„ავტომობილების გაყიდვები მინიმუმ 10%-ით არის გაზრდილი“ – „გლობალ ავტო იმპორტი“

მომსახურების სააგენტოს ოფიციალურ სტატისტიკაზე დაყრდნობით ირკვევა, რომ საქართველოში მანქანების რაოდენობა თვეში დაახლოებით 8.1 ათასით იზრდება. ოფიციალური მონაცემებით, წელს იანვრის დასაწყისში საქართველოში 1 870 657 ერთეული ავტომობილი იყო რეგისტრირებული. 2 თვეში ქვეყანაში მანქანების რაოდენობა დაახლოებით, 16.2 ათასით გაიზარდა.
რამ გამოიწვია ავტომობილების რაოდენობის ზრდა. კითხვით ,,კომერსანტმა“ ,,გლობალ ავტო იმპორტის’’ საოპერაციო დირექტორს თინათინ გველესიანს მიმართა. მთავარ გამომწვევ ფაქტორად ის რეექსპორტის მზარდ მაჩვენებელს ასახელებს. კიდევ ერთი მიზეზი მომხმარებლის ქცევაა. თინათინ გველესიანი აცხადებს, რომ მოქალაქეები უპირატესობას ანიჭებენ ავტომობილის ჩამოყვანას და არა მის ადგილობრივ ბაზარზე შეძენას. ამას თავისი ახსნა აქვს. მანქანის ჩამოყვანა გაცილებით იაფი ჯდება, ვიდრე მისი ადგილზე შეძენა. გარდა ამისა, მომხმარებელს დეტალური ინფორმაცია აქვს ავტომობილის მდგომარეობის შესახებ.
,,რეექსპორტის რიცხვი გაზრდილია და შესაბამისად რაოდენობამ იმატა. ჩვენს შემთხვევაში ნამდვილად, ბევრად გაზრდილია რიცხვი. გაყიდვები მინიმუმ 10%-ით არის გაზრდილი. რაც შეეხება ყოველთვიურ ჯამს, საგრძნობლად გაიზარდა ესეც. სავარაუდოდ რეექსპორტის ხარჯზე, რადგან დიდი რაოდენობით ავტომობილი შემოდის საქართველოში და ჩვენი ქვეყნის გავლით გადის რეექსპორტზე. ასევე, ბაზარი ხელმისაწვდომი გახდა ყველასთვის. ვფიქრობ ესეც არის ერთ-ერთი განმაპირობებელი მიზეზი. მომხმარებელს ურჩევნია ავტომობილი ჩამოიყვანოს და სამი თვე დაელოდოს, ვიდრე რუსთავის ბაზარზე იყიდონ. ფასის სხვაობა საგრძნობია. ჩემს გარემოცვაში თუ კი ვინმეს ავტომობილის შეძენა სურს, ყველა პრიორიტეტს ანიჭებს ჩამოყვანას, რადგან იცის ავტომობილის დეტალური მდგომარეობა და ფასის სხვაობაც რადიკალურია. ჩემი პირადი მაგალითიდან გეტყვით, რომ ავტომობილი რაც ჩამოვიყვანე, ადგილობრივ ბაზარზე 2,5-ჯერ მეტი ღირს.’’- აცხადებს თინათინ გველესიანი.
,,გლობალ ავტო იმპორტის’’ საოპერაციო დირექტორი ამბობს, რომ ჩამოყვანილ მანქანებში ელექტრო ავტომობილები წილი იზრდება, რადგან მომხმარებელი ხარჯების დაზოგვას ცდილობს.
,,ამ ბოლო დროს ელექტრო ავტომობილებზე გაიზარდა მოთხოვნა. ჩამოგვყავს ნახევრად ჰიბრიდები. ასევე ელექტრო, რადგან მოთხოვნა არის. რა საწვავიც გჭირდება თვიურად, იმის მესამედს მოიხმარს ელექტრო ავტომობილი. ყველაზე დიდი მიზეზი შეიძლება იყოს საწვავის ფასი, რადგან ძალიან ცვალებადია და არასდროს არ იწევს ქვევით და სულ იზრდება.’’- აცხადებს თინათინ გველესიანი.