აშშ-ს მიერ უარყოფილი ევროპა ინდოეთთან თანამშრომლობას ცდილობს

ევროკავშირის უმაღლესი ხელმძღვანელობამ ამ კვირაში ინდოეთში „უპრეცედენტო“ ვიზიტი გამართა. ეს მკაფიო დადასტურებაა იმისა, რომ აშშ-სთან გაცივებული ურთიერთობების დასაბალანსებლად, ურსულა ფონ დერ ლაიენის გუნდი სავაჭრო და დიპლომატიური კავშირების გაფართოებას სხვადასხვა მიმართულებით ცდილობს. ევროკავშირის ხელმძღვანელმა და კომისართა კოლეგიამ, ორდღიანი ვიზიტის ფარგლებში, ნიუ-დელიში პრემიერ-მინისტრ ნარენდრა მოდისთან და მის მთავრობასთან გამართეს მოლაპარაკებებს. ამ ვიზიტით ბრიუსელს სურს ყველას დაანახოს, რომ საგარეო კავშირების გაფართოება აშშ-სგან დამოუკიდებლად შეუძლია. გარდა ამისა, ევროკავშირის ხელმძღვანელობის მიზანია, საიმედო პარტნიორად წარმოჩინდეს მათ წინაშე, ვისაც სავაჭრო ურთიერთობების გაფართოება აინტერესებს.
„ინტენსიური გეოსტრატეგიული კონკურენციის ეპოქაში, ევროპა მხარს უჭერს გახსნილობას, პარტნიორობას და ურთიერთთანამშრომლობას“, – განაცხადა ვიზიტის წინ ფონ დერ ლაიენმა, რომელმაც ინდოეთს „ევროკავშირის ერთ-ერთი ყველაზე სანდო მეგობარი და მოკავშირე“ უწოდა.
66 წლის გერმანელი პოლიტიკოსი ნიუ-დელიში ევროკავშირის თითქმის 26-ვე კომისარს იახლებს. ეს იქნება ევროკავშირის ლიდერის პირველი სტუმრობა სამხრეთ აზიის გიგანტურ სახელმწიფოში, ასევე პირველი ვოიაჟი ევროპის ფარგლებს გარეთ კომისართა ახალი კოლეგიისთვის მას შემდეგ, რაც ის დეკემბერში მუშაობას შეუდგა. თანაც, ეს ყველაფერი ხდება იმ ფონზე, როდესაც აშშ-ს პრეზიდენტმა დონალდ ტრამპმა ვაშინგტონთან ბრიუსელის ტრადიციულად მჭიდრო პარტნიორობა შეარყია, ევროკავშირის მიერ ტექნოლოგიურ სფეროსთან დაკავშირებით მიღებული კანონები გააკრიტიკა, ტარიფების დაწესებით ემუქრება და უკრაინის საკითხზე ვლადიმირ პუტინთან მოლაპარაკებების დაწყებით, ევროპელი მოკავშირეებისთვის ძირის გამოთხრა დაიწყო. ამის გათავლისწინებით, „ევროკავშირს ისღა დარჩენია, ახალი მეგობრების ძიებას შეუდგეს, ინდოეთი კი, როგორც მსოფლიოს ყველაზე მრავალრიცხოვანი ქვეყანა, ამ თვალსაზრისით, მშვენიერი კანდიდატია“, – მიიჩნევს ბრიუსელის ანალიტიკური ცენტრის, „Bruegel“-ის წარმომადგენელი, ანდრე საპირი.
თავისი ჰორიზონტების გაფართოებას ბრიუსელი მას შემდეგ ცდილობს, რაც გასული წლის ნოემბერში ტრამპმა თეთრი სახლი დაიბრუნა. ბოლო თვეების განმავლობაში მან გამოაცხადა, რომ სავაჭრო კავშირებს განამტკიცებს მექსიკასთან, მოლაპარაკებებს განაახლებს მალაიზიასთან და ახალ შეთანხმებას გააფორმებს სამხრეთამერიკულ ბლოკ „მერკოსურთან“. „მან შემრიგებლური ტონი აირჩია ჩინეთთან მიმართებაში მიუხედავად იმისა, რომ პეკინი კვლავ მნიშვნელოვან სტრატეგიულ გამოწვევად რჩება ევროპისთვის“, – ამბობს ევროპის საბჭოს საგარეო ურთიერთობების ანალიტიკური ცენტრის წარმომადგენელი, ჯეიმს კრებტრი. „ინდოეთთან – დემოკრატიასთან, რომლის გლობალური გავლენაც იზრდება – უფრო მჭიდრო კავშირების დამყარება ევროკავშირისთვის პოლიტიკურად მიმზიდველია და მეტ ეკონომიკურ შესაძლებლობლობებს იძლევა“, – აღნიშნა მან.
ევროკავშირ-ინდოეთის ურთიერთობებში წინა პლანზე ვაჭრობა იქნება. ევროკავშირი ინდოეთის უდიდესი სავაჭრო პარტნიორია, რომელზეც, 2023 წლის მონაცემებით, 124 მილიარდი ევროს ღირებულების საქონელბრუნვა მოდის, რაც ინდოეთის მთლიანი ვაჭრობის 12 პროცენტს აჭარბებს. ინდოეთის მზარდი ბაზარი დიდ შესაძლებლობებს სთავაზობს სხვადასხვა სექტორს, თავდაცვიდან დაწყებული და სოფლის მეურნეობით, ავტომობილების წარმოებითა და „მწვანე“ ენერგეტიკით დამთავრებული. თუმცა, ვაჭრობის გაფართოებას მაღალი ტარიფები აფერხებს, რომლის შესახებ მოლაპარაკებები 2022 წელს განახლდა და შესაძლოა წახალისდეს თეთრი სახლის მიერ, რომელიც მეგობრებსა და მოწინააღმდეგეებს თითქმის ერთნაირად ტარიფებს უწესებს.
„თავისუფალი ვაჭრობის შესახებ შეთანხმების სასარგებლოდ ამდენი არგუმენტი არასდროს ყოფილა“, – განაცხადა ჯეიმს კრებტრიმ.
ნარენდრა მოდი ტრამპმა ვაშინგტონში მიიღო და ვაჭრობის ზრდას დაჰპირდა. თუმცა, ინდოეთი სხვა ქვეყნებთან ურთიერთობების განვითარებასაც ცდილობს, რათა „ამერიკის კაპრიზებისგან თავი დაიზღვიოს“. ევროკომისიის ვიზიტს წინ უძღოდა ინდოეთში ბრიტანეთის სავაჭრო მდივნის, ჯონათან რეინოლდსის სტუმრობა, რომელიც შეჩერებული სავაჭრო მოლაპარაკებების განახლებას ისახავდა მიზნად. „ინდოეთი გაერთიანებულ სამეფოსთან და ევროკავშირთან სავაჭრო მოლაპარაკებების მაგიდასთან აშშ-ს ტარიფების ჩრდილქვეშ ბრუნდება“, – წერდა სამშაბათს გაზეთი „The Indian Express“. ბოლო წლებში ნიუ-დელისთვის ერთ-ერთ უდიდეს გამოწვევას თავისი ახალგაზრდა და სწრაფად მზარდი კვალიფიციური სამუშაო ძალისთვის მილიონობით ახალი სამუშაო ადგილის შექმნა წარმოადგენს.
ინდოეთის მთავრობა წლების განმავლობაში მოუწოდებს ევროპას, რომ უფრო სწრაფად გასცეს ვიზები მისი ბიზნესმენებისა და სტუდენტებისთვის. ამ საკითხთან ერთად, ფონ დერ ლაიენ-მონდის მოლაპარაკებების დღის წესრიგში იქნება ტექნოლოგიებისა და ხელოვნური ინტელექტის სფეროში თანამშრომლობა, სადაც ევროპა და ინდოეთი უფრო დიდი როლის თამაშისკენ ისწრაფვიან. იგეგმება უსაფრთხოებისა და თავდაცვის საკითხების განხილვაც, რასთან დაკავშირებითაც ბრიუსელი მზადაა, ნიუ-დელისთან „ძალები გააერთიანოს“. სავარაუდოდ, საუბარი ასევე იქნება თავდაცვითი აღჭურვილობის მიწოდებაზე, რუსეთის წინააღმდეგ ევროკავშირის მიერ დაწესებული სანქციების აღსრულებასა და უკრაინის სამშვიდობო მოლაპარაკებებზე. ინდოეთი საგარეო ურთიერთობებში, დიდი ხანია, სტრატეგიული ავტონომიის პოლიტიკას ატარებს.
ისტორიულად რუსეთთან დაახლოებული და მისი სამხედრო ტექნიკის ტრადიციული მომხმარებელი ინდოეთი, უკრაინაში რუსეთის შეჭრის შემდეგ, ეწინააღმდეგებოდა დასავლეთის ზეწოლას, რომ მოსკოვისგან დისტანცირება მოეხდინა. ევროკავშირის ლიდერის ვიზიტი ამ კუთხით, სავარაუდოდ, რაიმე შეთანხმების ხელმოწერით არ დასრულდება, მაგრამ გზას ნამდვილად გაუკვალავს ევროკავშირ-ინდოეთის სამიტს, რომელიც წელს ინდოეთში ჩატარდება.
წყარო: 1tv.ge