„აჩუქე წიგნი, აჩუქე თავისუფლება“ – ჩაერთეთ მასშტაბურ კამპანიაში „ბიბლუსთან“ ერთად

მსოფლიო 23 აპრილს წიგნის ჩუქების დღეს აღნიშნავს, საქართველოში კი წიგნის მაღაზიათა ყველაზე დიდ ქსელს „ბიბლუსს“ სურს, მთელი თვე, აპრილი წიგნის ჩუქების თვედ აქციოს, რისთვისაც დაიწყო მასშტაბური კამპანია – „აჩუქე წიგნი, აჩუქე თავისუფლება“ .
კამპანიის მთავარი მიზანია წიგნიერების ხელშეწყობა, ცოდნის გავრცელება და განვითარება, როგორც შინაგანი თავისუფლების უმთავრესი საშუალება. 23 აპრილი წიგნის ჩუქების დღედ UNESCO-მ 1995 წელს გამოაცხადა. კომპანია „ბიბლუსი“ კი გიორგი კეკელიძესთან ერთად, 2019 წლიდან შეუერთდა ამ ტრადიციას.
როგორც გიორგი კეკელიძე განმარტავს, წელს კამპანიისთვის შეირჩა ძალიან აქტუალური და ყველასთვის მნიშვნელოვანი – თავისუფლების თემატიკა:
„აღნიშნული კამპანიით გვსურს, კიდევ ერთხელ შევახსენოთ საზოგადოებას, რომ წიგნის ჩუქება არა მხოლოდ სასიამოვნო ჟესტი, არამედ შესაძლებლობაა, ადამიანებს მივცეთ საშუალება, გაიფართოონ ჰორიზონტი, შეიცნონ სამყარო და ამ გზით, იგრძნონ თავისუფლება“ – გიორგი კეკელიძე, ბიბლუსის შემოქმედებითი დირექტორი
კამპანიის ფარგლებში, „ბიბლუსმა“ გადაიღო ვიდეორგოლი, რომლის მთავარ გმირს წარმოადგენს მარო მაყაშვილი, თავისუფლების ერთ-ერთი ყველაზე მნიშვნელოვანი სიმბოლო, რომლის დღიურშიც ნათლად ჩანს აზროვნების, განათლებისა და თვითგანვითარების როლი, რომელიც შინაგანი თავისუფლების განმსაზღვრელი ფაქტორია.
„ბიბლუსის“ ოპერაციული დირექტორი სოფო გორდაძე კამპანიაში მარო მაყაშვილის იდეების წარმოჩენის მნიშვნელობაზე საუბრობს:
„მარო მაყაშვილი საქართველოს ისტორიის ერთ-ერთი ყველაზე მნიშვნელოვანი გმირია, რომელიც 1921 წელს, 19 წლის ასაკში, ქვეყნის დამოუკიდებლობის დასაცავად იბრძოდა. მარო პირველი ქართველი ქალია, რომელიც ქვეყნის ეროვნულ გმირად აღიარეს. მისი დღიურები დღემდე პირვანდელი სახითაა შენახული და განსაკუთრებულად ფასეულია, რადგან ასახავს ახალგაზრდა ადამიანის განცდებს ომის, თავისუფლებისა და განათლების მნიშვნელობის შესახებ. მისი სიტყვები დღემდე აჟღერებს თავისუფლებისა და დამოუკიდებლობისთვის ბრძოლის იდეას. სწორედ ამიტომ, „ბიბლუსის“ კამპანიაში მისი ჩანახატების გამოყენება სიმბოლურად უსვამს ხაზს წიგნის, აზროვნებისა და თავისუფლების კავშირს“ – აღნიშნა სოფო გორდაძემ.
წიგნის ჩუქების დღე წლების განმავლობაში საქართველოში გახდა ერთ-ერთი ყველაზე მნიშვნელოვანი სოციალური აქტივობა, რომელსაც ყოველწლიურად უფრო და უფრო მეტი ადამიანი და კომპანია უერთდება, ვინაიდან ეს ინიციატივა მნიშვნელოვნად უწყობს ხელს წიგნიერების პოპულარიზაციასა და ხარისხიანი განათლების ხელმისაწვდომობას.
წიგნის ჩუქების წლევანდელი კამპანიის მნიშვნელობაზე ისაუბრა „ბიბლუსის“ მარკეტერმა ანა გოგსაძემაც:
„წელსაც ტრადიციულად ვაგრძელებთ წიგნის ჩუქების ტრადიციას, რომელიც მნიშვნელოვანია წიგნიერების, კითხვის და განათლების წასახალისებლად. წლების განმავლობაში, კამპანიამ მრავალი ადამიანი გააერთიანა და დღეს უკვე ჩამოყალიბდა, როგორც მნიშვნელოვანი სოციალური აქტივობა, რომელიც ხელს უწყობს თავისუფალი აზროვნების განვითარებას ქვეყანაში. კამპანია ჩვენთვის, როგორც წიგნების მაღაზიის ყველაზე დიდი ქსელისთვის საქართველოში, გაყიდვების კუთხითაც ძალიან მნიშვნელოვანია, რადგან წლების შემდეგ კომპანიები თავად გამოხატავენ სურვილს, ჩაერთონ კამპანიაში, შეიძინონ წიგნები და გადასცენ სხვადასხვა ორგანიზაციებს თუ თანამშრომლებს. ძალიან გვიხარია, რომ ვხედავთ საზოგადოების ასეთ ჩართულობას, წელს საფუძველი ჩავუყარეთ ახალ ტენდენციას – წიგნის ჩუქება ვაქციეთ საზოგადოებრივ გამოწვევად, რომელშიც უკვე ბევრი მწერალი, რეჟისორი, საზოგადო მოღვაწე ჩაერთო და ამ ინიციატივამ უფრო გააძლიერა წიგნის სიყვარული და კიდევ უფრო მეტი ადამიანი შემოუერთა ტრადიციას“, – განმარტა ანა გოგსაძემ.
კამპანიის ფარგლებში დაგეგმილია სხვადასხვა მასშტაბური აქტივობა, რომლის შესახებაც საზოგადოება მთელი თვის განმავლობაში შეიტყობს.
(R)