ივანიშვილის ნახატების სკანდალი და ე.წ. ოფშორების კანონი – ექსპერტული შეფასებები

საქართველოს პარლამენტის მიერ ე.წ. ოფშორების კანონის მიღებასა და უცხოეთიდან ბიძინა ივანიშვილის ნახატების ევაკუაციას ეკონომისტები აფასებენ და მოსალოდნელ საფრთხეებზე საუბრობენ.
დარგის ექსპერტები ამბობენ, რომ “ოფშორების კანონი” საქართველოსთვის ხელსაყრელი არ არის, რადგან კანონი ქვეყანაში ე.წ. ბნელი ფულისა და ინვესტიციების შემოდინებას უწყობს ხელს.
“კანონი ქვეყანას საერთაშორისო დონეზე არასანდო პარტნიორად აქცევს” – აღნიშნავენ სფეროს სპეციალისტები.
“ბიუჯეტის ხარჯზე რამდენიმე მილიონის არ გატარება და გვერდის ავლა, ვფიქრობ, რომ მინიმუმ მორალური ნაწილის პასუხისმგებლობა არის. ოფშორების კანონი საქართველოსთვის ხელსაყრელი არ არის, რადგან ე.წ. ბნელი ფულის, ბნელი ინვესტიციების შემოდინებას უწყობს ხელს. მაშინ, როდესაც ჩვენ პრაქტიკულად ზურგს ვაქცევთ ცივილურ ქვეყნებს, სამყაროს, ეს ქვეყანას აქცევს არასანდო პარტნიორად საერთაშორისო დონეზე”, – ამბობს დარგის ექსპერტი.
ეკონომისტი ოთარ აბესაძე კი ორმაგ სტანდარტებზე საუბრობს და აცხადებს, რომ იმ ფონზე, როდესაც რიგითი მოქალაქე აქციზისა და იმპორტის გადასახადს იხდის, ხოლო ივანიშვილი თავს არიდებს, უსამართლობაა.
“რა საკვირველია, იმპორტის გადასახადი და აქციზის გადასახადი თუ არ ექვემდებარება განბაჟებას და ვერიფიკაციას ერთი ადამიანისთვის, მაშინ ადამიანს, რომელსაც ჩამოჰყავს შეერთებულიო შტატებიდან ავტომობილი, მაშინ ის რატომ იხდის განბაჟების და იმპორტის გადასახადს. ნონსენსია”, – ამბობს ოთარ აბესაძე.
შეგახსენებთ, ფინანსთა სამინისტროს იმპორტის ოფიციალური მონაცემებით ირკვევა, რომ 2025 წლის იანვარში საქართველოში მხოლოდ, დიდი ბრიტანეთიდან და ამერიკის შეერთებული შტატებიდან, სამ ნაწილად, 480 658 330 აშშ დოლარის ღირებულების ნახატები შემოვიდა. შემოტანილი ხელოვნების ნიმუშების წონა 6 ტონას აჭარბებს, ამაში შედის ნახატების შეფუთვა და დამცავი კონსტრუქციები.
ცნობისთვის, დღგ-ის ჯამური მაჩვენებელი იანვარში შემცირდა.
წყარო: tv pirveli