"გაგრამ" და "დინამო ბათუმმა" იმარჯვეს | ეროვნული ლიგის მეშვიდე ტური

კრისტალბეთ ეროვნულ ლიგაში მეშვიდე ტური დასრულდა. დღეს ორი მატჩი გაიმართა. გაგრამ ბოლო წუთებზე გატანილით მოუგო გარეჯს, ხოლო დინამო ბათუმმა თელავს აჯობა და დაუმარცხებლად მიიწევს წინ.

გარეჯი 0:1 გაგრა

ერთადერთი გოლი 86-ე წუთზე გავიდა. გადმოვარდნილი ბურთი მიიღო გაგრას მარცხენაფლანგელმა ვანდერსონ სილვამ და დაბალი დარტყმით გაუტანა ლუკა კუტალაძეს.

ისე, მომენტები ორივე გუნდს ჰქონდა, მაგრამ მეტი ბურთი არ გასულა. ბოლოს არბიტრმა კოტე გიორგაძემ ბოლო იმედის ჯარიმისთვის გააძევა გარეჯის ფეხბურთელი თამაზ ცეცხლაძე, რომელმაც თორნიკე ოქრიაშვილი წააქცია. გიორგაძემ VAR-ზე გადაამოწმა მომენტი და შემდეგ გააძევა ცეცხლაძე.

აქამდე გუნდებს 4-4 ქულა ჰქონდათ. ახლა გაგრა მეშვიდეზეა, გარეჯი კი - ბოლოზე.

დინამო ბთ 2:0 თელავი

დინამო ბათუმი მეორე ადგილზეა და ორი ქულით ჩამორჩება მოქმედ ჩემპიონ იბერია 1999-ს. ამ ორივე გუნდს წაგების გრაფაში ნული უწერია. თელავი კი მეხუთეზეა.

პირველი ტაიმი სრულდებოდა, როცა ლუკა ქაფიანიძემ ახლოდან ერთ შეხებში დარტყმით გახსნა ანგარიში. პასი კი გიტის პაულაუსკასისა იყო.

მეორე ნახევარში კი ჯალენ ბლესამ ორამდე გაზარდა სხვაობა. ბლესამ თავად დაიწყო კონტრშეტევა, გააყოლა ბურთი პაულაუსკასს, მის პასს მოჰყვა რევაზ ინჯგიას დარტყმა და ბურთი ძელს მოხვდა, დამატებაზე კი თავად ბლესამ იმარჯვა. 2:0. ეს მისი მესამე გოლია მიმდინარე კრისტალბეთ ეროვნულ ლიგაში.