ინვესტორის წარმომადგენლები „ბრიტანულ-ქართულ აკადემიაში“ ცდილობდნენ შეჭრას

“საქართველოს განათლების ჯგუფის“ წარმომადგენლები, რომელთა უკან ინვესტორი კომპანიის დამფუძნებელი „საქართველოს კაპიტალი“ და ირაკლი გილაური დგანან, დილიდან ცდილობდნენ „ბრიტანულ-ქართული აკადემიის“ ტერიტორიაზე შეჭრას, ხელი შეუშალეს სასწავლო პროცესს და არ ემორჩილებოდნენ დაცვის სამსახურის მოთხოვნებს. ინვესტორის წარმომადგენლები საჯარო რეესტრის მიერ 21 თებერვალს რეგისტრაციაში გატარებულ პარტნიორთა კრების ოქმს იშველიებდნენ, რომლის მიხედვითაც სკოლის მოქმედი დირექტორი შეიცვალა და ახალი დაინიშნა. სკოლის დამფუძნებლისა და მოქმედი დირექტორის ნათია ჯანაშიას სამართლებრივი წარმომადგენლის განცხადებით, პარტნიორთა კრება არ ჩატარებულა და ინვესტორმა ყალბი დოკუმენტის საფუძველზე დაამტკიცა ახალი დირექტორი, შეიყვანა რა შეცდომაში საჯარო რეესტრის ეროვნული სააგენტოს მესვეურები.
12 თებერვალს “ბრიტანულ–ქართული აკადემიის” პარტნიორთა კრება არ შედგა. მიუხედავად ამისა, “საქართველოს კაპიტალის” შვილობილმა კომპანია “საქართველოს განათლების ჯგუფმა” ნათია ჯანაშიას დირექტორის პოზიციიდან გადაყენება მაინც სცადა. მიუხედავად იმისა, რომ კრება მრავალი დარღვევის ფონზე ჩაიშალა, “საქართველოს განათლების ჯგუფმა” მაინც შეადგინა კრების ოქმი, სადაც ნათია ჯანაშიას დირექტორის პოზიციიდან გადაყენება და მის ნაცვლად სასკოლო საზოგადოებისათვის უცნობი იოჰან ვან ლილის დანიშვნა დააფიქსირა. ამის შემდეგ მათ განცხადებით საჯარო რეესტრს მიმართეს.
13 თებერვალს, საჯარო რეესტრმა შეაჩერა “საქართველოს კაპიტალის” უფლებამონაცვლე შპს “საქართველოს განათლების ჯგუფის” მიერ 12 თებერვალს წარდგენილი განცხადება ახალი დირექტორის დანიშვნასთან დაკავშირებით, რომლის პროცედურაც წესების დარღვევით წარიმართა. შესაბამისად, არშემდგარ კრებაზე მიღებულმა გადაწყვეტილებამ ვერ დააკმაყოფილა კანონით გათვალისწინებული მოთხოვნები. 13 თებერვლიდან დღემდე საჯარო რეესტრმა რამდენჯერმე არ დაარეგისტრირა კრების ოქმი, თუმცა 21 თებერვალს ეს მაინც მოხერხდა.
შპს “ბრიტანულ–ქართული აკადემიის” დამფუძნებელი პარტნიორის და დირექტორის ნათია ჯანაშიას სასამართლო დავა სს “საქართველოს კაპიტალის” აღმასრულებელი დირექტორის ირაკლი გილაურის წინააღმდეგ გრძელდება და პროცესი საქართველოს საზღვრებსაც გასცდა. სკოლის წილის 70%–ის შეძენისას გილაურმა და მისმა კომპანიამ აიღეს ვალდებულება, ათობით მილიონი ლარის ინვესტიცია განეხორციელებინათ სასწავლო დაწესებულების სწრაფი განვითარებისთვის, რაც არ შეასრულეს. თუმცა აგრძელებენ მოქმედებებს უკვე პირადად ნათია ჯანაშიას წინააღმდეგ და ცდილობენ მისი თანამდებობიდან გადაყენებას.
(R)