„ამ ეტაპზე სასტუმრო ბიზნესისთვის სესხის აღება ძალიან რთულია“ – შალვა ალავერდაშვილი

სასტუმროების ფედერაციის დამფუძნებლის ინფორმაციით, ბოლო პერიოდში, საბანკო სექტორის მხრიდან სასტუმროების დაფინანსება გართულებულია. შალვა ალავერდაშვილის თქმით, ქვეყნის შიდა და რეგიონული რისკების გათვალისწინებით, საფინანსო ინსტიტუტები ცდილობენ, ჰორეკა სექტორი ნაკლებად დააფინანსონ.
„ამ ეტაპზე ძალიან რთულია სასტუმრო ბიზნესისთვის სესხის აღება ქვეყანაში, რადგან ბანკები იმის მიუხედავად, რომ სტატისტიკა გვაქვს ფანტასტიკური და რეკორდული წელიწადი, მათ უფრო კარგად იციან, რა ხდება ზოგადად ბიზნესში და ცდილობენ სასტუმრო ბიზნესი არ დააფინანსონ. ეს პროცესი მინიმუმ ბოლო ერთი წელია დაიწყო.
რუსეთ-უკრაინის ომიც დიდი მუხრუჭია ბიზნესის განვითარებისთვის და ტურისტების მოზიდვისთვის ქვეყანაში. ბანკებმა ზუსტად იციან ვის, რა შემოსავალი აქვს და ვინ რამდენს შოულობს. ზუსტად იცის ყველა ბანკმა რისი გადახდის უნარი აქვს, შესაბამისად ცდილობენ ამ ეტაპისთვის ნაკლებად დააფინანსონ ჰორეკა სექტორის სესხები. გააჩნია დამფუძნებელს, თუ მას სხვა წარმატებული ბიზნესი აქვს, შეუძლიათ სესხი გასცენ, სხვა გარანტიებით“,- განაცხადა ალავერდაშვილმა.
საბანკო ასოციაცია ადასტურებს, რომ როგორც რეგიონში, ისე ქვეყნის შიგნით რისკები გაზრდილია და საფინანსო ინსტიტუტები დაკრედიტებისას ამ რისკებს შესაძლოა სხვადასხვა ფორმით აზღვევდნენ, თუმცა ასოციაციის პრეზიდენტი ამბობს, რომ რაიმე განსხვავებული მიდგომა კონკრეტული სექტორის მიმართ ბანკებს არ აქვთ.
„კონკრეტული მიმართულებების კუთხით, იქნება ეს ტურიზმის მიმართულება, თუ სხვა ბიზნეს სექტორები, არ არსებობს ასეთი გადაწყვეტილებები. ზოგადად არამხოლოდ საქართველოში, არამედ რეგიონში რისკები გაზრდილია, რაც იმის წინაპირობაა, რომ საფინანსო სექტორი უფრო მეტ დაზღვევას ითხოვს გარკვეული მიმართულებით.
ყველა მიმართულებაში რა თქმა უნდა რისკები გაზრდილია, ეს ტურბულენტობა არსებობს საკმაოდ დიდი ხანია… მაგრამ დღეს ასე რომ შევხედოთ, რომ რაიმე ცვლილება არსებობს, არ არსებობს ასეთი ცვლილება. რისკები, დიახ გაზრდილია და ამ კუთხით არსებობს კონკრეტული საფინანსო ინსტიტუტის მიერ ან მოთხოვნების გამკაცრება ან უფრო დამატებითი მოთხოვნების წამოყენება“,-ამბობს ალექსანდრე ძნელაძე.
ის, რაზედაც ბიზნესი საუბრობს, რომ ბანკები თავშეკავებული არიან სასტუმრო ბიზნესის დაკრედიტებისგან, ოფიციალურ სტატისტიკაში ჯერ არ ჩანს. ბანკების მიერ ეროვნული ბანკისთვის წარდგენილი ანგარიშის თანახმად, გასულ წელს ბანკების მიერ სასტუმროებისა და ტურიზმის სექტორის დაკრედიტების მოცულობამ თითქმის 3 მლრდ ლარი შეადგინა, რაც წინა წლის მაჩვენებელთან შედარებით 1%-ით მეტი იყო.