“მაპატიე, ქალბატონო ფერიდე!” – რა ბედი ელის ქვეყნის ეროვნულ ბიბლიოთეკას?

ეროვნული ბიბლიოთეკის საბიბლიოთეკო რესურსების დეპარტამენტის ხელმძღვანელი, ლევან თაქთაქიშვილი, რომელიც არაერთი დღეა წერს, რომ დიდი შეცდომაა ეროვნული ბიბლიოთეკა აღარ იყოს საპარლამენტო, მიღებულ გადაწყვეტილებას აპროტესტებს და სოციალურ ქსელში, წერს:

ჩემო ძვირფასო ქალბატონო ფერიდე!
დღემდე ღირსეულად ვუყურებდი შენს ფოტოს! დღემდე ყოველივე მიღწევას შენ გიძღვნიდი, ბიბლიოთეკაში ხომ შენ მომიყვანე, შენ გამათამამე, შენ მასწავლე, რომ მთავარია, არ დააკლო საქმეს არაფერი და ყველაფერში გაიმარჯვებო!
ვერაფერი ვერ ვქენი, ჩვენი ბიბლიოთეკა აღარ არის საპარლამენტო. დღეს პარლამენტმა საბოლოოდ დაამტკიცა კანონპროექტი!
დღეიდან ჩვენ გვეწოდება საქართველოს ილია ჭავჭავაძის სახელობის ეროვნული ბიბლიოთეკა და არის კულტურის სამინისტროს დაქვემდებარებაში.
ისე დაარქვეს და ისე გადაარქვეს სახელი, რომ 29 წლის განმავლობაში შეცდომა არ გაუსწორებიათ- ნაცვლად საქართველოს პარლამენტის ეროვნული ბიბლიოთეკისა, უნდა რქმეოდა საქართველოს საპარლამენტო ეროვნული ბიბლიოთეკა. ახლა კი საერთოდ მოეხსნა ეს სიტყვა!
მაპატიე, ქალბატონო ფერიდე! ბატონ მერაბ ვეკუასაც გადაეცი ბოდიში! მის გარდაცვალების დღეს წლისთავზე მოხდა ეს! ალბათ ესეც სიმბოლურია!

რამდენიმე დღის წინ, როცა ცნობილი გახდა ახალ კანონპროექტზე, მანამ, სანამ ასეთი ელვისებური სიჩქარით დამტკიცდებოდა, ლევან თაქთაქიშვილი, წერდა:

მოკლედ გეტყვით!
მზადაა კანონპროექტი, რომლის მიხედვითაც საქართველოს პარლამენტის ეროვნული ბიბლიოთეკა გადის პარლამენტის დაქვემდებარებიდან და გადადის კულტურის სამინისტროს დაქვემდებარებაში. ამის შესახებ დღეს გადმომეცა პროექტი.
ჩემი აზრით, ეს არის მცდარი გადაწყვეტილება, რომელიც აუქმებს ქვეყნის საპარლამენტო ბიბლიოთეკას, პარლამენტი უარს ამბობს მისთვის მინიჭებულ უმნიშვნელოვანეს პასუხისმგებლობაზე.
ასევე, ეს არის ქვეყნის მთავარი წიგნთსაცავის სტატუსის შეცვლა, კულტურის სამინისტროსთან დაქვემდებარებით ის ინარჩუნებს მხოლოდ ეროვნული დეპოზიტარიუმის ფუნქციას, მაგრამ ის აღარ იქნება ის, რაც არის დღეს!
საქართველომ დღიდან დამოუკიდებლობის გამოცხადებიდან პარლამენტს დააკისრა ქვეყნის მთავარი წიგნთსაცავის მზრუნველობა.

დიახ, 1918 წელს ექვთიმე თაყაიშვილმა დააყენა საკითხი პარლამენტის ბიბლიოთეკის შექმნისა. მან, სწორედ ექვთიმე თაყაიშვილმა დააყენა საკითხი ამ ბიბლიოთეკის ფონდების შეძენისათვის 500 000 მანეთის გამოყოფა. შეიძინეს დიმიტრი ერმაკოვის ფონდი, ვაიდენბაუმის კოლექცია, სავალდებულო ეგზემპლარის კანონიც მიაღებინა. ეს გააკეთა ცხონებულმა ექვთიმე თაყაიშვილმა.

რას მოიფიქრებდა, რომ 2025 წელს დამოუკიდებელი საქართველო გააუქმებდა პარლამენტის ბიბლიოთეკას!

ჯერ კიდევ არ მიღებულა ეს მცდარი გადაწყვეტილება. მივმართავ პარლამენტარებს, ნუ შეცვლიან იმ გზას, რაც ექვთიმე თაყაიშვილმა შექმნა! ნუ ვიტყვით უარს საპარლამენტო ბიბლიოთეკაზე. ეროვნულ ბიბლიოთეკას ნუ დაუკარგავთ საპარლამენტო ბიბლიოთეკის ფუნქციას. ეს გადაწყვეტილება არ მომხდარა პარლამენტის ეროვნული ბიბლიოთეკის დირექციასთან შეთანხმებით. 1918 წლიდან არსებული ბიბლიოთეკის პირველი თეგი ჩვენი ბიბლიოთეკის ფონდებში დაცულ წიგნებს აქვს დარტყმული. აი, ექვთიმეს დამზადებული ბეჭედიც.

The post “მაპატიე, ქალბატონო ფერიდე!” – რა ბედი ელის ქვეყნის ეროვნულ ბიბლიოთეკას? appeared first on .