“წიწილა, გრილი და ბისტრომ” მეორე ფილიალის გახსნა დააპაუზა

ამ ეტაპზე, დამატებით ვალდებულების აღებისგან თავი შევიკავეთ, – თბილისში, პირველმა ქათმის რესტორანმა „წიწილა, გრილი და ბისტრო“ მეორე ფილიალის გახსნა დააპაუზა. ამის შესახებ ობიექტის დამფუძნებელმა, მარიამ მარხულიამ BM.GE-სთან ისაუბრა.
აღსანიშნავია, რომ „წიწილა, გრილი და ბისტრო“ შარშან, მაისში გაიხსნა, სახელწოდებით „წიწილა“, რომელიც მომხმარებელს ქათმისგან დამზადებულ კერძებს სთავაზობდა. თუმცა მოგვიანებით, მათ ლანჩ მენიუსა და სენდვიჩებზე გაზრდილმა მოთხოვნამ, კომპანიას რებრენდინგი გადააწყვეტინა და „წიწილა, გრილი და ბისტროს“ ბრენდად ჩამოაყალიბა.
მარხულიას ინფორმაციით, წელს ახალი ფილიალის გახსნასაც გეგმავდნენ, რომელიც ვაკის ან მარჯანიშვილის ტერიტორიაზე უნდა გამოჩენილიყო. თუმცა, ქვეყანაში განვითარებული მოვლენების გათვალისწინებით, კომპანიამ გეგმები დააპაუზა და უკვე არსებული ობიექტის განვითარება გადაწყვიტა.
„აქტიურად ვეძებდით ფართს. განიხილებოდა მარჯანიშვილი ან ვაკის ტერიტორია. თუმცა, ამ ეტაპზე, დამატებით ვალდებულების აღებისგან თავი შევიკავეთ.
2025 წელს ჩვენ გაფართოებას განვიხილავთ. თუმცა ეს გრძელვადიანი გეგმაა. გადავწყვიტეთ, რომ იმ ფილიალით, რაც გვაქვს, უფრო ცნობადები გავხდეთ, აქტიურად მივიღოთ მონაწილეობა ფესტივალებში და ქეითერინგის მიმართულებითაც გავაქტიურდეთ“, – ამბობს მარიამ მარხულია.