პროკურორი – დავით ხომერიკს გამზადებული ჰქონდა ცეცხლგამჩენი მოწყობილობა, რომლის გამოყენების შემთხვევაში შეიძლებოდა ნებისმიერი პირისთვის ჯანმრთელობის დაზიანებით მძიმე შედეგი გამოეწვია

ე.წ. მოლოტოვის კოქტეილის ფლობისთვის, აქციაზე დაკავებული დავით ხომერიკის საქმის პროკურორის ინფორმაციით, „ხომერიკს გამზადებული ჰქონდა ცეცხლგამჩენი მოწყობილობა, რომლის გამოყენების შემთხვევაში შეიძლებოდა ნებისმიერი პირისთვის ჯანმრთელობის დაზიანებით მძიმე შედეგი გამოეწვია“.
როგორც პროკურორმა ვაჟა თოდუამ ჟურნალისტებს სასამართლო პროცესის დასრულების შემდგომ განუცხადა, დავით ხომერიკი პოლიციამ თავდაპირველად მიმდინარე აქციების დროს, გზის გადაკეტვის მოტივით ადმინისტრაციული წესით დააკავა და სწორედ ადმინისტრაციული წესით დაკავებისას აღმოუჩინეს ცეცხლგამჩენი მოწყობილობები, რომელიც, პროკურორის თქმით, გამზადებული იყო გამოყენებისთვის.
პროკურორის განცხადებითვე, ექსპერტი დასკვნაში პირდაპირ მიუთითებს, რომ “ეს არ არის უბრალოდ ბოთლში არსებული სითხე, ეს არის ცეცხლგამჩენი მოწყობილობა”.
“დავით ხომერიკი დაკავებული იქნა ადმინისტრაციული წესით. პირადი გასინჯვის შედეგად აღმოჩენილი იქნა ცეცხლგამჩენი მოწყობილობები. მასზე დაინიშნა ექსპერტიზა. [ამოღებული ნივთიერებიდან] იყო შუშის ბოთლები, მასში მოთავსებული აალებადი სითხით. ასევე ამ ბოთლებზე შემოხვეული იყო ნაჭრების ე.წ. ფითილი, რომელზეც დასხმული იყო აალებადი ნივთიერება. ექსპერტმა შეაფასა აღნიშნული ნივთიერება, რომ ეს იყო ცეცხლგამჩენი მოწყობილობა და მიუთითა დასკვნაში. დაიკითხებიან დასკვნის შემდგომი ექსპერტები და დასკვნის თაობაზე ინფორმაციას მიაწოდებენ სასამართლოს. რამდენიმე ბოთლი ამოიღეს, თუმცა სამი ბოთლი იყო ცეცხლგამჩენი მოწყობილობა”, – განაცხადა ვაჟა თოდუამ.