ბალტიის ქვეყნებს კონტინენტური ევროპის ელექტროგადამცემ ქსელთან ვაკავშირებთ, ვწყვეტთ რუსეთთან დარჩენილ ბოლო კავშირებს – ურსულა ფონ დერ ლაიენი

ბალტიის ქვეყნები, ლიეტუვა, ლატვია და ესტონეთი კონტინენტური ევროპის ელექტროგადამცემ ქსელს შეუერთდნენ, – ამის შესახებ ევროკომისიის პრეზიდენტმა, ურსულა ფონ დერ ლაიენმა სოციალურ პლატფორმა X-ზე დაწერა.
„დღეს ჩვენ ბალტიის ქვეყნებს კონტინენტური ევროპის ელექტროგადამცემ ქსელთან ვაკავშირებთ, ვწყვეტთ რუსეთთან დარჩენილ ბოლო კავშირებს. გათავისუფლება მუქარისა და შანტაჟისაგან. ეს ისტორიული დღეა“, – აცხადებს ევროკომისიის ხელმძღვანელი.
ცნობისთვის, ლიეტუვამ, ესტონეთმა და ლატვიამ თავიანთი ელექტროსისტემები რუსეთის ელექტრო ქსელიდან გუშინ გამოთიშეს, ევროკავშირის ქსელს კი დღეს მიუერთდნენ.
ნავთობითა და გაზის რესურსებით მდიდარი რუსეთის ელექტროსისტემიდან ჩახსნას მნიშვნელოვანი გეოპოლიტიკური და ასევე სიმბოლური დატვირთვაც აქვს.
ამ მიმართულებით მუშაობა მას შემდეგ დაჩქარდა, რაც რუსეთის პრეზიდენტმა ვლადიმერ პუტინმა უკრაინაში შეჭრის გადაწყვეტილება მიიღო, რითაც მოსკოვსა და ბრიუსელს შორის ურთიერთობა დაიძაბა.
ბალტიისპირეთის სამი ქვეყანა რუსეთსა და ბელარუსთან 16 ელექტროგადამცემი ხაზით იყო დაკავშირებული, თუმცა ევროკავშირის წევრ ქვეყნებთან წყალქვეშა თუ სახმელეთო კაბელების ეტაპობრივად გაყვანის პარალელურად, რუსეთთან დამაკავშირებელი ხაზები მცირდებოდა.
გუშინ, შაბათს, 8 თებერვალს, სათითაოდ გაითიშა ყველა დარჩენილი გადამცემი ხაზი, რომლებიც ბალტიისპირეთის ქვეყნებს რუსეთსა და მის ექსკლავ კალინინგრადთან აკავშირებს.
გათიშვიდან 24 საათის განმავლობაში სამივე ქვეყანა საკუთარ რეზერვები გამოიყენა, ხოლო მეორე დღეს, 9 თებერვალს, ისინი საბოლოოდ დაუკავშირდებიან ევროპისა და სკანდინავიის ელექტროენერგიის ქსელს. პროექტის მხარდაჭერის მიზნით, ევროკავშირმა 1.2 მილიარდი ევრო გამოყო.
ბალტიისპირეთის ქვეყნების მთავრობების თქმით, მოვლენების პარალელურად, სოციალურ ქსელში ვრცელდება ყალბი ინფორმაცია შესაძლო ენერგოდეფიციტის წარმოქმნისა და ელექტროენერგიის ფასის გაძვირებაზზე, რაც მათივე განმარტებით, სიმართლეს არ შეესაბამება.