SJC სახელმწიფოს მოუწოდეს, გამოყოს ფინანსები მაღაროელთა ოჯახების მხარდასაჭერად

სოციალური სამართლიანობის ცენტრი სახელმწიფოს მოუწოდებს, გამოყოს ფინანსური რესურსები ჭიათურელი მაღაროელების მხარდასაჭერად. მათ შორის, მათი საბანკო ვალდებულებების დროებით გაყინვას.
“ჭიათურა მონოინდუსტრიული ქალაქია, სადაც, მანგანუმის მოპოვების მიღმა, დასაქმებისა და შემოსავლის ალტერნატიული წყაროები პრაქტიკულად არ არსებობს. ჭიათურის მოსახლეობის 60.6 % სოციალურად დაუცველთა ბაზაშია რეგისტრირებული, რაც იმერეთის რეგიონის საშუალო მონაცემს – 41.2 %-ს, მკვეთრად აღემატება. მუნიციპალიტეტის მოსახლეობის მესამედი – 33.6 %, საარსებო შემწეობის მიმღებია, რაც ხარაგაულის მუნიციპალიტეტის შემდეგ, იმერეთში ყველაზე მაღალი მაჩვენებელია. აღნიშნულის პარალელურად, სოციალური დაცვის პროგრამებზე მუნიციპალიტეტის ბიუჯეტის მხოლოდ 5.8 %-ია გამოყოფილი, რაც ადგილზე არსებული გამოწვევების გამკლავებისთვის საკმარისი არ არის”, – აცხადებენ ორგანიზაციაში.
ჭიათურელი მაღაროელების უწყვეტმა აქციებმა უკვე 4 დღეა თბილისში გადოინაცვლა. დღეს, 28 მარტს მათ აქცია გამართეს ჯანდაცვის სამინისტრიოსთან. ისინი მოითხოვდნენ სამმხრივი კომისიის შექმნას, რომელშიც მონაწილეობას თავადაც მიირებენ და რომელიც იმსჯელებს მაღაროების სამომავლო მუშაობის პერსპექტივებზე. გარდა ამისა, მაღაროელთა მოთხოვნაა სახელმწიფოს მხარდაჭერა მათი ოჯახების ბაზისური საჭიროებებით დაკმაყოფილებაში, მათ შორის საკვებით უზრუნველყოფაში.
“დაახლოებით 3 500 მაღაროელი და მათი ოჯახები შემოსავლის გარეშე დარჩნენ, რაც ჭიათურის მუნიციპალიტეტში უმწვავეს სოციალურ-ეკონომიკურ კრიზისს ქმნის. ეს ადამიანები ვეღარ ახერხებენ საკუთარი თავისა და ოჯახების მინიმალური საჭიროებების დაკმაყოფილებას, მათ შორის, საკვების შეძენას. მდგომარეობას კიდევ უფრო ართულებს მიმდინარე საბანკო ვალდებულებები, რომელიც კატასტროფულ ტვირთად აწვება მაღაროელებს – შემოსავლის გარეშე დარჩენილი ადამიანები ვეღარ ახერხებენ სესხების გადახდას, რაც საბანკო ჯარიმების მოცულობას ყოველდღიურად ზრდის. ამ პირობებში მათი კიდევ ერთი მოწოდებაა, რომ სოციალური პასუხისმგებლობის ფარგლებში კერძო ბანკებმა მათი მიმდინარე საკრედიტო დავალიანებები დროებით შეაჩერონ”, – აცხადებენ სოციალური სამართლიანობის ცენტრში.
2025 წლის იანვარში კომპანია „ჯორჯიან მანგანეზმა“, რომლის მფლობელობაშია ყველა მაღარო ჭიათურაში, მუშაობა დროებით შეაჩერა და თანამშრომლები 60%-იან ანაზღაურებაზე გადაიყვანა. 7 მარტს „ჭიათურა მენეჯმენტ კომპანიმ“ „ჯორჯიან მანგანეზთან“ შეთანხმებით განცხადება გაავრცელა, სადაც ნათქვამია, რომ ჭიათურაში მიწისქვეშა სამუშაოები აღარ განახლდება. მაღაროელები 1 თვეზე მეტია ხელფასს ვერ იღებენ – 60%-იან ანაზღაურებას, რისი გადახდის ვალდებულებაც კომპანიას დაეკისრა მუშაობის პროცესის შეჩერების შემდეგ.
ამავე თემაზე:
· „ორშაბათიდან გადავდივართ რადიკალურ ქმედებებზე“ — ჭიათურაში მაღაროელთა აქცია გაიმართა
· „დღეს ჩვენ დაგვაბრუნეს 90-იან წლებში“- ჭიათურაში მაღაროელების აქცია გაიმართა
· ჭიათურაში მიწისქვეშა სამუშაოები აღარ განახლდება — კომპანიის განცხადება და მაღაროელების პასუხი