ბოტანიკურ ბაღში „საკურას ყვავილობის დღეები“ იმართება

საქართველოს ეროვნული ბოტანიკური ბაღის ორგანიზებით, „საკურას ყვავილობის დღეები“ იმართება. ღონისძიებას თბილისის მერის მოადგილე ანდრია ბასილაია დაესწრო.
„საკურას ყვავილობის დღეები“ ტრადიციული იაპონური ჩაის ცერემონიით გაიხსნა, რომელსაც ტოკიოდან მოწვეული ოსტატი უძღვებოდა. ასევე, გაიმართა კენდოს წარმოდგენა და სუშის მომზადების მასტერკლასი.
„საქართველოს ეროვნულ ბოტანიკურ ბაღში უკვე მეხუთე წელია ტარდება საკურას ყვავილობის ფესტივალი. ეს დღე ერთგვარ ტრადიციად ჩამოყალიბდა. სულ ცოტა ხნის წინ, ბოტანიკურ ბაღში განახლდა იაპონური ბაღის კუთხე, რისთვისაც დიდი მადლობა მინდა გადავუხადო იაპონიის საელჩოს. წელს ბაღს 180 წელი შეუსრულდა“, – განაცხადა კახა კალაძემ.
„საკურას ყვავილობის დღეები“ 5 და 6 აპრილს იმართება. ღონისძიების ფარგლებში დამთვალიერებელს დახვდება იაპონურ თემატიკაზე ხელნაკეთი ნივთების გამოფენა, ორიგამის, შოდოს, ოშიბანას, კინცუგის მასტერკლასები, ანიმეების გამოფენა და იაპონური ლიტერატურის მრავალფეროვნება.
„ვცდილობთ, რომ საკურას ყვავილობის ფესტივალზე ქართველმა ვიზიტორებმა, სტუმრებმა მაქსიმალურად გაიცნონ იაპონური კულტურა. გვქონდა ტრადიციული, კლასიკური ჩაის ცერემონია. ამ ორი დღის განმავლობაში, კიდევ ბევრი საინტერესო ღონისძიებაა დაგეგმილი“, – განაცხადა ეროვნული ბოტანიკური ბაღის დირექტორმა ირინე დანელიამ.
საკურას ყვავილობის ფესტივალი ეროვნული ბოტანიკური ბაღის ორგანიზებით, თბილისის მერიისა და საქართველოში იაპონიის საელჩოს მხარდაჭერით იმართება.