მაღალმთიანი სოფლები ამ დრომდე გარესამყაროსაა მოწყვეტილი – ბოლო ცნობებით ადგილობრივები დიდთოვლიანი რეგიონებიდან

სტიქიის ზონაში გზები ისევ გაუწმენდავია. გადაადგილება გურიის ქალაქებსა და სოფლებში ისევ პრობლემურია. ადგილობრივების დიდ ნაწილს არ აქვს წყალი, ელექტროენერგია და ბუნებრივი აირი. ადამიანები კილომეტრებს ფეხით გადიან, რომ მოხალისეების შტაბში მივიდნენ და საკვები პროდუქტები აიღონ. დიდი მოთხოვნაა მედიკამენტებზეც.
“არც დენი გვაქვს ერთი კვირაა, არაფერი გვაქვს სახლში პროდუქტი. რამდეჯერ ვკითხე და არავინ მოსულა”, – ამბობს ადგილობრივი.
კიდევ ერთი მოქალაქე ამბობს, რომ ხელისუფლებიდან მასთან დასახმარებლად არავინ მისულა.
“სოციალურად დაუცველი ვარ, 73 წლის ვარ, მარტოხელა, ხელისუფლება არასდროს შემხმიანებია,” – ამბობს მოქალაქე.
გადაადგილების პრობლემაზე საუბრობს კიდევ ერთი ადგილობრივი.
“წამლის საყიდლად ვერ მივდივარ, სია მაქვს დაწერილი წამლების. პენსიაც ვერ ავიღე, ვერ წავედი”, – ამბობს მოქალაქე.
სტიქიის ზონაში მყოფი მოხალისეები ამბობენ, რომ რეგიონში ვითარება იმაზე მძიმეა, ვიდრე ამის წარმოადგენა შეიძლება. მათი თქმით, სოფლების ცენტრებში ხვდებიან ადამიანებს, რომლებიც მათთვის ხელის შეშლას ცდილობენ და ამტკიცებენ, რომ მათი დახმარება საჭირო არ არის.
“ერთი ოჯახი იყო, რომელშიც მოლიარე მამაკაცი იყო და 80 წელს გადაცილებული ქალი, რომლებსაც ერთი კვირის განმავლობაშ საკვები და წამალი არ ჰქონდათ მიღებული და საოცარი იყო შეხვედრა. მაკარონის დანახვაზე თუ ადამიანს ტირილი შეეძლო, ჩვენ პირველად ვნახეთ. ვითარება იმაზე მძიმეა, ვიდრე შეიძლება წარმოვიდგინოთ. ყველაზე რთული, რასაც მოხალისეები ვეჩეხებით, არის ის, რომ სოფლის ცენტრებში გვხდებიან ადამიანები, რომლებიც გვეუბნებიან, რომ ყველაფერი კარგადაა და არ არის საჭირო ჩვენი დახმარება და ყველანაირად ცდილობენ, რომ ხელი შეგვიშალონ,” – ამბობს მოხალისე.
გურიის მოსახლეობა ხელისუფლებას ფსიქოლოგიური ზეწოლის მოხდენაში ადანაშაულებს – ადგილობრივები, რომლებსაც დიდთოვლობის გამო უკიდურეს სიდუხჭირეში და არაადამიანურ პირობებში უწევთ ცხოვრება, ამბობენ, რომ სოციალური დახმარების შეწყვეტით ემუქრებიან.
როგორც მოქალაქეები მედიას უყვებიან, იმ შემთხვევაში, თუ გურიაში არსებულ მძიმე ვითარებაზე ხმას ამოიღებენ და იტყვიან, რომ “ოცნებამ” სტიქიის პირისპირ მარტო დატოვა, სოციალურ დახმარებას გაუუქმებენ.
“იმუქრებიან, რომ (თუ ვილაპარაკებ,) სოციალურს მომიხსნიან. ვმუშაობდი სახლში და ახლა ვერ გავდივარ ზამთარში. სახლში მყავს შშმ პირი და დიაბეტიანი მეუღლე.” – განაცხადა მოქალაქემ.
სტიქიის ზონაში ჩარჩენილი ხალხი დახმარებას ითხოვს. გურიის მაღალმთიანი სოფლები ამ დრომდე გარესამყაროს არის მოწყვეტილი. ასობით ოჯახს ისევ არ აქვს ელექტროენერგია და გათბობა, ეწურებათ საკვების მარაგები და მედიკამენტებიც. “ქართული ოცნების” ჩინოვნიკები ირწმუნებიან, რომ გურიის რეგიონებში დამატებითი სპეცტექნიკაა შეყვანილი, თუმცა ზოგიერთ სოფელში არა თუ სპეცტექნიკის, არამედ ადამიანის ნაფეხურების კვალიც კი არ ჩანს.
წყარო: tv pirveli