საქართველოს უნივერსიტეტმა სამართლის სკოლების მედიაციის პრესტიჟულ საერთაშორისო კონკურსს უმასპინძლა

საქართველოს უნივერსიტეტმა, 4-8 მარტს, წარმატებით უმასპინძლა მსოფლიოში ყველაზე ძველ და ცნობილ სტუდენტურ საერთაშორისო კონკურსს მედიაციაში – INADR – International Law School Mediation Tournament (INADR ILSMT).
23 წლის წინ აშშ-ში, ჩიკაგოში, ლოიოლას უნივერსიტეტში დამკვიდრებული ტრადიციის მიხედვით ეს კონკურსი ლუწ წლებში ამავე უნივერსიტტეში ტარდება, კენტ წლებში კი კონკურსს სხვადასხვა ქვეყნის წარმატებული უნივერსიტეტი მასპინძლობს. 2025 წელს კონკურსის მასპინძლად საქართველოს უნივერსიტეტი შეირჩა.
საერთაშორისო მედიაციის კონკურსი საქართველოს უნივერსიტეტში დავის გადაწყვეტის საერთაშორისო აკადემიის (INADR – International Academy of Dispute Resolution) ორგანიზებით ჩატარდა და მასში მსოფლიოს 20-ზე მეტი ქვეყნის წამყვანი უნივერსიტეტების სტუდენტური გუნდები მონაწილეობდნენ. მონაწილე ქვეყნებს შორის იყვნენ აშშ, ინდოეთი, აფრიკა, გერმანია, პოლონეთი, უკრაინა, ბულგარეთი, საბერძნეთი.
კონკურსის ფარგლებში, საქართველოს უნივერსიტეტს მსოფლიოს სხვადასხვა უნივერსიტეტების სამართლის სკოლების წარმატებული სტუდენტების გარდა, სტუმრობდნენ მათი მწვრთნელები და პროფესიონალი შემფასებელები, რომლებიც მედიაციის სფეროში პროფესიული ქსელის გაფართოებისა და საერთაშორისო დასაქმების მძლავრ შესაძლებლობას წარმოადგენენ.
კონკურსში ტრადიციულად მონაწილეობდა საქართველოს უნივერსიტეტის გუნდიც, რომელმაც ფინალურ რაუნდში წარმატებით ითამაშა. საქართველოს უნივერსიტეტის გუნდის შემადგენლობაში იყვნენ სტუდენტები: ანა კვანტრიშვილი, მარიამ კვანტალიანი, ანი თავხელიძე და გუნდის მწვრთნელი ნატა სტურუა.
კონკურსის შერეულ გუნდში ასევე მონაწილეობდა საქართველოს უნივერსიტეტის კიდევ ერთი სტუდენტი, ფიდან მამედოვა, რომელმაც მედიაციის საუკეთესო გუნდის ნომინაციაში მე-7 ადგილი დაიკავა.
22 გუნდის მონაწილეობით გამართული კონკურსის სამივე რაუნდის დასრულების შემდეგ ჟიურიმ გამოავლინა გამარჯვებულები.
პირველი ადგილი 4 სხვადასხვა ნომინაციაში გადაეცათ შემდეგ გუნდებსა და კონკურსანტებს:
· მედიაციიის საუკეთესო გუნდის ნომინაცია – ლოიოლას უნივერსიტეტი ჩიკაგოს სამართლის სკოლა – Loyola University Chicago School of Law;
· ადვოკატ/კლიენტის საუკეთესო გუნდის ნომინაცია – law Society of Ireland;
· ტოპ მედიატორის ნომინაცია – Charles University – Jakub Hajčík;
· ტოპ ადვოკატ/კლიენტის წყვილის ნომინაცია – National Law School of India University Bangalore – Varsha Ramesh & Nidhi Agraw.
კონკურსში მონაწილეობა სამართლის მიმართულების სტუდენტებს მედიაციის, მოლაპარაკების და ადვოკატირების უნარების ეფექტურად წარმოჩენისა და განვითარების, ასევე, მედიაციის საერთაშორისო დონეზე აღიარებული პროფესიონალებისგან უკუკავშირის მიღების საშუალებას აძლევს.
აღნიშნული კონკურსის საქართველოში ჩატარების მნიშვნელობაზე საქართველოს უნივერსიტეტის სამართლის სკოლის დირექტორი ანი ხურციძე გვესაუბრა. მისი თქმით, მსგავსი მასშტაბის კონკურსის მასპინძლობა მნიშვნელოვანია არა მხოლოდ საქართველოს უნიევრსიტეტის, არამედ მთლიანად ქვეყნის პოპულარიზაციისა და მასზე დადებითი იმიჯის შექმნის თვალსაზრისითაც.
„სამართლის მედიაციის საერთაშორისო კონკურსის ჩატარებით საქართველოს უნივერსიტეტი გახდა ძალიან მნიშვნელოვანი ღონისძიების მასპინძელი. ჩამოსული სტუმრები ჩვენი უნივერსიტეტის და მთელი ქვეყნის გულშემატკივრები ხდებიან. მათი დიდი ნაწილი პირველად იყო ჩვენს ქვეყანაში და ძალიან მოხიბლულები არიან, რაც იმას ნიშნავს რომ მომავალშიც გეგმავენ ჩამოსვლას. სწორედ ამიტომ, ეს ღონისძიება ძალიან მნიშვნელოვანია ქვეყნის პოპულარიზაციისთვის, განსაკუთრებით ამ პერიოდში, როდესაც ასეთი კრიზისია ჩვენთანაც და მსოფლიოში. ამ დროს განსაკუთრებულია ქვეყნის დადებითად წარმოაჩენა და იმის დემონსტრირება, რომ ასეთი მაღალი დონის უნივერსიტეტი და სასწავლო პროგრამები გვაქვს, რომელსაც მსოფლიო დონის აკადემიური პერსონალი ახორციელებს. ჩვენი გუნდის ფინალში გადასვლაც ამ ყველაფერს ადასტურებს. სტუმრები აღფრთოვანებული დარჩნენ ჩვენი ხალხის მასპინძლობითა და როგორც თავად აღნიშნავენ, ძალიან კეთილგანწყობილი გარემოთი. სტუმრებს ვაჩვენეთ, რომ ვართ ევროპული კულტურის ნაწილი, რომ ჩვენ ვიმსახურებთ უკეთეს ქვეყანას, ჩვენი სტუდენტები კი იმსახურებენ უკეთეს შესაძლებლობებს. ძალიან ამაყები ვართ, რომ ამ კონკურსის ასეთ მაღალ დონეზე, ასეთი წარმატებით ჩატარებით კიდევ ერთხელ მოვინიშნეთ მსოფლიო რუკაზე,“ – განმარტავს ანა ხურციძე.
აღსანიშნავია, რომ მედიაციის სწავლება საქართველოს უნივერსიტეტში (UG) სამართლის სკოლის ერთ-ერთი პრიორიტეტია. შესაბამისად, საქართველოს უნივერსიტეტი სტუდენტებს ამ მიმართულების რამდენიმე საერთაშორისო კონკურსში მონაწილეობის შესაძლებლობას, ყოველწლიურად, სრული დაფინანსებით აძლევს.