მოლაპარაკებების მაგიდიდან უკრაინის ნატოში გაწევრიანების ამოღება შეცდომაა – პისტორიუსი – Netgazeti • გერმანია • ნატო • რუსეთის ომი უკრაინაში • უკრაინა • Netgazeti.ge

გერმანიის თავდაცვის მინისტრის, ბორის პისტორიუსის განცხადებით, მოლაპარაკებების მაგიდიდან უკრაინის ნატოში გაწევრიანების შესაძლებლობის ამოღება და ტერიტორიულ დათმობებზე წასვლა შეცდომაა.
ამის შესახებ მან აშშ-ის ახალი ადმინისტრაციის განცხადებების კომენტირებისას განაცხადა. აშშ-ის პრეზიდენტმა დონალდ ტრამპმა განაცხადა, რომ უკრაინის ნატოში გაწევრიანება პრაქტიკული არაა. ამასთან, მისი თქმით, ნაკლებად სავარაუდოა, რომ ომის დასრულების შემთხვევაში უკრაინის საზღვრები დაუბრუნდება 2014 წლამდე მდგომარეობას.
„ვფიქრობ, ეს მოუხერხებელი იყო. ბევრად უკეთესი იქნებოდა ნატოში შესაძლო გაწევრიანებასა და ტერიტორიული ცვლილებების შესახებ მოლაპარაკების მაგიდასთან გველაპარაკა“, – განაცხადა ბორის პისტორიუსმა.
პისტორიუსის განცხადებით, ევროპელები უნდა იყვნენ ჩართული ნებისმიერ მოლაპარაკებებში, რომელიც კონტინენტზე მშვიდობის დამყარებას შეეხება. მისი თქმით, ევროპელები ვერ ჩაერთვებიან იმ გარიგების უზრუნველყოფაში, რომლის შესახებ მოლაპარაკებაშიც მონაწილენი არ ყოფილან.
აშშ-ის ხედვა თავდაცვის მდივანმა პიტ ჰეგსეთმა რამშტაინის ფორმატში გამართულ შეხვედრაზე თქვა, რომ უკრაინის დაბრუნება 2014 წლამდე საზღვრებთან და ნატოში გაწევრიანება არარეალისტური მიზანია. ამის ნაცვლად, ჰეგსეთის თქმით, უკრაინამ უნდა მიიღოს უსაფრთხოების ძლიერ გარანტიები, რომლებიც გამაგრებული იქნება ქმედუნარიანი ევროპული და არაევროპული ჯარების მიერ. ამასთან, თუ ეს ჯარები უკრაინაში სამშვიდობოებად განლაგდებიან, ეს არ უნდა მოხდეს ნატოს ეგიდით.
მეორე დღეს ჰეგსეთმა განმარტა თავისი კომენტარი და თქვა, რომ ლაპარაკობდა სამშვიდობო მოლაპარაკებების კონტექსტში, თუმცა ყველაფერი მაგიდაზეა და ტრამპის გადასაწყვეტია, რა დათმობებზე წავა ან არ წავა. ვენსი დაეთანხმა იმ მოსაზრებას, რომ ტრამპს შეუძლია აზრის შეცვლა იმისდა მიხედვით, თუ როგორ განვითარდება მოლაპარაკებები.
ამ თემაზე:
· უკრაინის 2014 წლამდე საზღვრებთან დაბრუნება არარეალისტურია — აშშ-ის თავდაცვის მდივანი