ბოლო მომენტებზე ვართ ირანთან, არ შეგვიძლია დავუშვათ, რომ ბირთვული იარაღი ჰქონდეთ, ძალიან მალე რაღაც მოხდება – ტრამპი

ბოლო მომენტებზე ვართ ირანთან, არ შეგვიძლია დავუშვათ, რომ ბირთვული იარაღი ჰქონდეთ, ძალიან მალე რაღაც მოხდება, – ამის შესახებ აშშ-ის პრეზიდენტმა, დონალდ ტრამპმა ჟურნალისტებთან საუბარში განაცხადა.
„ძალიან საინტერესო დღეები გვაქვს წინ, მხოლოდ ამის თქმა შემიძლია. ბოლო მომენტებზე ვართ. არ შეგვიძლია დავუშვათ, რომ ბირთვული იარაღი ჰქონდეთ…
დიდი რამ იქნება. საინტერესო დროა მსოფლიოს ისტორიაში, მაგრამ ირანთან ვითარება გვაქვს, რომ ძალიან მალე რაღაც მოხდება. ძალიან, ძალიან მალე. ვვარაუდობ, ძალიან მალე ილაპარაკებთ ამაზე.
იმედია, სამშვიდობო შეთანხმება გვექნება [ირანთან], არ ვლაპარკობ ძალაზე ან სისუსტეზე. იმას ვამბობ, რომ მირჩევნია სამშვიდობო შეთანხმების ნახვა, ვიდრე სხვა რამის. მაგრამ სხვა რამ პრობლემას მოაგვარებს“, – განაცხდა ტრამპმა.
შეგახსენებთ, უზენაესი ლიდერი ხამენეი აშშ-თან მოლაპარაკების წინააღმდეგია, თუმცა პრეზიდენტ პეზეშკიანს დიალოგის წარმოება სურს. ტრამპმა თქვა, რომ ირანთან შეთანხმებას, ამჯობინებს რესპუბლიკის დაბომბვას.
თებერვლის დასაწყისში ტრამპმა ხელი მოაწერა აღმასრულებელ ბრძანებას ირანზე „მაქსიმალური ზეწოლის“ პოლიტიკის განახლებაზე. ამ კამპანიის ერთ-ერთი მიზანია „ირანის ნავთობის ექსპორტის ნულამდე შემცირება“. ტრამპის თქმით, ირანს არ შეუძლია ჰქონდეს ბირთვული იარაღი. ის რესპუბლიკასთან გარიგების დადებას დაბომბვის შანტაჟით ცდილობს.
რუსეთის საგარეო საქმეთა მინისტრმა სერგეი ლავროვმა თებერვლის ბოლოს თეირანში ვიზიტისას განაცხადა, რომ ჯერ კიდევ არის საკმარისი დიპლომატიური შესაძლებლობები ირანთან ახალი ბირთვული შეთანხმების დასადებად ძალის მუქარის გამოყენების გარეშე.