, რომ დღეს ქართული საზოგადოების ყველაზე დიდი დაკვეთა ახალი საპარლამენტო არჩევნებია. მიმდინარე პროტესტის ერთ-ერთი მთავარი მოთხოვნაც ესაა, თუმცა დღეს “ქართული ოცნება” ამის შესაძლებლობას კატეგორიულად გამორიცხავს და ოპოზიციურ პარტიებს ადგილობრივი არჩევნებში მონაწილოებისკენ მოუწოდებს. ანალიტიკოსი ედიშერ გვენეტაძე “რეზონანსთან” აცხადებს, რომ ახალი არჩევნები ფაქტიურად გამორიცხულია. შავი ზღვის საერთაშორისო უნივერსიტეტის პროფესორი და ანალიტიკოსი ნიკა ჩიტაძე კი ამბობს, რომ დღეს ახალი საპარლამენტო არჩევნების დანიშვნა ელექტორატის მნიშვნელოვანი ნაწილის მოთხოვნაა, თუმცა, ოპოზიციას სამუშაო აქვს ჩასატარებელი ხალხში. ხოლო “ძლიერი საქართველოს” წევრის თაზო დათუნაშვილის განცხადებით, ყველა ძალისხმევას გამოიყენებენ იმისთვის, რომ საქართველოში ახალი არჩევნები დაინიშნოს. როგორც მან აღნიშნა, დღეს ქართული საზოგადოების ყველაზე დიდი დაკვეთა არის ახალი საპარლამენტო არჩევნებ”, – წეს გაზეთი “რეზონანსი” სტატიაში, სათაურით მიღწევადია თუ არა ახალი საპარლამენტო არჩევნები – რა რეალურ შედეგზეა ორიენტირებული პროტესტი.
“ოპოზიციის საქმე ისეა, მელას რაც ელანდებოდა, ის ესიზმრებოდაო, ახალი არჩევნების ჩატარება ისევეა მოსალოდნელი, როგორც ბაბუაჩემის დაბრუნება. დღეს ახალი არჩევნების ჩატარების არავითარი საჭიროება არ არის, ეს ჩვენთან ხალხს არ უთხოვია. თუ რაიმეს თავი აქვთ, აგერ ბატონო ადგილობრივ არჩევნებში დაამტკიცონ. მიიღონ მონაწილეობა და ნახონ რა შედეგს მიიღებენ. მათი ერთადერთი მიზანია, რომ გადადგეს “ქართული ოცნება” და ქვეყანა მათ ჩააბაროს, მაგრამ ასეთი რამ დემოკრატიულ ქვეყნებში არ ხდება. მათი საქციელი არის ხმა მღაღადებელსა უდაბნოსა შინა, ილაპარაკონ და იყვნენ”, – აცხადებს გამოცემის კორესპონდენტთან საუბრისას ედიშერ გვენეტაძე.
“ახალი საპარლამენტო არჩევნების დანიშვნა მოსახლეობის მნიშვნელოვანი ნაწილის მოთხოვნაა, თუმცა, ოპოზიციამ სხვა ასპექტებიც უნდა გაითვალისწინოს. “ქართული ოცნების” მიმართ მოწოდების პარალელურად, მოსახლეობასთან მუშაობაა საჭირო, აუხსნან რატომ არის ოპოზიცია უკეთესი, რას სთავაზობს უკეთესი საქართველოსთვის და თითოეული მოქალაქისთვს. “ოცნება” მაინც დეზინფორმაციულ კამპანიას ეწევა, ჯერჯერობით ამას წარმატებით ახერხებს, – ვგულისხმობ ხალხის დარწმუნებას, რომ “ოცნება” რომ არ ყოფილიყო, საქართველო ომში იქნებოდა ჩართული და ამის გარანტი მარტო “ქართული ოცნებაა”. დღეს ახალი არჩევნების საკითხი ნაწილობრივ მიღწეულია იქიდან გამომდინარე, რომ ამდენი დღეა პროტესტი მიდის და ჯარიმებისა, დაპატიმრებების და ფიზიკური შეურაცხყოფების მიყენების მიუხედავად, პროტესტანტები ვერ დააშინეს და ხალხი მაინც გამოდის. არის შანსი, რომ წარმატება მიღწეულ იქნას, მაგრამ იმისთვის, რომ უფრო მეტი შანსი იყოს, მოსახლეობასთან მუშაობაა საჭირო და დასვლეთის უფრო აქტიური ჩართვა, ვგულისხმობ “ოცნების” წევრთა დასანქცირებას”, – მიიჩნევს გამოცემის კორესპონდენტთან საუბრისას ნიკა ჩიტაძე.
“ქართულ ოცნებას” ახალი არჩევნების ჩატარების ეშინია, რადგან მან გააყალბა და დაახლოებით 400 ათასამდე ხმა მოიპარა, რეალურად თუ არჩევნები ინიშნება, მაშინ აქ იქნება მოთხოვნა, რომ ჩატარდეს ახალი ადმინისტრაციის პირობებში და დემოკრატიულ სტანდარტებს აკმაყოფილებდეს და თუ საქართველოში არჩევნები დემოკრატიული სტანდარტებით ჩატარდა, “ქართულ ოცნებას” გამარჯვება გაუჭირდება და ხელისუფლების დათმობა მოუწევს. “ოცნების” ხელისუფლებაში ყოფნა ასოცირდება არა ქვეყნის მართვის სურვილთან, არამედ, შემოსავალთან, ძალაუფლების ბოროტად გამოყენებასთან, სხვანაირი შანსი მათ არ გააჩნიათ, აქ მხოლოდ პოლიტიკურ ელიტას კი არა, საშუალო და ქვედა რგოლებსაც ვგულისხმობ”, – ამბობს ნიკა ჩიტაძე.
“ძლიერი საქართველო” აპირებს დაუღალავად და უკანასკნელ წუთამდე ბრძოლას იმისთვის, რომ საქართველოს მოქალაქეების აბსოლუტური უმრავლესობის სურვილი და ნება აღასრულოს. ჩვენი მოსახლეობის 86%-ის ნება-სურვილია, რომ ჩვენი ქვეყანა ევროპული სივრცის ნაწილი გახდეს. დღეს ქართული საზოგადოების ყველაზე დიდი დაკვეთა არის ახალი საპარლამენტო არჩევნები. ამიტომ, ყველა ძალისხმევას გავიღებთ იმისთვის, რომ იმ ადამიანების ინტერესები დავიცვათ, ვინც საქართველოს აბსოლუტური უმრავლესობაა და მივიღოთ ახალი არჩევნები”, – მიიჩნევს გამოცემის კორესპონდენტთან საუბრისას თაზო დათუნაშვილი.
“საპარლამენტო არჩევნების დანიშვნის საკითხი არ განიხილება, ყველაზე გონივრული იქნება, ოპოზიცია თვითმმართველობის არჩევნებისთვის მოემზადოს”, – ამის შესახებ საპარლამენტო უმრავლესობის წევრმა, ვლადიმერ ბოჟაძემ განაცხადა. “საპარლამენტო არჩევნები 2028 წლის 28 ოქტომბერს ჩატარდება, ხოლო თვითმმართველობის არჩევნები – წელს 4 ოქტომბერს. შეიძლება, სალომე ზურაბიშვილი ამ არჩევნებისთვის მზადებას გულისხმობდა. ეუთო-ს დასკვნაში შავით-თეთრზე წერია, რომ საპარლამენტო არჩევნები კონკურენტუნარიანი იყო. ოპოზიცია რომ არჩევნებში დამარცხდა, გაიბუტა და პარლამენტში არ შემოვიდა, ეს რეალობას არ ცვლის, პარლამენტი მუშაობს. შესაბამისად, საპარლამენტო არჩევნები არ განიხილება. რაც უფრო მალე გამოერკვევიან და ეცოდინებათ, რომ არჩევნები არ დაინიშნება, მით უფრო მალე დაიწყებენ მზადებას ადგილობრივი თვითმმართველობის არჩევნებისთვის”, – აღნიშნა ბოჟაძემ, რომლის აზრით, “ყველაზე გონივრული იქნება, ოპოზიცია თვითმმართველობის არჩევნებისთვის მოემზადოს”, – წერს სტატიის ავტორი.
კურსკის შემდეგ უკრაინელთა მთავარი სამიზნე ბელგოროდია – “ცდილობენ ბელგოროდში შექმნან ისეთივე პლაცდარმი, როგორიც კურსკში ჰქონდათ”
“ბელგოროდის ოლქში ვითარება მძიმეა, – ამის შესახებ ინფორმაციას სააგენტო “როიტერი” რუსეთის ბელგოროდის ოლქის გუბერნატორზე, ვიაჩესლავ გლადკოვზე დაყრდნობით ავრცელებს. გუშინ რუსეთის თავდაცვის სამინისტრომ ინფორმაცია გაავრცელა, რომ რუსულმა ძალებმა ბელგოროდის ოლქის სიღრმეში უკრაინის შეიარაღებული ძალების შეღწევის მცდელობები აღკვეთეს. “თავდაცვის სამინისტროს სამსახურები და სასაზღვრო სამსახურები თავიანთ დავალებებს ასრულებენ. ჩვენი ამოცანა მოსახლეობის უსაფრთხოებაა. კრასნოიარუჟსკის რაიონში ვითარება კვლავ მძიმეა. დაბომბვის შედეგად ერთი ჯარისკაცი დაიღუპა და 4 ადამიანი დაშავდა”, – დაწერა გლადკოვმა “ტელეგრამის” არხზე. საქართველოს სტრატეგიული ანალიზის ცენტრის გეოპოლიტიკური კვლევების ხელმძღვანელის, ვახტანგ მაისაიას შეფასებით, უკრაინელების სამიზნე ახლა ბელგოროდია, რომლის ოკუპაციის შემდეგ რუსები მოლაპარაკებაზე უფრო მეტად წავლენ, ვიდრე ახლა”, – წერს გაზეთი “რეზონანსი” სტატიაში, სათაურით კურსკის შემდეგ უკრაინელთა მთავარი სამიზნე ბელგოროდია – “ცდილობენ ბელგოროდში შექმნან ისეთივე პლაცდარმი, როგორიც კურსკში ჰქონდათ”.
“როგორც ჩანს, საუბარია იმაზე, რომ უკრაინელები კურსკის ოქლიდან ბელგოროდისკენ ინაცვლებენ. წინსწრები თავდაცვითი სტრატეგიის გამოყენების ელემენტით უკრაინული შეიარაღებული ძალები ცდილობენ, რომ შეაღწიონ ბელგოროდის ოლქში და შექმნან ისეთივე პლაცდარმი, როგორიც კურსკში ჰქონდათ. ზოგი თვლის, რომ კურსკსთან დაკავშირებით, რაც უკრაინელებმა გააკეთეს, უაზრო ავანტიურა იყო – მე ამას არ ვეთანხმები, იმიტომ, რომ რუსებს მოუწიათ საკმაოდ სერიოზული კონტინგენტის და დაჯგუფების შექმნა, ასევე ამ ომში მონაწილე ბრძოლისუნარიანი შენაერთების, რაზმების დაახლოებით 40%-ის კურსკის მიმართულებაზე გადასროლა, რამაც ხარისხობრივად დააგდო რუსეთის საოკუპაციო ძალების შეტევითი ოპერაციები”, – აცხადებს გამოცემის კორესპონდენტთან საუბრისას ვახტანგ მაისაია.
“შესაბამისად, ეს იგრძნობდა ფრონტის სხვა მიმართულებებზეც. ასე რომ, ანალოგიური ტიპის სარეიდო ტაქტიკით, რომელსაც უკრაინელები იყენებენ, ცდილობენ გადაიტანონ და შექმნან გრავიტაციის წერტილი უკვე ბელგოროდის მიმართულებით და იქ მოახდინონ კურსკისნაირი ოკუპაცია. კურსკისგან განსხვავებით, ბელგოროდს მაინც სულ სხვა პოლიტიკური იმიჯი აქვს და ეკონომიკურადაც საკმაოდ მნიშვნელოვანი რეგიონია. შესაბამისად, თუ უკრაინელები ბელგოროდში ფეხს მოიკიდებენ, საკმაოდ სერიოზული სილის გაწნა იქნება რუსი უკუპანტებისთვის. ცხადია, თუ ეს ყველაფერი ასე მოხდა, გავლენა ექნება სამშვიდობო შეთანხმებაზე. შესაძლოა რუსებს მოუწიოთ მოლაპარაკებაზე უფრო მეტად წამოსვლა, ვიდრე ახლა მოდიან”, – დაასკვნის ვახტანგ მაისაია.
“პოლკოვნიკ ლაშა ბერიძის თქმით, უკრაინელები სადაც სუსტ ადგილებს ნახულობენ, უტევენ. “მართალი გითხრათ, არ ვიცი ბელგოროდში ზუსტად რა სიტუაციაა, თუმცა, როგორც ჩანს, უკრაინელები სადაც სუსტ ადგილებს ნახულობენ უტევენ. არა მგონია, რომ კურსკის შემდეგ უკრაინელებმა ბელგოროდში შექმნან პლაცდარმი, მაგრამ რა თქმა უნდა, გამორიცხული არაფერია. რეალურად ტაქტიკური სიტუაციაა და ამაზე ზუსტი ინფორმაცია არავის აქვს. ბრძოლები ყველგან მიმდინარეობს, თუმცა მნიშვნელოვანი რამე რომ მომხდარიყოს, არ გამიგია”, – ამბობს ლაშა ბერიძე, რომლის თქმით, “ამიტომ მიჭირს ამაზე კომენტარის გაკეთება, რადგან ტაქტიკურ ვითარებაზე ლაპარაკი ძალიან ადრეა”, – აღნიშნავს გამოცემა.