ევროპა ტრამპის ტარიფებზე საპასუხო ზომებისთვის ემზადება

ევროკომისიის პრეზიდენტი ურსულა ფონ დერ ლაიენი აშშ-ის პრეზიდენტ დონალდ ტრამპის მიერ დაწესებულ ტარიფებთან დაკავშირებით აცხადებს, რომ ევროპა საპასუხო ზომებისთვის ემზადება.
ევროკომისიის პრეზიდენტმა ურსულა ფონ დერ ლაიენმა მწვავედ გააკრიტიკა დონალდ ტრამპის გადაწყვეტილება საყოველთაო ტარიფების დაწესების შესახებ, რასაც მისი თქმით, სერიოზული შედეგები მოჰყვება გლობალური ეკონომიკისთვის.
„პრეზიდენტ ტრამპის გადაწყვეტილება საყოველთაო ტარიფების დაწესების შესახებ მძიმე დარტყმაა მსოფლიო ეკონომიკისთვის. მე ვწუხვარ ამ არჩევანის გამო. მოდი, მკაფიოდ და გასაგებად ვთქვათ, რომ შედეგები იქნება მასშტაბური. გლობალური ეკონომიკა სერიოზულად დაზარალდება. იქნება გაურკვევლობა და გამოიწვევს პროტექციონიზმის კიდევ უფრო გავრცელებას. ეს შედეგები მძიმე იქნება მილიონობით ადამიანისათვის მთელ მსოფლიოში. განსაკუთრებით კი იმ ქვეყნებისთვის, რომლებიც ყველაზე დაუცველები არიან. სწორედ ამ ქვეყნებს უწესებს აშშ მაღალ ტარიფს. ეს ეწინააღმდეგება იმას, რასაც ვგეგმავდით.
ეს ტარიფები მთელი მსოფლიოს მასშტაბით დააზარალებს მომხმარებლებსაც. შედეგს მყისიერად ვიგრძნობთ. მოქალაქეებისთვის პროდუქტი გაძვირდება. საკვები, წამლები, ტრანსპორტი — ყველაფერი კიდევ უფრო მეტი ეღირება. ინფლაცია გაიზრდება. და ეს უარყოფითად აისახება ყველაზე დაუცველ მოქალაქეებზე. ყველა სახის ბიზნესი — როგორც დიდი, ისე პატარა დაზარალდება პირველივე დღიდან. გაურკვევლობა, მიწოდების ჯაჭვების დარღვევა, ზედმეტი ბიუროკრატია — ეს ყველაფერი მძიმედ დააწვება მათ. ხარჯი გაეზრდება იმ ბიზნესს, რომელიც აშშ-სთან იქნება დაკავშირებული. როდესაც ქაოსია, იქ არ არის წესრიგი. და რაც მთავარია, არ არსებობს ნათელი გეგმა ამ სირთულეებისა და ქაოსის დასაძლევად, რადგან აშშ-ის ყველა სავაჭრო პარტნიორს ერთდროულად შეეხო ეს დარტყმა.
ბოლო 80 წლის განმავლობაში ევროკავშირსა და აშშ-ს შორის ვაჭრობამ მილიონობით სამუშაო ადგილი შექმნა. მომხმარებლებისთვის პროდუქტები გაიაფდა. ეს ორივე მხარეს ეხებოდა. ბიზნესის წარმომადგენლებმა ისარგებლეს უზარმაზარი შესაძლებლობებით, რამაც უპრეცედენტო ზრდა და კეთილდღეობა მოიტანა. ამასთან, ჩვენ ვიცით, რომ გლობალურ სავაჭრო სისტემას სერიოზული ნაკლი აქვს.
ამაში ვეთანხმები პრეზიდენტ ტრამპს — სხვები, მართლაც, უსამართლოდ სარგებლობენ არსებული წესებით, და მზად ვარ, მხარი დავუჭირო ნებისმიერ მცდელობას, რომელიც გლობალურ სავაჭრო სისტემას თანამედროვე ეკონომიკურ რეალობას მოარგებს. მინდა მკაფიოდ განვაცხადო: ტარიფების გაზრდა პრობლემებს ვერ მოაგვარებს.
სწორედ ამიტომ ვიყავით მზად აშშ-სთან მოლაპარაკებებისთვის, რათა აღმოგვეფხვრა დარჩენილი ბარიერები ტრანსატლანტიკური ვაჭრობის გზაზე. ამავდროულად, მზად ვართ რეაგირებისთვის. უკვე ვასრულებთ ზომების პირველ პაკეტზე მუშაობას ფოლადზე დაწესებული ტარიფების საპირწონედ და ვემზადებით დამატებითი ზომებისთვისაც, რათა დავიცვათ ჩვენი ინტერესები და ბიზნესი იმ შემთხვევაში, თუ მოლაპარაკებები ვერ შედგება.
ასევე ყურადღებით ვაკვირდებით იმ შესაძლო არაპირდაპირ შედეგებს, რომლებიც ამ ტარიფებს შეიძლება მოჰყვეს. ჩვენ ვერ ავითვისებთ გლობალურ ჭარბწარმოებას და არ დავუშვებთ საქონლისა და მომსახურების სხვა ქვეყანაში უფრო იაფად გაყიდვას. როგორც ევროპელები, ჩვენ ყოველთვის დავიცავთ ჩვენს ინტერესებსა და ღირებულებებს და ყოველთვის დავიცავთ ევროპას.
არსებობს ალტერნატიული გზა. ჯერ კიდევ არ არის გვიან, რომ მოლაპარაკებების გზით მოვაგვაროთ არსებული პრობლემები. სწორედ ამიტომ ჩვენი ვაჭრობის კომისარი მაროშ შეფჩოვიჩი თანამშრომლობს აშშ-ის წარმომადგენელთან. ჩვენ ვიმუშავებთ ბარიერების შემცირებაზე და არა მათ გაზრდაზე“, – განაცხადა ევროკომისიის პრეზიდენტმა ურსულა ფონ დერ ლაიენმა.
ევროკავშირი მზად არის როგორც დიალოგისთვის, ისე შესაბამისი საპასუხო ზომებისთვის. უკვე შემოღებულია დაცვითი მექანიზმები ფოლადისა და საავტომობილო სექტორებისთვის. ფონ დერ ლაიენი აცხადებს, რომ ევროპა ერთიანად დაიცავს თავის ინტერესებს.
წყარო: euronews georgia