გადამფრენ ფრინველებზე ნადირობის სეზონი დამთავრდა – რა ჯარიმებია ბრაკონიერობაზე

ერთ დროს ნადირ-ფრინველით სავსე ტყის მასივებში საკმაოდ ძნელია გარეული ცხოველის ნახვა… საქართველოს ბიომრავალფეროვნებისთვის ერთ-ერთ მთავარ საფრთხეს ბრაკონიერები წარმოადგენენ. მიუხედავად იმისა, რომ ბრაკონიერულად ნადირობისთვის კანონმდებლობით საკმაოდ დიდი ჯარიმებია დაწესებული არაკეთილსინდისიერი მოქალაქეები გარემოს მაინც დიდ ზიანს აყენებენ.
„ხოცავენ ყველაფერს, რაც შემოხვდებათ. არც დღიური ლიმიტი იციან, დაშვებული რაცაა საქართველოში კანონმდებლობით. იხვია, მწყერია თუ რაცაა, არ აქვს მნიშვნელობა, ხოცავენ, რაც მოხვდებათ. არ აქვს მნიშვნელობა იჭმევა, არ იჭმევა, მაინც ხოცავენ უკონტროლოდ“, – ამბობს, მოძრაობა ბრაკონიერების წინააღმდეგ ერთ-ერთი დამფუძნებელი გიორგი ბახია.
პირველი მარტს გადამფრენ ფრინველებზე ნადირობის სეზონი მთავრდება. ამის შემდეგ მკაცრდება კონტროლი, რომელსაც გარემოსდაცვითი ზედამხედველობის დეპარტამენტი ახორციელებს.
აკრძალულ პერიოდში ნადირობის შემთხვევაში კი მონადირე საკმაოდ სოლიდური თანხით დაჯარიმდება, გარდა ამისა, შეიძლება ჩამოერთვას სანადირო იარაღი და მისი ტარების უფლებაც. ნადირობის სეზონზე ფრინველზე ნადირობის ლიცენზიის მოპოვება სულ რაღაც 10 ლარი ღირს. თუმცა განსაზღვრულია ნანადირევის რაოდენობა. მაგალითად, რუხი იხვი დღეში მხოლოდ 2-3 ცალი შეუძლია მოინადიროს მოქალაქემ. დღიური ლიმიტები სანადირო სეზონის დაწყებისას საჯაროვდება, თუმცა მიუხედავად ამისა, როგორც გარემოსდაცვითი ზედამხედველობის დეპარტამენტში აცხადებენ, ბრაკონიერობა კვლავ სერიოზულ გამოწვევად რჩება.
„გამოვლენა ძირითადად აქტიური ნადირობის პროცესშია, როდესაც ბრაკონიერები იყენებენ აკრძალულ იარაღს, მაგალითად, მომზიდავ საშუალებებს, ანდა როდესაც კლავენ აკრძალულ სახეობებს. საკმაოდ მაღალია სანქციები, მიუხედავად ამისა, სამწუხაროდ, ბრაკონიერობა გამოწვევად რჩება“, – აცხადებს გარემოსდაცვითი ზედამხედველობის დეპარტამენტის ბიომრავალფეროვნების კონტროლის სამსახურის უფროსი მაია ჩხობაძე.
საქართველოს მონადირეთა და მეთევზეთა ფედერაციაში ამბობენ, რომ რეალური შედეგის მისაღებად საჭიროა მაქსიმალურად ბევრი ბრაკონიერი დაჯარიმდეს. ამაზევე საუბრობენ ისეთ მოხალისეობრივ ჯგუფებშიც როგორიცაა „მოძრაობა ბრაკონიერობის წინააღმდეგ”. მათი თქმით, ბევრმა არათუ ნადირობის, არამედ იარაღთან მოპყრობის წესებიც კი არ იცის.
ფრინველზე ნადირობა თუ წელიწადის გარკვეულ დროს და შესაბამისი რეგულაციებით დასაშვებია, ნებისმიერი სახის ნადირის მოკვლა, საქართველოს კანონმდებლობით აკრძალულია.
გარეული ცხოველის მოკვლის შემთხვევაში კანონით დადგენილია იმ ზიანის ოდენობა, რომელიც ამის გამო ბუნებას მიადგება. მაგალითად, ერთი ირმის მოკვლა 15 ათასი ლარით არის განსაზღვრული, ხოლო მგლის მოკვლა 300 ლარით. ბუნებაზე მიყენებული ზიანის ოდენობიდან გამომდინარე კი, შესაძლოა, სისხლის სამართლის პასუხისმგებლობაც დადგეს.
ველურ ცხოველებზე ნადირობა ნებადართულია მხოლოდ სამონადირეო მეურნეობებში, სადაც შესაბამისი თანხის გადახდის სანაცვლოდ და გარკვეული ლიმიტის დაცვით მსურველს ნადირობის უფლება ეძლევა.
გარემოსდაცვითი ზედამხედველობის დეპარტამენტში ცხელი ხაზი მოქმედებს – 153. თუკი მოქალაქე რაიმე ინფორმაციას ფლობს ბრაკონიერობის თაობაზე, აუცილებლად უნდა დაუკავშირდეს უწყებას. გამონაკლისის სახით კანონში ასევე აღნიშნულია, რომ თუკი ველური ცხოველი ადამიანის სიცოცხლესა და ჯანმრთელობას ემუქრება, ასეთ დროს ცხოველის მოკვლა დასაშვებია.
წყარო: ევრონიუს ჯორჯია