„შეიძლება საქართველოში რამე დაგეგმო? – რთულია“ – ღვინის ბარი “სულიკო”

„შეიძლება საქართველოში დაგეგმო რამე? – რთულია“, – ასე აფასებს BM.GE -სთან ღვინის ბარის „სულიკო“ დამფუძნებელი, ბაია ცაავა ტურისტული ობიექტის განვითარების პერსპექტივას.
აღსანიშნავია, რომ ღვინის ბარი „სულიკო“ მიხეილ ზანდუკელის #27-ში 2018 წლიდან ოპერირებს და მომხმარებელს ქართულ ნატურალურ ღვინოებსა და ევროპულ სამზარეულოს სთავაზობს. მისი მიზანი, ქართული მეღვინეობების მცირე წარმოებების განვითარებაში წვლილის შეტანაა. შესაბამისად, მათ ღვინის ბარში, ღვინის ძირითადი ნაწილი, სწორედ მცირე მეწარმეებს უკავიათ.
როგორც ბაია ცაავა ჩვენთან საუბრისას აცხადებს, ბარს მიმდინარე წელს ბევრი გეგმა აქვს. ძირითადი აქცენტი სივრცის ღონისძიებებით დატვირთვაა, თუმცა იქიდან გამომდინარე, რომ ქვეყანაში არასტაბილური მდგომარეობაა, ეს შეიძლება მცირე ბიზნესებისთვის დამღუპველიც კი გახდეს.
გარდა ამისა, ცაავა უკონტროლოდ გაზრდილ ფასებზეც მიუთითებს, რის გამოც ტურისტები სარესტორნო სივრცეებით სარგებლობისგან თავს იკავებენ.
„2025 წელს გვინდა აქცენტი ღონისძიებებზე გავაკეთოთ. კერძოდ, მეღვინეებთან შეხვედრები, პოდკასტები, მუსიკალური ღონისძიებების კუთხით და ა.შ. თუმცა, შეიძლება საქართველოში რამე დაგეგმო? – რთულია.
თუ არსებული არასტაბილურობა გაგრძელდა, ქართული მცირე ბიზნესისთვის იქნება დამღუპველი, რადგან შეუძლებელია ასე ოპერირება. პარალელურად, ფასების არანაირი რეგულაცია არ არის. ბევრი უცხოელია, რომელიც რესტორანში სიარულისგან თავს იკავებს, რადგან ფასებით გაოგნებულია. დღესდღეობით, ბაზარზე ანუ ჰორეკა სექტორში არსებული ფასები ევროპის მოწინავე ქვეყნების ფასებს უტოლდება, რაც წარმოუდგენელია”, – ამბობს ბარის დამფუძნებელი.
მისივე ინფორმაციით, ბარს სრული დატვირთვით შიდა და გარე სივრცის ჩათვლით, ჯამში 100 ადამიანის მასპინძლობა შეუძლია, თუმცა ბოლო თვეებში მათი დატვირთვა 60%-მდე შემცირდა. ცაავას ცნობით, მათი ობიექტის სტუმრები ძირითადად ექსპატები (ქვეყანაში დროებით მცხოვრები) და დიპლომატები არიან.
რაც შეეხება დასაქმებულებს, ტურისტული ობიექტი ამ დროისათვის 8 ადამიანს ასაქმებს.