მედია: მოსკოვში ჩაკეტეს ხიდი, რომელზეც მოქალაქეებს ნემცოვის მემორიალთან ყვავილები მიჰქონდათ

რუსულ დამოუკიდებელ მედიაში გავრცელებული ინფორმაციით, 27 თებერვალს მოსკოვში რუსეთის პოლიციამ ჩაკეტა Большой Москворецкий ხიდის საფეხმავლო ნაწილი, სადაც მოქალაქეებს რუსი ოპოზიციონერის, ბორის ნემცოვის ხსოვნისთვის პატივის მისაგებად დღის განმავლობაში ყვავილები მიჰქონდათ. ნემცოვი 2015 წლის 27 თებერვალს სწორედ აღნიშნულ ხიდზე მოკლეს.

“პოლიციამ ჩაკეტა ხიდი და ადგილიდან გაიყვანა ხალხი, რომელიც მოკლული პოლიტიკოსის ხსოვნის პატივსაცემად იყო მისული”. – წერს გამოცემა Sotavision.

როდესაც ერთ-ერთმა ადგილობრივმა მცხოვრებმა პოლიციას ჰკითხა, თუ რატომ არ უშვებდნენ ადამიანებს ხიდის საფეხმავლო ნაწილზე, ერთ-ერთმა პოლიციელმა უპასუხა, რომ სავალი ნაწილი ჩაკეტილი იყო, რადგან უცნობი პირები “სპეციალურ ოპერაციას” გეგმავდნენ.

ერთ-ერთი რუსული ტელეგრამ-არხის ცნობით, დღის გარკვეულ მონაკვეთებში პოლიცია ადამიანებს, რომლებიც ბორის ნემცოვის ხელნაკეთ მემორიალს ყვავილებით უახლოვდებოდნენ, ხიდზე არ უშვებდნენ და ხიდიდან ყვავილები გაჰქონდათ.

ამასთან, გამოცემა Moscow Times-ის ცნობით, პოლიციამ მემორიალთან მისული რამდენიმე მოქალაქეც დააკავა. გავრცელებული ინფორმაციით, მემორიალზე ყვავილების მიტანისთვის ადამიანები დააკავეს რუსეთის სხვა ქალაქებშიც, მათ შორის, ბარნაულში, უფაში და სხვა.

ცნობისთვის, ზუსტად 10 წელი გავიდა მას შემდეგ, რაც 2015 წლის 27 თებერვალს რუსი ოპოზიციონერი პოლიტიკოსი ბორის ნემცოვს მოსკოვში, Большой Москворецкий ხიდზე ცეცხლსასროლი იარაღით ესროლეს და მოკლეს.

წყარო