“1.5 წელიწადში თბილისის თიზ-ში ₾10 მილიონამდე ინვესტიცია განვახორციელეთ” – სოსო ნიბლაძე

“ზოტი ჰოლდინგმა” 2023 წლის აპრილიდან დღემდე თბილისის ინდუსტრიული ზონის განვითარებაში 10 მილიონ ლარამდე ინვესტიცია განახორციელა – ამის შესახებ BMGDrive-ის ეთერში თიზ-ის მმართველმა პარტნიორმა, სოსო ნიბლაძემ განაცხადა.
“ჩვენი ჰოლდინგი პროექტში 2023 წლის აპრილიდან შევიდა. დავიწყეთ ინტენსიური ინვესტიციები და დაახლოებით 1.5 წელიწადის განმავლობაში, სხვადასხვა პროექტებში 8-10 მილიონამდე ლარის ინვესტიცია განვახორციელეთ. შიგნითვე შევქმენით მომსახურებათა პაკეტები, რომლებიც გულისხმობს, არა მხოლოდ ჩვენი ფინანსური რესურსით, არამედ დაინტერესებული კომპანიების ინვესტიციითაც, ჩვენივე სარემონტო-სამშენებლო ჯგუფის მეშვეობით გავუწიოთ მომსახურება ადგილზევე.
ჩვენთვის კრიტიკულად მნიშვნელოვანია, რომ როდესაც ინვესტორი ჩამოდის, მას ადგილზე ხვდება მზა ინფრასტრუქტურა, კონკრეტული სერვისები, რაც მისი ოპერირების დაწყებას გაამარტივებს. თუ ეს ყველაფერი გვაქვს, ეს ინვესტორის მიერ გადაწყვეტილების მიღების პროცესს აჩქარებს და კონკურენტულ უპირატესობას გვაძლევს”, – ამბობს სოსო ნიბლაძე.
ნიბლაძე განმარტავს, რომ “ზოტი ჰოლდინგის” მიერ თიზ-ის გადაბარების შემდეგ, კომპანიამ სტრატეგიული განვითარების გეგმა შეცვალა და საგარეო კაპიტალდაბანდების ნაცვლად, შიდა ინვესტიციით კონკურენტუნარიანობის გაზრდაზე გადაეწყო.
“ჩვენი გამოცდილებიდან გამომდინარე, მარტივად გადავწყვიტეთ ჩვენი სტრატეგიული განვითარების გეგმა, რაც გულისხმობდა არა სტანდარტული, კლასიკური მოდელის განვითარებას, არამედ მის რემოდელირებას. გადავწყვიტეთ აქტიურად განგვეხორციელებინა ინვესტიციები ჩვენ თვითონვე, ინფრასტრუქტურასა და სერვისებში. რა თქმა უნდა, ჩვენი საოპერაციო საქმიანობა უფრო კაპიტალინტენსიური გახდა, რაც, გარკვეულწილად, ზეწოლაა ჩვენთვის, მაგრამ ამ რისკზე წავედით, რადგან სხვა გზა არ გვქონდა.
მივხვდით, რომ საქართველოში ინვესტორის მოზიდვა რომ შევძლოთ, უფრო მეტად კონკურენტული უნდა გავხდეთ. ამიტომ დავიწყეთ თანხების მობილიზება, შევქმენით შენობა-ნაგებობები. თუ დიდი პროექტი შემოვა, ყოველთვის უნდა გქონდეს ფინანსური და ტექნიკური მზაობა იმისთვის, რომ მან თუ აგირჩია, ამ ყველაფრით უზრუნველყო”, – აღნიშნავს ნიბლაძე.
მისივე თქმით, დღეს თიზ-ი მნიშვნელოვნად განსხვავდება 2016 წლის მდგომარეობისგან, როდესაც ზონამ ოპერირება პირველად დაიწყო.
“თბილისის თიზ-ი 2016 წლიდან ოპერირებს, მაგრამ [წინა მმართველის] სტრატეგია განსხვავებული იყო. ადგილზე სულ სამი სასაწყობე დანიშნულების შენობა დაგვხვდა, სადაც სხვადასხვა კომპანია ოპერირებდა. ჩვენ ეს გავაორმაგეთ და დღეს 7 შენობა გვაქვს, ნაწილი ჩვენი ინიციატივით, ნაწილი კომპანიების კაპიტალდაბანდებით. სულ სხვაა დღევანდელი თიზ-ი 2023 წლის დასაწყისთან შედარებით”, – აცხადებს სოსო ნიბლაძე.