„უნდა გაჩნდეს საინვესტიციო ბანკები და ე.წ. ვენჩურული კაპიტალი. საჭიროა ხელმისაწვდომობა რესურსებზე და ფულზე საპარტნიორო დონეზე და არა სესხით“ – რა უშლის ხელს ქართულ ბრენდებს გლობალურ ბაზრებზე გასვლაში

„უნდა გაჩნდეს საინვესტიციო ბანკები და ე.წ. ვენჩურული კაპიტალი. საჭიროა ხელმისაწვდომობა რესურსებზე და ფულზე საპარტნიორო დონეზე და არა სესხით“ – რა უშლის ხელს ქართულ ბრენდებს გლობალურ ბაზრებზე გასვლაში
ქართულ ბრენდებს გლობალურ ბაზრებზე გასვლა და თავის დამკვიდრება უჭირთ, თუმცა არიან გამონაკლისებიც, რომლებმაც ინვესტიციები საზღვარგარეთ განახორციელეს და ქვეყნის ფარგლებს გარეთ ფილიალები გახსნეს. ბრენდინგისა და მარკეტინგის სპეციალისტი ალექსი ჩიქოვანი ქართული კომპანიების განვითარების შემაფერხებელ ერთ-ერთ მიზეზად ფინანსურ რესურსებზე შეზღუდულ წვდომას ასახელებ. ,,კომერსანტთან“ საუბარში ის აცხადებს, რომ დღეს ქვეყანაში ფინანსების მოძიება მხოლოდ კომერციული ბანკებიდან არის შესაძლებელი, რაც ძვირ ფულს ნიშნავს. კომპანიები კი ამ რისკზე ვერ მიდიან და გლობალურ ბაზარზე დიდი კონკურენციის პირობებში ძვირი ინვესტიციებით შესვლას ვერ ბედავენ. ჩვენი რესპონდენტი აცხადებს, რომ ქართული ბრენდების განვითარებისთვის და გლობალურ ბაზრებზე თავის დამკვიდრებისთვის საჭიროა საინვესტიციო ბანკებისა და ვენჩურული კაპიტალების შექმნა.
,,რადიკალურად უნდა შეიცვალოს დამოკიდებულება საქართველოში საინვესტიციო ფულის ხელმისაწვდომობაზე. უნდა გაჩნდეს საინვესტიციო ბანკები. უნდა გაჩნდეს ე.წ. ვენჩურული კაპიტალი და ადამიანებს, ვისაც აქვს სურვილი განახორციელონ ინვესტიცია უნდა ჰქონდეთ გარანტიები. კომპანიებსაც შესაბამისად უნდა ჰქონდეს წვდომა ფინანსებზე. სააქციო ბირჟა ძალიან სუსტია. არანაირი ფორმის საინვესტიციო დაწესებულება, კერძო ადამიანების გარდა, არ არსებობს. საჭიროა ხელმისაწვდომობა რესურსებზე და ფულზე. საჭიროა საპარტნიორო დონეზე და არა სესხით და კრედიტით. ამით რთულია. ამით შეუძლია საზღვარგარეთ გავიდეს კომპანია, რომელიც აქ მყარად არის და იმდენი cash flow ანუ ფული აქვს, რომ განახორციელოს ინვესტიცია. მაგალითად ,,ანტრე” რამდენი წელია ბაზარზე არსებობს. დაახლოებით 15 წლის თავზე შეძლო, რომ გასულიყო საზღვარგარეთ. ალბათ ,,ანტრეს” მისი 15 ფილიალი აძლევს უკვე საშუალებას, რომ ცოტა გაბედულად წავიდნენ დასავლეთისკენ. ამ ფულით დაჩები, სახლები და აგარაკები კი არ იყიდონ, რამედ ინვესტიციები გააკეთონ. არეულ მდგომარეობაში ხანდახან ადამიანს ურჩევნია ქონება მოიხვეჭოს, ვიდრე დამატებითი ინვესტიციები აკეთოს საკუთარი თანხებით. კომპანიებს შეიძლება ფინანსები არ აქვთ, რადგან ჩვენი ბაზარი არის პატარა. შესაბამისად, ამონაგები შეიძლება იმხელა არ იყოს, რომ ეყოთ საზღვარგარეთ ინვესტიციისთვის. ძვირიანი ფულითა და კრედიტის საზღვარგარეთ მაღალ კონკურენციაში შესვლა თუ ძალიან განსაკუთრებული და გამორჩეული პროდუქტი არ გაქვს ძალიან რთულია.’’- აცხადებს ალექსი ჩიქოვანი.
ალექსი ჩიქოვანი აცხადებს, რომ ქართულმა ბრენდებმა თავის დამკვიდრების მიზნით გრძელვადიანი სტრატეგიები უნდა შეიმუშაონ და ბაზარს კონკურენტული პროდუქცია შესთავაზონ. ამას კი დრო, მიზანმიმართული მუშაობა და ფინანსური რესურსი სჭირდება.
,,საბოლოო ჯამში ყველაფერი დადის მენტალობამდე. ვგულისხმობ, როგორ უდგები შენს საქმეს, რა მიზნები და რა სტრატეგია გაქვს. ქართული ბრენდები – ცოტა ხმამაღალი ნათქვამია, რადგან ბრენდებია ცოტაა, თუმცა არის მაგალითები. საზღვარგარეთ გავიდა ,,ანტრე’’, გავიდა ,,სკა ჯუს ბარი’’. ქართული ბრენდია ,,CROSTY’’, რომელიც საერთაშორისო ბაზარზეა. ამას უნდა შესაბამისი დამოკიდებულება. შესაბამისი ინვესტიცია, მართვა და ბრენდის მშენებლობა. ამას სჭირდება დრო, ძალისხმევა და ფული. ამას ვურჩევდი ქართულ ბრენდებს, რომ მოკლევადიან შემოსავლებზე ნუ იქნებიან ორიენტირებულები. ყველას სჭირდება ბრენდის სტრატეგია და რა თქმა უნდა, კონკურენტუნარიანი პროდუქცია და მომსახურება. უნდა შექმნან ისეთი, როგორიც საზღვარგარეთ არ არის ან სხვანაირია და ახალი შტრიხი შეიძლება შეიტანონ. ამას ძალიან დიდი დრო და თანმიმდევრული მუშაობა სჭირდება.’’- აცხადებს ალექსი ჩიქოვანი.
ბრენდებისთვის მთავარ გამოწვევას კი მაინც ქვეყნის ეკონომიკური განვითარება და არასტაბილური გარემო წარმოქმნის. ამ ფაქტორების გამო კომპანიები და ბიზნესები კონცენტრირებას ვერ ახერხებენ და ხშირად არასწორად რეაგირებენ.
,,სამწუხაროდ, ქვეყნის რეალობიდან გამომდინარე, დამოუკიდებლობის მოპოვების დღიდან სულ რყევებია, სულ არეულობაა. ადამიანებს უჭირთ იფიქრონ დიდ მასშტაბებზე. თუმცა, ახალგაზრდები უფრო ფიქრობენ, რომლებიც უფრო ტექნოლოგიურ პროდუქტებზე და მომსახურებაზე მუშაობენ. საქართველოში ძალიან ცოტაა კომპანია, რომელსაც აქვს ჩამოყალიბებული სტრატეგია და იცის საით მიდის. მოკლე ვადიან გეგმებს აკეთებენ ძირითადად და ხშირია ცდუნებებზე არასწორი რეაგირება, რის გამოც ბრენდებისა და კომპანიების რეპუტაცია ზიანდება. საჭიროა თანმიმდევრული მიყოლა. მოკლევადიანი და გრძელვადიანი გეგმების სინთეზი.’’- აცხადებს ალექსი ჩიქოვანი.